பெருந்தோட்ட சேவையாளர் காங்கிரஸின் பொதுச்செயலாளராக மூத்த தொழிற்சங்கவாதி பொ. சிவராஜா நியமிக்கப்பட்டுள்ளார்.
இவர் 1972 ம் ஆண்டு அமரர் சௌமியமூர்த்தி தொண்டமான் காலந்தொட்டு அவரது அமைச்சின் பொதுஜன தொடர்பு அதிகாரியாக, பிரத்தியேகச் செயலாளராக, தொழிற்சங்கத்தில் நிருவாகச் செயலாளராக, உபதலைவராக என பல பதவிகளை வகித்தார்.
1999ஆம் ஆண்டு அமரர் ஆறுமுகன் தொண்டமான் அமைச்சராக இருந்த காலத்தில் கால்நடை அபிவிருத்தி தோட்ட உட்கட்டமைப்பு அமைச்சின் ஊடாக லங்கா லிபியன் நிறுவனத்தின் தலைவராக சிறிதுகாலம் பணியாற்றினார்.
2005ஆம் ஆண்டு தொடக்கம் 2009ஆம் வரையிலும் நுவரெலியா மாநகர சபையின் பிரதிமேயராக செயலாற்றினார். அதன் பின்னர் 2007 தொடக்கம் 2014ம் ஆண்டு வரை முன்னாள் ஊவா மாகாணசபை அமைச்சர் செந்தில் தொண்டமானின் பிரத்தியேகச் செயலாளராக பணியாற்றினார் என்பதும் குறிப்பிடத்தக்கது.
பிரதியமைச்சராக முத்து சிவலிங்கம் கடமையாற்றும் பொழுது அவரது பிரத்தியேகச் செயலாளராக செயற்பட்டார். மனித வள அபிவிருத்தி நிதியத்தின் பணிப்பாளர் சபையின் பணிப்பாளராகவும் சேவையை முன்னெடுத்தார் என்பதும் குறிப்பிடத்தக்கது.
