பலுசிஸ்தானின் குஜ்தார் மாவட்டத்தில் இரண்டு மாணவர்களை பாகிஸ்தான் படைகளால் வலுக்கட்டாயமாக கடத்திச் சென்றதை அடுத்து, உள்ளூர்வாசிகள் தெருக்களில் இறங்கி அப்பகுதியில் உள்ள முக்கிய நெடுஞ்சாலையை மறித்ததாக பாகிஸ்தான் வட்டார ஊடகங்கள் செய்தி வெளியிட்டுள்ளன.
நெடுஞ்சாலை மூடப்பட்டதால், வாகனபோக்குவரத்து முடங்கியதாக தி பலுசிஸ்தான் போஸ்ட் செய்தி வெளியிட்டுள்ளது.
சிராஜ் நூர் மற்றும் முகமது ஆரிப் என்ற இரண்டு கிரிஷ்க் மாணவர்கள் விடுமுறைக்காக சொந்த ஊரில் இருந்தபோது பாகிஸ்தான் ராணுவத்தால் கடத்தப்பட்டனர்.
காணாமல் போனவர்களில் ஒருவரான சிராஜ் நூர், சர்கோதா பல்கலைக்கழகத்தில் சட்ட மாணவராக உள்ளார், அதே சமயம் முஹம்மது ஆரிப் 2022 இல் பலுசிஸ்தான் பல்கலைக்கழகத்தில் எம்.ஏ பட்டம் பெற்றவர் என பலுசிஸ்தான் போஸ்ட் செய்தி வெளியிட்டுள்ளது.
பலூச் விடுதலைப் படைக்கு எதிரான தாக்குதல் தீவிரமடைந்தாலும், உள்ளூர் பலூச் மக்கள் மீதான உடல்ரீதியான மிரட்டல் மற்றும் கட்டாயக் காணாமல் போதல் சம்பவங்கள் கணிசமாக அதிகரித்துள்ளன என்று சர்வதேச உரிமைகள் மற்றும் பாதுகாப்பு மன்றம் (IFFRAS) தெரிவித்துள்ளது.
சீனா-பாகிஸ்தான் பொருளாதார வழித்தடத்தையும், திட்டத்தில் ஈடுபட்டுள்ள சீன குடிமக்களையும் பாதுகாக்க சீனாவிடம் இருந்து பாகிஸ்தானுக்கு தொடர்ந்து அழுத்தம் கொடுக்கப்பட்டு வருவதாக தகவல்கள் தெரிவிக்கின்றன.
பலுசிஸ்தான் தேசியக் கட்சித் தலைவர் அக்தர் மெங்கல், பாகிஸ்தான் பாதுகாப்புப் படையினர் போலி என்கவுன்டர்களை நடத்தி வருவதாகவும், பலூச் உள்ளூர்வாசிகள் காணாமற்போனதாகவும் பலமுறை குற்றம் சாட்டியிருந்தார்.
இம்ரான் கான் பிரதமராக இருந்த காலத்தில் போலி என்கவுண்டர்கள் மற்றும் காணாமல் போன வழக்குகள் மூன்று மடங்கு அதிகரித்தன. பலூச் நேஷனல் (மெங்கல்) கட்சி இம்ரானின் பாகிஸ்தான் தெஹ்ரீக்-இ-இன்சாஃப் உடன் கூட்டணியில் இருந்த போதிலும் இவ்வாறு சம்பவங்கள் இடம்பெற்றன.
ஒட்டுமொத்தமாக, ஐயாயிரத்துக்கும் அதிகமானோர் காணாமல் போயுள்ளனர் என்று காணாமல் போனவர்கள் குறித்து ஆராயும் அமைப்பான பலூச் காணாமல் போனவர்களுக்கான குரல்களை மேற்கோள் காட்டி IFFRAS தெரிவித்துள்ளது. காணாமல் போனவர்களில் மாணவர்கள், ஆர்வலர்கள், பெண்கள் மற்றும் குழந்தைகளும் அடங்குவர்.
