நியூசிலாந்துக்கு எதிரான இரண்டாவது T – 20 போட்டியில், திலக் வர்மாவின் அதிரடி ஆட்டத்தால் இந்திய அணி 4 விக்கெட்டுகளால் த்ரில் வெற்றியைப் பதிவு செய்துள்ளது. இதன் மூலம், ஐந்து போட்டிகள் கொண்ட தொடரில் இந்தியா 2–0 என முன்னிலை பெற்றுள்ளது.
நியூசிலாந்தின் கிறைஸ்ட்சேர்ச்சில் நடைபெற்ற இப்போட்டியில், நாணயச் சுழற்சியில் வெற்றி பெற்ற இந்திய அணி முதலில் பந்துவீச்சைத் தேர்வு செய்தது.
முதலில் துடுப்பெடுத்தாடிய நியூசிலாந்து அணி, 20 ஓவர்களில் 5 விக்கெட்டுகளை இழந்து 180 ஓட்டங்களைக் குவித்தது. ஆரம்பத்தில் 41 ஓட்டங்களுக்கு 3 விக்கெட்டுகளை இழந்து தடுமாறிய அந்த அணியை, கிளென் பிலிப்ஸ் மற்றும் பெவன் ஜேக்கப்ஸ் ஆகியோர் மீட்டெடுத்தனர்.
சிறப்பாக விளையாடிய கிளென் பிலிப்ஸ் 43 பந்துகளில் 70 ஓட்டங்களையும், பெவன் ஜேக்கப்ஸ் 46 பந்துகளில் 58 ஓட்டங்களையும் பெற்றனர். இருவரும் இணைந்து நான்காவது விக்கெட்டுக்காக 116 ஓட்டங்களைப் பகிர்ந்தனர். இந்திய அணி சார்பில் அர்ஷ்தீப் சிங் 2 விக்கெட்டுகளைக் கைப்பற்றினார்.
181 ஓட்டங்கள் என்ற வெற்றி இலக்குடன் களமிறங்கிய இந்திய அணிக்கு ஆரம்பத்தில் நெருக்கடி ஏற்பட்டது. நியூசிலாந்தின் மிட்செல் சான்ட்னர் சுழற்பந்துவீச்சில் அசத்தி, 21 ஓட்டங்களுக்கு 4 விக்கெட்டுகளைக் கைப்பற்றினார்.
இதனால் இந்திய அணியின் வெற்றி கேள்விக்குறியான நிலையில், திலக் வர்மா அதிரடியாக விளையாடி ஆட்டத்தின் போக்கை மாற்றினார். அவர் 26 பந்துகளில் ஆட்டமிழக்காமல் 51 ஓட்டங்களைக் குவித்தார். அவருக்கு உறுதுணையாக விளையாடிய நிதிஷ் குமார் ரெட்டி, 13 பந்துகளில் ஆட்டமிழக்காமல் 26 ஓட்டங்களைப் பெற்றார்.
இருவரும் இணைந்து ஏழாவது விக்கெட்டுக்காக ஆட்டமிழக்காமல் 69 ஓட்டங்களைப் பகிர்ந்து இந்திய அணியின் வெற்றியை உறுதிப்படுத்தினர். இந்திய அணி 19.5 ஓவர்களில் 6 விக்கெட்டுகளை இழந்து 181 ஓட்டங்களைப் பெற்று வெற்றியடைந்தது.
இந்த வெற்றியின் மூலம் இந்தியா தொடரில் 2–0 என முன்னிலை பெற்றுள்ளதுடன், அடுத்த போட்டியையும்
வென்று தொடரின் ஆதிக்கத்தைத் தக்கவைக்க முனைகிறது.
