இலங்கை விரும்பும் பொருத்தமான எந்தவொரு வழியிலும் தொடர்ந்து ஆதரவளிக்க சர்வதேச நாணய நிதியம் (IMF) தயாராக உள்ளதாக, அதன் ஆசிய மற்றும் பசிபிக் திணைக்களத்தின் துணைப் பணிப்பாளர் சொனாலி ஜெயின்-சந்திரா தெரிவித்துள்ளார்.
பெங்கொக்கில் நடைபெற்ற சர்வதேச நாணய நிதியக் கூட்டத்தின்போது இடம்பெற்ற ஊடகவியலாளர் சந்திப்பில் உரையாற்றிய அவர், இலங்கையின் பேரண்டப் பொருளாதார நிலைமை பெருமளவில் மேம்பட்டுள்ளதாகக் குறிப்பிட்டார்.
இலங்கையின் நிதிச் செயல்திறன் வலுவடைந்துள்ளதுடன், கடன் மறுசீரமைப்புப் பணிகளும் பெரும்பாலும் நிறைவடைந்துள்ளதாக அவர் தெரிவித்தார். மேலும், ஆளுகை உள்ளிட்ட கட்டமைப்பு சார்ந்த முக்கிய விடயங்களிலும் குறிப்பிடத்தக்க முன்னேற்றங்கள் ஏற்பட்டுள்ளதாகக் குறிப்பிட்டார்.
இந்த மாத ஆரம்பத்தில், விரிவாக்கப்பட்ட நிதி வசதித் திட்டத்தின் (Extended Fund Facility) கீழ் ஏழாவது மீளாய்வு தொடர்பில் இலங்கையுடன் சர்வதேச நாணய நிதியம் ஊழியர் மட்ட உடன்பாட்டை எட்டியது. இதன் மூலம் சுமார் 345 மில்லியன் அமெரிக்க டொலர் நிதியுதவியை இலங்கை பெற்றுக்கொள்ள வழிவகுக்கும்.
குறித்த மீளாய்வு நிறைவடைந்ததும், சர்வதேச நாணய நிதியத்தின் சிறப்பு வரைபட உரிமைகளுக்கு (SDR) சமமான சுமார் 345 மில்லியன் அமெரிக்க டொலர்களை இலங்கை பெற்றுக்கொள்ள முடியும்.
இந்த உடன்படிக்கை எதிர்வரும் வாரங்களில் சர்வதேச நாணய நிதியத்தின் நிர்வாகக் குழுவின் பரிசீலனைக்கு உட்படுத்தப்படும் என சொனாலி ஜெயின்-சந்திரா தெரிவித்துள்ளார்.
மேலும், மார்ச் மாதத்தில் தற்போதைய திட்டம் நிறைவடைவதற்கு முன்னர் மற்றொரு மீளாய்வுக் குழு இலங்கைக்கு விஜயம் செய்யும் என்றும் அவர் குறிப்பிட்டார்.
தற்போதைய உடன்படிக்கைக்கு மேலதிகமாக, புதிய நிதி ஏற்பாடுகள், கண்காணிப்பு மற்றும் திறன் மேம்பாடு சார்ந்த கொள்கை ஆலோசனைகள் உள்ளிட்ட பல்வேறு வழிகளில் இலங்கை அதிகாரிகளுடன் தொடர்ந்து இணைந்து பணியாற்ற சர்வதேச நாணய நிதியம் தயாராக இருப்பதாகவும் அவர் மேலும் தெரிவித்துள்ளார்.
