மலையகத் தமிழ் மக்களின் உரிமைக்காகவும், தொழிலாளர் வர்க்கத்தின் முன்னேற்றத்திற்காகவும் தனது வாழ்நாள் முழுவதையும் அர்ப்பணித்த மலையகத்தின் பெருந்தலைவர் அமரர் சௌமியமூர்த்தி தொண்டமானின் 27ஆவது சிரார்த்த தினம் இன்று (30) அனுஷ்டிக்கப்படுகின்றது.
1913ஆம் ஆண்டு ஆகஸ்ட் மாதம் 30ஆம் திகதி பிறந்த அமரர் சௌமியமூர்த்தி தொண்டமான், மலையக அரசியல் வரலாற்றில் அழியாத தடம் பதித்த தலைவராவார். இலங்கையில் வாழ்ந்த இந்திய வம்சாவளித் தமிழர்களின் உரிமைகள், குடியுரிமை மற்றும் அரசியல் பிரதிநிதித்துவத்தை உறுதிப்படுத்துவதற்காக அவர் ஆற்றிய பங்களிப்பு வரலாற்று முக்கியத்துவம் வாய்ந்ததாகும்.
தோட்டத் தொழிலாளர்களின் உரிமைகளுக்காகத் தொடர்ந்து குரல்கொடுத்த அவர், மலையக மக்களின் வாழ்வாதாரம், சமூக அந்தஸ்து மற்றும் அரசியல் உரிமைகளை மேம்படுத்துவதில் அரும்பணியாற்றினார். மலையக மக்களால் இன்றும் பெருந்தலைவராகப் போற்றப்படும் அவர், மக்களின் நம்பிக்கையையும் தன்னம்பிக்கையையும் வளர்த்தெடுத்த அரசியல் ஆளுமையாகத் திகழ்ந்தார்.
1947ஆம் ஆண்டின் குடியுரிமைச் சட்டத்தின் விளைவாகப் பெருமளவிலான மலையகத் தமிழர்கள் குடியுரிமையையும் வாக்குரிமையையும் இழந்த சூழலில், அவர்களின் உரிமைகளை மீட்டெடுப்பதற்காக அமரர் சௌமியமூர்த்தி தொண்டமான் பல்வேறு போராட்டங்களையும் அரசியல் நடவடிக்கைகளையும் முன்னெடுத்தார்.
குறிப்பாக, 1980களில் குடியுரிமைப் பிரச்சினைக்குத் தீர்வுகாண்பதற்காக அவர் மேற்கொண்ட அரசியல் முயற்சிகள் முக்கியத்துவம் பெற்றன. இதன் மூலம் மலையக மக்களின் குடியுரிமை மற்றும் வாக்குரிமையை மீளப் பெற்றுக்கொடுப்பதில் அவர் குறிப்பிடத்தக்க பங்காற்றினார். இன்று மலையக மக்களின் அரசியல் பிரதிநிதித்துவம் தொடர்வதற்கும், அவர்கள் நாடாளுமன்றம், மாகாண சபைகள் மற்றும் உள்ளூராட்சி மன்றங்களில் தமது பிரதிநிதிகளைத் தெரிவுசெய்வதற்கும் வழிவகுத்த வரலாற்றுப் போராட்டங்களில் அவரது பங்களிப்பு மறக்க முடியாததாகும்.
தொழிலாளர் வர்க்கத்தின் நலன்களையும் அபிலாஷைகளையும் தேசிய மற்றும் சர்வதேச மட்டங்களில் வெளிப்படுத்துவதிலும் அவர் உறுதியுடன் செயற்பட்டார். இலங்கைத் தொழிலாளர் காங்கிரஸின் ஊடாகத் தோட்டத் தொழிலாளர்களை ஒன்றிணைத்து, அவர்களின் உரிமைகள் மற்றும் சமூக முன்னேற்றத்திற்காகத் தொடர்ச்சியாகக் குரல்கொடுத்தார்.
