உடலில் இறுதிமூச்சு இருக்கும்வரை மலையக மக்களுக்காக உழைப்பேன் – என்று தொழிலாளர் தேசிய சங்கத்தின் தலைவரும், ஐக்கிய மக்கள் சக்தியின் நுவரெலியா மாவட்ட வேட்பாளருமான பழனி திகாம்பரம் தெரிவித்தார்.
தேர்தல் பிரச்சாரக்கூட்டமொன்றில் கலந்துகொண்டு உரையாற்றுகையிலேயே அவர் இவ்வாறு கூறினார்.
” பெட்டும், போலையும் கொடுத்து எமது இளைஞர்களை ஏமாற்றுவதற்கு சிலர் முயற்சிக்கின்றனர். மேலும் சிலர் கனவுகளைப்பற்றி கதைக்கின்றனர். ஆனால், கனவை நிறைவேற்றியது தமிழ் முற்போக்கு கூட்டணிதான்.
ஜனாதிபதி தேர்தலில் சஜித் பிரேமதாச வெற்றிபெற்று எமது ஆட்சி தொடர்ந்திருந்தால் , ஒவ்வொரு தோட்டங்களுக்கும் 50 வீடுகள் வந்திருக்கும். எமது அமைச்சு பறிபோனதால் வேலைத்திட்டங்களும் முடக்கப்பட்டன.
எனவே, எமது வேலைத்திட்டங்களை தொடர்ந்தும் முன்னெடுப்பதற்கு மக்கள் அங்கீகாரம் வழங்கவேண்டும். நான் இருக்கும்வரை நீங்கள் எதற்கும் அஞ்சவேண்டாம். உயிர் இருக்கும்வரை உங்களுக்காக உழைப்பேன். 5 ஆம் திகதிக்கு பின்னர் நானே அமைச்சர்.” – என்றும் திகாம்பரம் தெரிவித்தார்.
