ஈரான் மீதான தாக்குதல்களை மீண்டும் தொடங்குவதற்கான உடனடி திட்டங்களை தான் தற்காலிகமாக நிறுத்தி வைத்துள்ளதாக அமெரிக்க ஜனாதிபதிடொனால்ட் டிரம்ப் தெரிவித்துள்ளார்.
போரை முடிவுக்குக் கொண்டு வருவதற்கான டிரம்ப்பின் கோரிக்கைகளை ஈரான் நிராகரித்து வரும் நிலையில் இந்த அறிவிப்பு வெளியாகியுள்ளது.
வளைகுடா நாடுகள் விடுத்த வேண்டுகோளுக்கு இணங்கவே தான் இந்தத் தாக்குதல் திட்டத்தை நிறுத்தியதாக டிரம்ப் கூறினார்.
அரசியல் ரீதியாகத் தனக்குப் பின்னடைவை ஏற்படுத்தியுள்ள இந்தப் போரில் இருந்து வெளியேற விரும்புவதை டிரம்ப் ஏற்கனவே தெளிவுபடுத்தியிருந்தார்.
அத்துடன், இந்தத் தற்காலிகப் போர்நிறுத்தத்தை காலவரம்பின்றி நீட்டித்திருந்த அவர், செவ்வாய்க்கிழமை ஒரு புதிய தாக்குதலுக்குத் தயாராகிவிட்டதாகப் பகிரங்கமாகத் தெரிவித்துமிருந்தார்.
“தற்போது தீவிரமான பேச்சுவார்த்தைகள் நடந்து வருவதால், செவ்வாய்க்கிழமை திட்டமிடப்பட்டிருந்த ஈரானிய இஸ்லாமியக் குடியரசு மீதான எங்களது ராணுவத் தாக்குதலைத் தற்காலிகமாக நிறுத்தி வைக்குமாறு கத்தார், சவுதி அரேபியா மற்றும் ஐக்கிய அரபு அமீரகத்தின் (UAE) தலைவர்கள் என்னைக் கேட்டுக்கொண்டனர்,” என்று டிரம்ப் தனது ‘ட்ரூத் சோஷியல்’ (Truth Social) சமூக ஊடகப் பக்கத்தில் எழுதியுள்ளார்.
அமெரிக்கா மற்றும் மத்திய கிழக்கு நாடுகளுக்கு “மிகவும் ஏற்றுக்கொள்ளத்தக்க” ஒரு ஒப்பந்தத்தை எட்டுவதில் வளைகுடா நட்பு நாடுகள் நம்பிக்கை தெரிவித்துள்ளதாகவும், அதன் முடிவில் “ஈரானிடம் அணு ஆயுதங்கள் எதுவும் இருக்காது!” என்றும் டிரம்ப் கூறினார்.
இருப்பினும், “ஏற்றுக்கொள்ளக்கூடிய ஒரு ஒப்பந்தம் எட்டப்படாத பட்சத்தில், எந்தவொரு கணத்திலும் ஈரான் மீது முழு அளவிலான, பெரிய அளவிலான தாக்குதலை நடத்துவதற்குத் தயாராக இருக்குமாறு” அமெரிக்க ராணுவத்திற்குத் தான் உத்தரவிட்டுள்ளதாகவும் டிரம்ப் குறிப்பிட்டார்.
