” பாகிஸ்தான் முழுவதும் பிரம்மோஸ் வரம்புக்குள் உள்ளது. அந்த நாட்டின் எந்த பகுதியையும் தாக்கலாம். ஆபரேஷன் சிந்தூர் நடவடிக்கையின்போது, பிரம்மோஸ் ஏவுகணை தாக்குதலின் முன்னோட்டத்தை நாம் பார்த்தோம்.”
இவ்வாறு இந்திய பாதுகாப்பு அமைச்சர் ராஜ்நாத் சிங் தெரிவித்தார்.
பிரம்மேஸ் ஏவுகணை தயாரிப்பு மையம் உத்தர பிரதேசம் லக்னோவில் கடந்த மே மாதம் தொடங்கப்பட்டது. இங்கு தயாரிக்கப்பட்ட முதல் ஏவுகணை யூனிட்டை பாதுகாப்புத்துறை அமைச்சர் ராஜ்நாத் கொடியசைத்து தொடங்கி வைத்தார்.
இந்நிகழ்வில் உரையாற்றுகையிலேயே அவர் மேற்கண்டவாறு தெரிவித்தார்.
” நாட்டின் பாதுகாப்பு மற்றும் நம்பிக்கை வளர்ச்சியில் இது முக்கியமான நடவடிக்கை. பிரம்மோஸ் ஏவுகணை வெறும் ஆயுதம் மட்டும் அல்ல. இது உள்நாட்டு திறனின் அடையாளம். தரைப்படை, கடற்படை மற்றும் விமானப்படையின் முதுகெலும்பாக பிரம்மோஸ் ஏவுகணை விளங்குகிறது.
பாகிஸ்தான் முழுவதும் பிரம்மோஸ் வரம்புக்குள் உள்ளது. அந்த நாட்டின் எந்த பகுதியையும் தாக்கலாம். ஆபரேஷன் சிந்தூர் நடவடிக்கையின்போது, பிரம்மோஸ் ஏவுகணை தாக்குதலின் முன்னோட்டத்தை நாம் பார்த்தோம்.
பிரம்மோஸ் ஏவுகணைக்கு உலகம் முழுவதும் வரவேற்பு உள்ளது. பிலிப்பைன்ஸ் நாட்டுக்கு பிரம்மோஸ் ஏவுகணை விற்பனை செய்தபின் 4,000 கோடி ரூபா மதிப்பில் பிரம்மோஸ் ஏவுகணை வாங்க இரண்டு நாடுகள் ஒப்பந்தம் செய்துள்ளன. உலகம் முழுவதும் இருந்து நிபுணர்கள், லக்னோ வருவதால், பாதுகாப்பு தளவாட வரைபடத்தில் லக்னோ இடம்பிடித்துள்ளது. 2047-ம் ஆண்டுக்குள் வளர்ந்த நாடு என்ற இலக்கை அடைய, பிரம்மோஸ் ஏவுகணை போன்ற திட்டங்கள் மிக முக்கியமானது எனவும் இந்திய பாதுகாப்பு அமைச்சர் தெரிவித்தார்.
