” சந்தா பணத்துக்காகவே கடந்த நான்வரை வருடங்களில் நுவரெலியாவில் ஒரு தொழிற்சாலைகூட அமைக்கப்படவில்லை.” – என்று ஶ்ரீலங்கா பொதுஜன பெரமுனவின் நுவரெலியா மாவட்ட வேட்பாளர் முத்தையா பிரபு தெரிவித்தார்.
நுவரெலியாவில் நடைபெற்ற தேர்தல் பிரச்சாரக்கூட்டத்தில் கலந்துகொண்டு உரையாற்றுகையிலேயே அவர் இவ்வாறு கூறினார்.
இது தொடர்பில் அவர் மேலும் கூறியதாவது,
நுவரெலியா மாவட்டத்தில் உரிய தொழில் வாய்ப்புகள் இல்லை. இங்குள்ள அரசியல் முறைமையே இதற்கு காரணம்.
கடந்த நான்கரை வருடங்களில் பாரிய அபிவிருத்திகள் செய்யப்பட்டுள்ளன என்று திகாம்பரம் கூறியுள்ளார். ஆனால், இங்கு தொழிற்சாலைகள் எதுவும் அமைக்கப்படவில்லை. இதற்கும் காரணம் இருக்கின்றது.
தொழிற்சங்கம் மூலமாக அவருக்கு சந்தா வருகின்றது. எனவே, தொழிற்சாலை அமைத்தால் மக்கள் அங்கு வேலைக்கு சென்றுவிடுவார்கள். இதனால் சந்தா பணம் இல்லாமல்போய்விடும். இதனால்தான் அபிவிருத்திகளை முன்னெடுக்கவில்லை.
