வெளிநாடு செல்ல முயற்சிக்கும் பல இலங்கையர்களுக்கு பாஸ்போர்ட்டின் ‘பெறுமதி’ என்பது வெறும் தரவரிசை எண் அல்ல. தூதரகங்களில் காத்திருக்கும் நேரம், விசா விண்ணப்பங்களுக்குத் தயாரிக்க வேண்டிய ஆவணங்கள், விசா மறுக்கப்படும் என்ற அச்சம், பயணத் திட்டங்கள் தாமதமாகும் நிலை என, அதன் தாக்கத்தை பலரும் நேரடியாக அனுபவித்து வருகின்றனர்.
இந்நிலையில், 2026 Henley Passport Index-ல் இலங்கை பாஸ்போர்ட் 94ஆவது இடத்தைப் பிடித்துள்ளது. இலங்கை பாஸ்போர்ட் வைத்திருப்பவர்கள் 39 நாடுகள் மற்றும் பிரதேசங்களுக்கு முன்கூட்டியே விசா பெற வேண்டிய அவசியமின்றி அல்லது Visa on Arrival, eTA போன்ற எளிமையான அனுமதி முறைகள் மூலம் பயணம் செய்யக்கூடிய நிலையில் உள்ளனர்.
தரவரிசை முன்னேறியுள்ளது… ஆனால் இடைவெளி இன்னும் அதிகம்
இலங்கை பாஸ்போர்ட்டின் தரவரிசை கடந்த சில ஆண்டுகளில் படிப்படியாக முன்னேறியுள்ளது.
2021 ஆம் ஆண்டில் 107ஆவது இடத்தில் இருந்த இலங்கை, 2022 இல் 102 ஆவது இடத்துக்கும், 2023 இல் 100ஆவது இடத்துக்கும் முன்னேறியது. 2024-25 ஆம் ஆண்டுகளில் 96 ஆவது இடத்தில் இருந்த நிலையில், தற்போது 94 ஆவது இடத்தைப் பிடித்துள்ளது. அதாவது, முன்னேற்றம் ஏற்பட்டுள்ளது.
ஆனால் உலகின் முன்னணி பாஸ்போர்ட்டுக்களுடன் ஒப்பிடும்போது, இலங்கையர்களின் சர்வதேச பயண வாய்ப்புகளில் இன்னும் குறிப்பிடத்தக்க இடைவெளி காணப்படுகிறது.
உதாரணமாக, 2026 தரவரிசையில் சிங்கப்பூர் முதலிடத்தில் உள்ளது. அதன் பாஸ்போர்ட்டில் மிக அதிக எண்ணிக்கையிலான நாடுகளுக்கு முன்கூட்டிய விசா இல்லாமல் பயணம் செய்ய முடிகிறது.
94 ஆவது இடம் என்றால் என்ன?
பாஸ்போர்ட் தரவரிசை என்பது ஒரு நாட்டின் பாஸ்போர்ட்டில் எத்தனை இடங்களுக்கு முன்கூட்டிய விசா இல்லாமல் அல்லது எளிமையான அனுமதி முறைகளுடன் செல்ல முடிகிறது என்பதைக் காட்டும் ஒரு அளவுகோல்.
ஆனால் இதை “இலங்கையர்கள் 39 நாடுகளுக்கு எப்போது வேண்டுமானாலும் எந்த நிபந்தனையும் இல்லாமல் செல்லலாம்” என்று புரிந்துகொள்ளக் கூடாது.
Visa-free, Visa on Arrival அல்லது eTA விதிமுறைகள் ஒவ்வொரு நாட்டிலும் மாறுபடலாம். தங்கும் காலம், பயணத்தின் நோக்கம், தேவையான ஆவணங்கள் உள்ளிட்ட நிபந்தனைகள் இருக்கலாம்.
மேலும், விசா மற்றும் நுழைவு விதிமுறைகள் அரசியல், பாதுகாப்பு, சுகாதாரம் மற்றும் குடியேற்றம் தொடர்பான காரணங்களால் எந்த நேரத்திலும் மாற்றப்படலாம்.
எனவே, பயணம் மேற்கொள்வதற்கு முன் சம்பந்தப்பட்ட நாட்டின் அதிகாரப்பூர்வ குடிவரவு அல்லது தூதரகத் தகவல்களை சரிபார்ப்பது அவசியம்.
பயணத்தைத் தாண்டி ஏன் இது முக்கியம்?
பாஸ்போட்டின் வலிமை சுற்றுலா பயணங்களுக்கு மட்டுமே முக்கியமானது அல்ல.
வெளிநாட்டில் கல்வி கற்கும் வாய்ப்பு, வேலைக்காகப் பயணம் செய்வது, வர்த்தகத் தொடர்புகளை உருவாக்குவது, சர்வதேச மாநாடுகளில் பங்கேற்பது போன்ற பல சந்தர்ப்பங்களிலும் விசா பெறும் நடைமுறை ஒரு முக்கிய காரணியாக இருக்கலாம்.
ஒரு நாட்டின் பாஸ்போர்ட்டுக்கு அதிகமான விசா தேவையில்லாத அணுகல் இருந்தால், அதன் மக்களுக்கு சர்வதேசப் பயணத்தில் அதிக நெகிழ்வுத்தன்மை கிடைக்கிறது.
மாறாக, பல நாடுகளுக்கு முன்கூட்டியே விசா பெற வேண்டிய சூழ்நிலையில், நிதி ஆதாரம், வேலை அல்லது கல்வி தொடர்பான ஆவணங்கள், பயண நோக்கம் மற்றும் மீண்டும் நாடு திரும்புவதை உறுதி செய்யும் ஆதாரங்கள் போன்றவற்றை சமர்ப்பிக்க வேண்டியிருக்கலாம்.
இதனால், ஒரு பயணத்தின் செலவு மட்டுமல்லாது, அதற்குத் தேவைப்படும் நேரமும் அதிகரிக்கலாம்.
இலங்கை முன்னேற முடியுமா?
94ஆவது இடம் ஒரு நிரந்தரமான நிலை அல்ல.
இலங்கையின் பொருளாதார நிலைத்தன்மை, சர்வதேச உறவுகள், குடியேற்றம் தொடர்பான நம்பிக்கை மற்றும் பிற நாடுகளுடன் ஏற்படுத்தப்படும் இருதரப்பு ஒப்பந்தங்கள் போன்ற பல காரணிகள் எதிர்காலத்தில் பாஸ்போர்ட்டின் பயண அணுகலை பாதிக்கக்கூடும்.
கடந்த சில ஆண்டுகளில் இலங்கையின் தரவரிசை மேம்பட்டிருப்பது ஒரு நேர்மறையான அறிகுறியாக இருந்தாலும், உலகின் வலுவான பாஸ்போர்ட்களுடன் ஒப்பிடும்போது இன்னும் செல்ல வேண்டிய தூரம் அதிகம்.
ஒரு பாஸ்போர்ட்டின் தரவரிசை என்பது வெறும் எண் அல்ல. அது ஒரு நாட்டின் குடிமக்களுக்கு உலகம் எவ்வளவு எளிதாகத் திறக்கப்படுகிறது என்பதற்கான ஒரு குறியீடு.
இலங்கை 94ஆவது இடத்திலிருந்து அடுத்த கட்டத்திற்கு முன்னேற வேண்டுமெனில், அதிகமான நாடுகளுடன் எளிதான பயண ஏற்பாடுகளை உருவாக்குவதும், சர்வதேச நம்பிக்கையை மேலும் வலுப்படுத்துவதும் முக்கியமானதாக இருக்கும்.
