கண்டி, தெல்தெனிய மருத்துவமனைக்கு அருகில் வாகனம் ஒன்றில் இருந்து இளம் பெண் ஒருவரின் சடலம் மீட்கப்பட்ட சம்பவம் தொடர்பில் நுவரெலியா பொலிஸார் விசாரணைகளை ஆரம்பித்துள்ளனர்.
உயிரிழந்த பெண் அதற்கு முந்தைய நாள் (ஜூன் 16ஆம் திகதி ) நுவரெலியாவில் உள்ள சுற்றுலா ஹோட்டல் ஒன்றில் தனது காதலனுடன் தங்கியிருந்ததாகக் கிடைத்த தகவலின் அடிப்படையில் இந்த விசாரணை முடுக்கிவிடப்பட்டுள்ளது.
வெலிகம பகுதியைச் சேர்ந்த, அம்பாறை மருத்துவமனையில் பிசியோதெரபிஸ்டாக (Physiotherapist) பணிபுரிந்து வந்த பி.ஆர். ஷியாமா தர்ஷனி (33) என்ற பெண்ணே இவ்வாறு சடலமாக மீட்கப்பட்டுள்ளார்.
இவர் கன்னொருவ பகுதியைச் சேர்ந்த தனது காதலனுடன் கடந்த 2026 ஜூன் 3ஆம் திகதி முதல் நுவரெலியாவில் உள்ள தனியார் சுற்றுலா ஹோட்டல் ஒன்றில் தங்கியிருந்ததாக பொலிஸார் சந்தேகிக்கின்றனர்.
இருவருக்கும் இடையே ஏற்பட்ட தகராறை அடுத்து அந்தப் பெண் கொலை செய்யப்பட்டிருக்கலாம் என்றும், அதன் பின்னர் அவரது சடலம் வாகனத்தில் எடுத்துச் செல்லப்பட்டு தெல்தெனிய மருத்துவமனைக்கு அருகில் கைவிடப்பட்டிருக்கலாம் என்றும் விசாரணையாளர்கள் நம்புகின்றனர்.
பாதுகாப்பு கேமரா (CCTV) காட்சிகளின்படி, அந்தப் பெண்ணின் முகம் மூடப்பட்ட நிலையில் அவரது காதலனால் ஹோட்டலில் இருந்து வெளியே தூக்கிச் செல்லப்படுவதைக் காட்டுவதாக பொலிஸ் வட்டாரங்கள் தெரிவித்துள்ளன.
இவ்விசாரணையில் ஈடுபட்டுள்ள சிரேஷ்ட பொலிஸ் அதிகாரி ஒருவர் கூறுகையில், நுவரெலியா பொலிஸார் தெல்தெனிய பொலிஸாருடன் இணைந்து மேலதிக தகவல்களைப் பெற்று, கிடைக்கப்பெற்ற ஆதாரங்களின் அடிப்படையில் விசாரணைகளைத் தொடர்ந்து முன்னெடுத்து வருவதாகத் தெரிவித்தார்.
