பசறை பொலிஸ் பிரிவில் நேற்று (17) மேற்கொள்ளப்பட்ட விசேட சுற்றிவளைப்பின்போது சட்டவிரோத மதுபானமான கசிப்பு 10,000 மில்லிலீற்றர் மற்றும் கோடா 282,500 மில்லிலீற்றருடன் பெண் ஒருவர் உட்பட மூவர் கைது செய்யப்பட்டுள்ளதாக பசறை பொலிஸார் தெரிவித்தனர்.
இதன்போது கைது செய்யப்பட்ட பெண் 56 வயதுடையவர் எனவும், அவர் மீதும்பிட்டிய குடுகல்பத்தன பகுதியைச் சேர்ந்தவர் எனவும் பொலிஸார் தெரிவித்தனர்.
அவரிடமிருந்து 97,500 மில்லிலீற்றர் கோடா கைப்பற்றப்பட்டுள்ளதாகவும்
மேலும், கைது செய்யப்பட்ட ஏனைய இருவரும் 20 வயதுடையவர்கள் எனவும், இரு சந்தேக நபர்களும் பசறை, எல்டப் மேற்பிரிவு பகுதியைச் சேர்ந்தவர்கள் எனவும் தெரிவிக்கப்பட்டுள்ளது.
அவர்களிடமிருந்து 10,000 மில்லிலீற்றர் கசிப்பு மற்றும் 185,000 மில்லிலீற்றர் கோடா ஆகியன கைப்பற்றப்பட்டுள்ளன.
அத்துடன், கசிப்பு உற்பத்திக்குப் பயன்படுத்தப்பட்டதாகக் கூறப்படும் எரிவாயு சிலிண்டர், எரிவாயு அடுப்பு, சுருள் மற்றும் கசிப்பு காய்ச்சுவதற்குப் பயன்படுத்தப்படும் உபகரணங்களும் பொலிஸாரால் கைப்பற்றப்பட்டுள்ளன.
பதுளை மாவட்டத்திற்குப் பொறுப்பான பிரதி பொலிஸ் மா அதிபர் லக்சிறி விஜேசேன மற்றும் உதவிப் பொலிஸ் அத்தியட்சகர் (2) அஜித் பண்டார ஆகியோரின் ஆலோசனையின் பேரில், பசறை பொலிஸ் நிலையப் பொறுப்பதிகாரி பிரதான பொலிஸ் பரிசோதகர் ரத்னசிறி பண்டார தலைமையிலான பொலிஸ் குழுவினர் இந்தச் சுற்றிவளைப்பை மேற்கொண்டுள்ளனர்.
கைது செய்யப்பட்ட பெண்ணும் இரு சந்தேக நபர்களும் பசறை நீதவான் நீதிமன்றத்தில் ஆஜர்படுத்தப்படவுள்ளதாக பொலிஸார் மேலும் தெரிவித்தனர்.










