முன்னாள் அமைச்சர் பஸில் ராஜபக்சவைக் கைது செய்து நீதிமன்றத்தில் ஆஜர்ப்படுத்துமாறு கோட்டை நீதவான் பசன் அமரசேன குற்றப் புலனாய்வு திணைக்களத்தின் சட்டவிரோத சொத்துக்கள் விசாரணை பிரிவிற்கு இன்று(14) உத்தரவிட்டார்.
சந்தேகநபர் தொடர்பில் சர்வதேச பொலிஸார் ஊடாக நடவடிக்கை எடுப்பதற்காக சிவப்பு அறிவித்தலுக்கான பிடியாணையை ஆங்கிலம் மற்றும் சிங்கள மொழிகளில் பிறப்பிக்குமாறு கொழும்பு கோட்டை நீதவான் பசன் அமரசேன அறிவித்துள்ளார்.
சுற்றுலா அபிவிருத்தி பணியகத்தின் நிதியை முறையற்ற வகையில் பயன்படுத்திய சம்பவம் தொடர்பில் குற்றப் புலனாய்வு திணைக்களத்தால் முன்வைக்கப்பட்ட விடயங்களை ஆராய்ந்து இந்த உத்தரவு பிறப்பிக்கப்பட்டுள்ளது.
2014ஆம் ஆண்டு சுற்றுலா அபிவிருத்தி பணியகத்திற்காக ஒதுக்கப்பட்டிருந்த 7.8 மில்லியன் ரூபா பணத்தை சுற்றுலா அபிவிருத்தி பணிகளுக்கு பயன்படுத்தாது ஊவா மாகாண சபை தேர்தல் பிரசாங்களுக்காக 12,000 T-shirt களை அச்சிட்டு வழங்கிய சம்பவம் தொடர்பில் குற்றப் புலனாய்வு திணைக்களத்தின் சட்டவிரோத சொத்துக்கள் விசாரணை பிரிவு நீதிமன்றத்தில் அறிக்கையிட்டிருந்தது.