அதேவேளை, தொழிலாளர் உரிமைகளை சர்வதேச அரங்கில் முன்னிறுத்துவதிலும், சர்வதேச தொழிலாளர் அமைப்புகளுடன் தொடர்புகளை வலுப்படுத்துவதிலும் அவர் பங்களிப்புச் செய்தார். தொழிலாளர் வர்க்கத்தின் பிரதிநிதியாக சர்வதேச தொழில் மாநாடுகளில் பங்கேற்று, தொழிலாளர்களின் உரிமைகள் மற்றும் நலன்கள் தொடர்பான விடயங்களை உலகளாவிய மட்டத்தில் எடுத்துரைத்தார்.
வசதி வாய்ப்புகளுடன் வாழக்கூடிய சூழல் இருந்தபோதிலும், தனது மக்களின் துயரங்களையும் பிரச்சினைகளையும் தீர்ப்பதற்கே அவர் முன்னுரிமை அளித்தார். தோட்டத் தொழிலாளர்கள் எதிர்கொண்ட சமூக மற்றும் பொருளாதார ஒடுக்குமுறைகளுக்கு எதிராகப் போராடி, அவர்கள் கண்ணியத்துடனும் உரிமைகளுடனும் வாழ்வதற்கான பாதையை உருவாக்குவதில் அர்ப்பணிப்புடன் செயற்பட்டார்.
மலையக மக்களிடையே அரசியல் விழிப்புணர்வையும் ஒற்றுமையையும் வளர்த்தெடுத்து, அவர்களின் உரிமைகளுக்காகத் தனித்துவமான அரசியல் அமைப்பாக இலங்கைத் தொழிலாளர் காங்கிரஸை வலுப்படுத்தியதும் அவரது முக்கிய பங்களிப்புகளில் ஒன்றாகும். தோட்டத் தொழிலாளர்களின் பிரச்சினைகளைத் தேசிய அரசியல் அரங்கில் தொடர்ந்து முன்வைப்பதற்கான வலுவான தளத்தை அவர் உருவாக்கினார்.
அமரர் சௌமியமூர்த்தி தொண்டமான், 1999ஆம் ஆண்டு அக்டோபர் மாதம் 30ஆம் திகதி தனது 86ஆவது வயதில் காலமானார். அவர் மறையும் காலப்பகுதியில் இலங்கைத் தொழிலாளர் காங்கிரஸின் தலைவராகவும், அமைச்சராகவும் செயற்பட்டார்.
அவரது அரசியல் பயணம் மலையக மக்களின் உரிமைப் போராட்ட வரலாற்றுடன் பின்னிப் பிணைந்துள்ளது. தொழிலாளர்களின் வாழ்வாதாரத்தை மேம்படுத்துதல், குடியுரிமையை உறுதிப்படுத்துதல், அரசியல் பிரதிநிதித்துவத்தை வளர்த்தெடுத்தல் மற்றும் சமூக அந்தஸ்தை உயர்த்துதல் ஆகிய துறைகளில் அவர் ஆற்றிய பங்களிப்புகள் இன்றும் நினைவுகூரப்படுகின்றன.
எதிர்காலச் சந்ததியினர் சமாதானத்துடனும் சகோதரத்துவத்துடனும் வாழ வேண்டும் என்ற உயரிய சிந்தனையை வலியுறுத்திய அவர், இனங்களுக்கிடையிலான நல்லுறவையும் ஒற்றுமையையும் கட்டியெழுப்புவதன் அவசியத்தையும் எடுத்துரைத்தார்.
மலையக மக்களின் அரசியல் உரிமைகளுக்காகப் போராடிய முன்னோடிகளில் ஒருவராகவும், தொழிலாளர் வர்க்கத்தின் குரலாகவும் திகழ்ந்த அமரர் சௌமியமூர்த்தி தொண்டமானின் சேவைகளும் தியாகங்களும் மலையக வரலாற்றில் என்றும் நிலைத்திருக்கும்.
– பெருமாள் கோபிநாத்
ஊடகப் பிரிவு
இலங்கைத் தொழிலாளர் காங்கிரஸ்
