” பொதுத்தேர்தலில் பதுளை மாவட்டத்தில் எனது முதல்நிலை வெற்றியை உறுதிப்படுத்திக் கொடுத்த எனது தொப்புள் கொடி உறவுகள் அனைவருக்கும் எனது சிரம் தாழ்த்திய, உணர்வுப் பூர்வமான நன்றிகளைத் தெரிவித்துக் கொள்கின்றேன்.” – என்று வடிவேல் சுரேஸ் தெரிவித்தார்.
அவரது இல்லத்தில் நடைபெற்ற ஆதரவாளர்கள் சந்திப்பின்போதே இவ்வாறு கூறினார். இது தொடர்பில் அவர் மேலும் கூறியதாவது,
“ எனதும், அண்ணன் அரவிந்தகுமாரின் வெற்றிகளைத் தடுப்பதற்கு பல்வேறு வகையில் மேலினவாதிகளை விட எம்மவர்களே பாரிய பிரயத்தனங்களை மேற்கொண்டிருந்தனர். ஒப்பந்த அடிப்படையில் சுயேச்சைக் குழுக்களை பேரினவாதிகள் களம் இறக்கியிருந்தனர்.
குறிப்பாக எம்மிருவரது வெற்றியைத் தடுப்பதற்கான அனைத்து முயற்சிகளும் மேற்கொள்ளப்பட்டன. ஆனால், அம் முயற்சிகள் அனைத்தையும் எனது தொப்புள் கொண்டி உறவுகள் முறியடித்து, எம்மிருவரையும் முதல் நிலையிலேயே, வெற்றியடைய வைத்தனர். அத்துடன், எமக்கு எதிராக செயற்பட்ட அனைவரையும் மண் கவ்வச் செய்தார்கள்.
எமது வெற்றியைத் தடுப்பதற்கு செயற்பட்ட சுயேச்சைக் குழுக்களுக்கு தகுந்த பாடத்தினை எமது உறவுகள் புகட்டிவிட்டனர். அக் குழுக்கள் ஏற்பட்ட பாரிய பின்னடைவிலிருந்து அவர்களினால் மீளவே முடியாது. அந்தளவில் எமது மக்களின் செயற்பாடுகள் அமைந்துவிட்டன.
எமது நாட்டின் பிரதான தேசியக் கட்சியொன்றில் சிறுபான்மையினத்தாரின் பெறுமதி மிக்க வாக்குகளினால் முதல் நிலையில் தமிழர்கள் இருவருமே வெற்றிபெற, எம்மக்கள் பூரண பங்களிப்புக்களை வழங்கினர்.
நான் 49 ஆயிரத்து எழுநூற்று அறுபத்தி இரண்டு வாக்குகளைப் பெற்று முதல் நிலையில் வெற்றி பெற்றதுடன் எனக்கு அடுத்த படியாக 45 ஆயிரத்து நானூற்று தொன்னூற்று ஒரு வாக்குகளை, அண்ணன் அரவிந்தகுமாரும் பெற்றுள்ளார். இதனை எம்மால் என்றுமே மறக்க முடியாது.
அத்துடன் ரணில் விக்கிரமசிங்கவின் கட்சியையும் நாட்டு மக்கள் அனைவருமே, புறக்கணித்து விட்டனர். இதற்கு பின்பும் ரணில் விக்கிரமசிங்க மற்றும் அவரது குழுவினரால், எம்மை ஆட்டிப் படைக்க முடியாது.
ஶ்ரீகொத்தவை ஐக்கிய மக்கள் சக்தியிடம் ஒப்படைக்க வேண்டும். அத்துடன் இலங்கை தேசிய தோட்டத் தொழிலாளர் சங்கத்தையும் எமது பொறுப்பில் விடப்படல் வேண்டும். தவறின் ஜனநாயக ரீதியிலான பாரிய எதிர் விளைவுகளை ரணில் விக்கிரமசிங்கவுவும், அவரது குழுவினரும் அனுபவிக்க நேரிடும்.” – என்றார்.
