இலங்கைக்கு எதிரான முதலாவது ஒருநாள் சர்வதேச கிரிக்கெட் போட்டியில் ODI , வில் ஜாக்ஸின் (Will Jacks) அசாத்திய திறமையால் இங்கிலாந்து அணி 89 ரன்கள் வித்தியாசத்தில் அபார வெற்றி பெற்றது. இதன் மூலம் 3 போட்டிகள் கொண்ட ஒருநாள் தொடரில் இங்கிலாந்து 1-0 என முன்னிலை பெற்றுள்ளது.
டர்ஹாமில் நடைபெற்ற இப்போட்டியில் பேட்டிங் மற்றும் பந்துவீச்சு என இரண்டிலும் கலக்கிய வில் ஜாக்ஸ், ஆட்டமிழக்காமல் 47 பந்துகளில் 46 ரன்கள் குவித்ததுடன், பந்துவீச்சில் 22 ரன்களை மட்டுமே விட்டுக்கொடுத்து 5 விக்கெட்டுகளைக் கைப்பற்றித் தனது வாழ்நாளின் சிறந்த பந்துவீச்சை பதிவு செய்தார்.
நாணய சுழற்சியில் வெற்றி பெற்று முதலில் பேட்டிங்கைத் தேர்வு செய்த இங்கிலாந்து அணிக்கு, அணித்தலைவர் ஹரி புரூக் (Harry Brook) 69 பந்துகளில் 67 ரன்கள் எடுத்து அதிகபட்ச ரன் குவிப்பாளராகத் திகழ்ந்தார்.
இருப்பினும், அறிமுக வீரர் சச்சிந்து கொலம்பகேவின் (3-44) திறமையான பந்துவீச்சால் நடுவரிசை தடுமாறியதை அடுத்து, இங்கிலாந்து அணி 48.1 ஓவர்களில் 265 ரன்களுக்கு ஆட்டமிழந்தது.
தொடர்ந்து 266 ரன்கள் என்ற இலக்கை நோக்கிப் பதிலளித்த இலங்கை அணியை, இங்கிலாந்து பந்துவீச்சாளர்கள் சீரான இடைவெளியில் விக்கெட்டுகளை வீழ்த்தித் திணறடித்தனர்.
இறுதியில் வில் ஜாக்ஸ் வீசிய கடைசி ஓவரில் மூன்று விக்கெட்டுகள் வீழ, இலங்கை அணி 37 ஓவர்களில் 176 ரன்களுக்கு அனைத்து விக்கெட்டுகளையும் இழந்து தோல்வியடைந்தது.
