வீதியில் கண்டெடுக்கப்பட்ட சுமார் 4 லட்சத்து 50 ஆயிரம் ரூபா பெறுமதியான தங்க கைச்சங்கிலியை Bracelet அதன் உரிமையாளரிடம் கையளிக்குமாறுகோரி, நகையை பொகவந்தலாவை பொலிஸாரிடம் இளைஞரொருவர் கையளித்துள்ளார். அவரின் இந்த நேர்மையான செயலை பலரும் பாராட்டிவருகின்றனர்.
பொகவந்தலாவை சென்ஜோன்டிலரி தோட்ட பிரதான வீதியில் இருந்தே குறித்த தங்க கை சங்கிலி கண்டெடுக்கப்பட்டுள்ளது.
நகையை பொலிஸாரிடம் ஒப்படைத்த இளைஞர், அது தொடர்பில் சமூகவலைத்தளத்திலும் பதிவிட்டுள்ளார்.
இதனையடுத்து, குறித்த தங்க கைச்சங்கிலியின் உரிமையாளரான பொகவந்தலாவை, கியூ தோட்டத்தின் கீழ் பிரிவைச் சேர்ந்த சுப்பிரமணியம் மோகன் என்பவர், அதற்குரிய ஆவணங்களுடன் பொகவந்தலாவை பொலிஸ் நிலையத்திற்கு நேற்று (20) வருகை வந்துள்ளார்.
பொகவந்தலihவ பொலிஸ் நிலைய பொறுப்பதிகாரி , பொலிஸ் பரிசோதகர் நுவன் மதுசங்கவிடம் உரிய ஆவணங்களை சமர்ப்பித்துள்ளார்.
இதனையடுத்து ஆவணங்கள் சரிபார்க்கப்பட்ட பின்னர், நகையைக் கண்டெடுத்த பொகவந்தலாவை, கிலானி தோட்டத்தைச் சேர்ந்த டி.ஜே. ரமேஷ் என்பவரை பொலிஸ் நிலையத்திற்கு வரவழைத்து, அவர் மூலமாகவே தங்கக் கைச்சங்கிலியை உரிய உரிமையாளரிடம் பொலிஸ் பொறுப்பதிகாரி ஒப்படைக்க நடவடிக்கை எடுத்துள்ளார்.
