தோள்பட்டை காயம் காரணமாக மேற்கிந்திய தீவுகளுக்கு எதிரான தொடரைத் தீர்மானிக்கும் ஐந்தாவது T20 போட்டியில் அர்ஷ்தீப் சிங் பங்கேற்பது சந்தேகத்திற்கு இடமாகியுள்ளது.
இதையடுத்து, பிரக்யான் ஓஜா தலைமையிலான இடைக்காலத் தேர்வுக் குழு, வேகப்பந்து வீச்சுப் பிரிவுக்குக் கூடுதல் பலம் சேர்க்க புவனேஷ்வர் குமாரை இந்திய அணியில் சேர்த்துள்ளது.
முன்னதாக, 2022 நவம்பரில் இந்திய அணிக்காகக் கடைசிப் போட்டியில் விளையாடியிருந்த புவனேஷ்வர் குமார், வரவிருக்கும் நியூசிலாந்து சுற்றுப்பயணத்திற்கான T20 தொடருக்குக் கடந்த வாரம் மீண்டும் அழைக்கப்பட்டிருந்தார்.
ஹைதராபாத்தில் நடைபெற்ற நான்காவது T20 போட்டியின் போது, இந்தியாவின் சேஸிங்கின் இறுதியில் பேட்டிங் செய்துகொண்டிருந்த அர்ஷ்தீப் சிங், ஷமர் ஜோசப் வீசிய பந்தில் பைகேப்ஸ் பகுதியில் அடிபட்டதால் காயம் அடைந்தார்.
அந்தப் பந்து போட்டியின் கடைசிப் பந்தாக அமைந்த நிலையில், அர்ஷ்தீப் சிங் காயத்தால் களத்தில் இருந்து வெளியேறினார் (retired hurt). பிசிசிஐ (BCCI) வெளியிட்டுள்ள செய்திக் குறிப்பில், “அவரது உடல்தகுதி மீட்சியின் அடிப்படையில், போட்டியில் அவர் பங்கேற்பது குறித்துப் போட்டியின் தொடக்கத்திற்கு முன்பாக முடிவு எடுக்கப்படும்” எனத் தெரிவிக்கப்பட்டுள்ளது.
இதற்கிடையில், புவனேஷ்வர் குமார் கடந்த வாரம் உடல்தகுதி மதிப்பீட்டிற்காக பெங்களூருவில் உள்ள சிறப்பமைவு மையத்தில் (Centre of Excellence) அனுமதிக்கப்பட்டார். அன்றிலிருந்து அவர் நியூசிலாந்து டி20 தொடருக்கான ஆயத்தமாகப் பந்துவீச்சுப் பயிற்சிகளை தீவிரப்படுத்தி வருகிறார். அவர் கடைசியாக கடந்த செப்டம்பரில் நடைபெற்ற யுபி டி20 லீக்கில் (UPT20 League) விளையாடியிருந்தார்.
இந்த சீசனின் தொடக்கத்தில் தேர்வு தொடர்பான கவலைகளில் இருந்து முற்றிலும் விலகி இருப்பதாகக் கூறியிருந்த புவனேஷ்வர் குமார், ராயல் சேலஞ்சர்ஸ் பெங்களூரு (RCB) அணிக்காகத் தொடர்ந்து சாம்பியன் பட்டம் வென்ற சீசன்களில் வெளிப்படுத்திய மிகச்சிறந்த ஐபிஎல் செயல்பாடுகளின் அடிப்படையில் மீண்டும் இந்திய அணிக்குத் திரும்பியுள்ளார்.
ஐபிஎல் 2026-இல் 16 போட்டிகளில் 28 விக்கெட்டுகளை வீழ்த்திய புவனேஷ்வர், பர்பிள் தொப்பியை வென்ற ககிசோ ரபாடாவுக்கு அடுத்தபடியாக அதிக விக்கெட்டுகளை வீழ்த்தியவர்கள் பட்டியலில் இரண்டாம் இடம் பிடித்தார்.
வரும் ஞாயிற்றுக்கிழமை நியூசிலாந்து புறப்படவுள்ள டி20 அணியிலும் அர்ஷ்தீப் சிங் இடம்பெற்றுள்ளார். பிரசித் கிருஷ்ணா மற்றும் ஹர்ஷித் ராணா உள்ளிட்ட பிற வேகப்பந்து வீச்சாளர்களின் காயங்கள் காரணமாக ஒருநாள் போட்டிகளுக்கான அணியைத் தேர்வு செய்வதில் இந்தியத் தேர்வாளர்கள் கவனம் செலுத்தி வரும் வேளையில் இவருக்கு இக்காயம் ஏற்பட்டுள்ளது. தற்போதைய நிலவரப்படி, அதைத் தொடர்ந்து நடைபெறும் இரண்டு போட்டிகள் கொண்ட டெஸ்ட் தொடருக்குத் தயாராவதற்காக, நியூசிலாந்துடனான ஒருநாள் தொடரிலிருந்து அணியின் சில உறுப்பினர்கள் முன்னதாகவே விடுவிக்கப்படவும் வாய்ப்புள்ளது.
மேற்கு இந்தியத் தீவுகளுக்கு எதிரான நான்கு T20 போட்டிகளிலும் விளையாடியுள்ள அர்ஷ்தீப், ஐந்து விக்கெட்டுகளைக் கைப்பற்றியுள்ளார்.
புவனேஷ்வர் மற்றும் அர்ஷ்தீப் தவிர, மயங்க் யாதவ் மற்றும் பிரின்ஸ் யாதவ் ஆகியோர் மட்டுமே அணியில் உள்ள பிற முதன்மை வேகப்பந்து வீச்சாளர்கள் ஆவர்; அதேவேளை நிதிஷ் குமார் ரெட்டி மற்றும் சிவம் துபே ஆகியோர் மிதவேகப்பந்து வீச்சு ஆல்-ரவுண்டர்களாக இடம்பெற்றுள்ளனர்.
மேற்கு இந்தியத் தீவுகளுக்கு எதிரான 5ஆவது T20 போட்டிக்கான இந்திய அணி
ஸ்ரேயாஸ் ஐயர் (கேப்டன்), அபிஷேக் சர்மா, வைபவ் சூர்யவன்ஷி, இஷான் கிஷன் (விக்கெட் கீப்பர்), சஞ்சு சாம்சன் (விக்கெட் கீப்பர்), திலக் வர்மா, சிவம் துபே, குல்தீப் யாதவ், அக்சர் படேல், ரவி பிஷ்னோய், நிதிஷ் குமார் ரெட்டி, அர்ஷ்தீப் சிங், பிரின்ஸ் யாதவ், மயங்க் யாதவ், நமன் தீர், புவனேஷ்வர் குமார்.
5 போட்டிகளை கொண்ட T -20 தொடரில் இரு அணிகளும் தலா இரு வெற்றிகளைப் பெற்றுள்ளது. தொடரின் வெற்றியை தீர்மானிக்கும் போட்டி நாளை (17) நடைபெறவுள்ளது.
