மலையக மாணவ மற்றும் கல்விசார் சமூகத்தின் முன்னேற்றம் கருதி அரச மட்டத்தில் மேற்கொள்ள வேண்டிய நடவடிக்கைகள் குறித்து மலையகக் கல்வி அபிவிருத்தி மன்றம், பிரதமர் கலாநிதி ஹரிணி அமரசூரியவிடம் நேரில் எடுத்துரைத்துள்ள அதேவேளை மேற்படி விடயதானங்கள் குறித்து மகஜர் ஊடான கோரிக்கைகளையும் முன்வைத்துள்ளது.
மலையக சமூகத்தின் கல்வி அபிவிருத்தி தொடர்பில் மலையக கல்வி அபிவிருத்தி மன்றத்தின் உயர்மட்ட பிரதிநிதிகள் குழு நேற்று வெள்ளிக்கிழமை பிரதமர் கலாநிதி ஹரிணி அமரசூரியவை சந்தித்து
விஷேட கந்துரையாடல் ஒன்றை மேற்கொண்டிருந்தது.
பாராளுமன்ற கட்டிடத் தொகுதியில் இடம்பெற்ற இக்கலந்துரையாடலில் மன்றத்தின் தலைவர், போஷகர்கள், பணிப்பாளர்கள் மற்றும் நிர்வாகக் குழுவின் முக்கியஸ்தர்கள் பங்கேற்றிருந்தனர்.
இதன்போது மலையகம் சார்ந்து பல்வேறு விடயங்கள் ஆராயப்பட்டன.
அவற்றில் குறிப்பாக பெருந்தோட்டப் பகுதிகளில் கல்வி அபிவிருத்தியை வலுப்படுத்துதல், பெருந்தோட்டப் பாடசாலைகளில் நிலவும் பல்வேறு கல்விசார் பிரச்சினைகள் மற்றும் அவற்றுக்கான தீர்வுகள் தொடர்பில் பிரதமரின் கவனத்துக்கு கொண்டு செல்லப்பட்டன.
