” எதிரணியின் நம்பிக்கையை சபாநாயகர் இழந்துவிட்டார். ஆளுங்கட்சியின் ஆலோசனையின் பிரகாரம் செயற்படாது முதுகெலும்புடன் நடுநிலையாக செயற்பட்டு உரிய தீர்வை வழங்குமாறு வலியுறுத்துகின்றோம். அவ்வாறு இல்லாவிட்டால் சபாநாயகர் பதவிக்கு தற்போதைய சபாநாயகர் பொருத்தமற்றவராகவே இருப்பார்.” – என்று எதிர்க்கட்சித் தலைவர் சஜித் பிரேமதாச தெரிவித்தார்.
இது தொடர்பில் அவர் மேலும் கூறியவை வருமாறு,
” ஐக்கிய மக்கள் சக்தி எம்.பிக்களுக்கு எதிராக ஆளுங்கட்சி வன்முறையைக் கையில் எடுத்துள்ளது. எமது கட்சி உறுப்பினர் மனுஷ நாணயக்கார அச்சுறுத்தப்பட்டு தாக்கப்பட்டுள்ளார். உடல் ரீதியாக அவருக்கு பாதிப்பை ஏற்படுத்துவதற்கு அமைச்சர்களும், ஆளுங்கட்சி உறுப்பினர்களும் முற்பட்டுள்ளனர்.
ஆனால் இது தொடர்பில் சபாநாயகர் மௌனம் காக்கின்றார். எமது பாதுகாப்பு தொடர்பில் உத்தரவாதம் வழங்காமல் உள்ளார். நாடாளுமன்ற உறுப்பினர்களின் பாதுகாப்பை உறுதிப்படுத்த வேண்டியது சபாநாயகரின் பொறுப்பு. அந்த பொறுப்பை நிறைவேற்றாதவராகவே தற்போதைய சபாநாயகர் இருக்கின்றார்.
மனுஷ நாணயக்காரமீது தாக்குதல் நடத்துவதற்கு ஆளுங்கட்சியில் இருந்து எதிரணி பக்கம் வந்த அமைச்சர்கள் உட்பட ஆளுங்கட்சியினருக்கு எதிராக உரிய நடவடிக்கை எடுக்கப்படவேண்டும். அவ்வாறு நடவடிக்கை எடுத்து தனது பொறுப்பை சபாநாயகர் நிறைவேற்ற வேண்டும்.
சபாநாயகர் என்பவர் நடுநிலையாக செயற்படவேண்டியவர். தற்போதைய சபாநாயகர் எதிரணியின் நம்பிக்கையை இழந்துவிட்டார். பெரும்பான்மை பலத்தை பயன்படுத்தி எமது குரலை நசுக்கு முற்படும் அரச வன்முறையாளர்களுக்கு அஞ்சமாட்டோம். ஜனநாயகத்துக்காக போராடுவோம். எனவே, சபாநாயகரும் முதுகெலும்புடன் செயற்பட வேண்டும். – என்றார்.
