மகளின் மரணம் தந்த வலியில் இருந்து மீள முடியவில்லை: பதவி துறந்த ஜெர்மன் அமைச்சர்

ஜெர்மனியின் தொழிலாளர் துறை அமைச்சரும், மத்திய இடதுசாரி கட்சியான எஸ்.பி.டி (SPD)-யின் இணைத் தலைவருமான பார்பெல் பாஸ் Baerbel Bas , தனது வளர்ப்பு மகளின் மரணம் மற்றும் தனக்கு எதிரான அரசியல் தாக்குதல்கள் அதிகரித்து வருவதைக் காரணம் காட்டி திங்கள்கிழமை தனது பதவிகளை ராஜினாமா செய்தார்.

இது சான்செலர் பிரைட்ரிக் மெர்ஸின் கூட்டணி அரசுக்கு பெரும் பின்னடைவாகக் கருதப்படுகிறது.

“எனது வளர்ப்பு மகளின் மரணத்திற்குப் பிறகு, எனது துக்கத்திலிருந்து மீள்வதற்கு எனக்குக் காலம் தேவை என்பதை உணர்ந்தேன்” என்று Baerbel Bas தனது அறிக்கையில் தெரிவித்தார்.

ஜெர்மனியின் நலவாழ்வுத் திட்டங்களின் பெரும்பகுதியைக் கண்காணிக்கும் அமைச்சகத்தைக் கவனித்து வந்த பாஸ், தனது கூட்டணிக் கட்சியான கன்சர்வேடிவ் சி.டி.யூ/சி.எஸ்.யூ (CDU/CSU) உறுப்பினர்கள் உட்பட பலரிடமிருந்து தொடர்ந்து பொதுத் தாக்குதல்களை எதிர்கொள்ள நேர்ந்ததாகவும் குறிப்பிட்டார்.

எஸ்.பி.டி கட்சியின் மற்றொரு இணைத் தலைவரும், துணைச் சான்செலருமான லார்ஸ் கிளிங்பீல் தனது அறிக்கையில், “அவர் துக்கத்திலிருந்த கடந்த நாட்களில் அவருக்கு எதிராகத் தொடுக்கப்பட்ட தாக்குதல்கள் முறையற்றவை. அது ஏற்றுக்கொள்ள முடியாதது” என்றார்.

இந்தியாவுக்குத் திங்கள்கிழமை தொடங்கவிருந்த தனது திட்டமிட்ட பயணத்தை ரத்து செய்வதாக கிளிங்பீலின் நிதியமைச்சகம் அறிவித்துள்ளது.

எஸ்.பி.டி கட்சியின் இணைத் தலைவராக பாஸுக்குப் பிறகு யார் பொறுப்பேற்பார்கள் என்பது இன்னும் தெளிவாகத் தெரியவில்லை. எவ்வாறாயினும், தான் நாடாளுமன்ற உறுப்பினர் பதவியில் தொடர்வதாக பாஸ் தெரிவித்தார்.