சதுரங்க விளையாட்டில் மிக இளைய வயதில் woman grandmaster (WGM) பட்டம் வென்ற உலகின் முதல் வீராங்கனை என்ற வரலாற்றுச் சாதனையை பிரித்தானியாவைச் சேர்ந்த 11 வயது சிறுமி போதனா சிவானந்தன் படைத்துள்ளார்.
வடமேற்கு லண்டனைச் சேர்ந்த போதனா சிவானந்தன், உஸ்பெகிஸ்தானின் சமர்கண்ட் நகரில் நடைபெற்ற 46-வது செஸ் ஒலிம்பியாட் போட்டியில் பிரித்தானியா சார்பில் பங்கேற்று விளையாடினார்.
இதில் தனது மூன்றாவது மற்றும் இறுதி ‘டபிள்யூ.ஜி.எம் நாரம்’ (WGM norm) தகுதியை அவர் எட்டியதை சர்வதேச சதுரங்கக் கூட்டமைப்பு (FIDE) உறுதிப்படுத்தியுள்ளது.
இதுகுறித்து FIDE அமைப்பிற்கு அளித்த பேட்டியில், இந்தச் சாதனைக் குறித்து மகிழ்ச்சி தெரிவித்த போதனா, தொடர்ந்து வரலாறு படைக்க விரும்புவதாகக் கூறினார்.
பிரித்தானியாவின் மிக இளைய பெண்கள் செஸ் சாம்பியன் மற்றும் சர்வதேச அளவில் எந்தவொரு விளையாட்டிலும் பிரித்தானியாவைப் பிரதிநிதித்துவப்படுத்திய மிக இளைய நபர் போன்ற பல மைல்கல் சாதனைகளை படைத்துள்ள இந்தப் பள்ளிச் சிறுமியின் அபார வளர்ச்சியில் இது மற்றொரு முத்திரையாகும்.
ஹாரோ (Harrow) பகுதியைச் சேர்ந்த போதனா, பிரித்தானியா அணியின் முதல் போர்டில் (top board) – அணியின் முதன்மை ஆட்டக்காரருக்கான வரிசையில் – அனைத்து 11 சுற்றுகளிலும் விளையாடி, 8 புள்ளிகளுடன் தொடரை நிறைவு செய்தார்.
தனது மூன்றாவது தகுதிநிலையை எட்டுவதற்கு முன்பே, வுமன் கிராண்ட்மாஸ்டர் பட்டத்திற்குத் தேவையான 2300 ரேட்டிங் புள்ளிகளை அவர் கடந்திருந்தார் என்பது குறிப்பிடத்தக்கது.
இதற்கு முன்பு ரஷ்யா மற்றும் உக்ரைன் நாடுகளின் சார்பில் விளையாடிய கதேரினா லாக்னோ (Kateryna Lagno), 12 வயதில் இப்பட்டத்தைப் பெற்றதே மிக இளைய வயது சாதனையாக இருந்தது.
சீனாவின் ஹோவ் யிஃபான் (Hou Yifan) தனது 12 வயதில் இப்பட்டத்தைப் பெற்றதுடன், பெண்கள் மற்றும் ஆண்கள் இருபாலருக்கான ‘கிராண்ட்மாஸ்டர்’ (GM) பட்டத்தை தனது 14 வயதில் வென்ற மிக இளைய பெண் என்ற சாதனையை இன்னமும் தன் வசம் வைத்துள்ளார்.
பெண்களுக்கு மட்டுமே வழங்கப்படும் சதுரங்கப் பட்டமான ‘வுமன் கிராண்ட்மாஸ்டர்’ தகுதியை ஒருவர் அடைந்துவிட்டால், அது வாழ்நாள் முழுவதும் தொடரும்.
சமர்கண்டில் போதனா பெற்ற இந்த வெற்றி, அவருக்கு இரண்டாவது ‘இன்டர்நேஷனல் மாஸ்டர்’ (IM) நாரம் தகுதியையும் பெற்றுத் தந்துள்ளதுடன், அடுத்தகட்ட உயர் பட்டத்தை நோக்கிய பயணத்தில் அவரை ஒரு படி முன்னேற்றியுள்ளது.
பொதுவாக ‘இன்டர்நேஷனல் மாஸ்டர்’ பட்டத்தைப் பெற ஒரு ஆட்டக்காரருக்கு மூன்று தகுதிநிலைகளும் (norms) குறைந்தபட்சம் 2400 ரேட்டிங் புள்ளிகளும் தேவை. போதனா தற்போது இரண்டு தகுதிநிலைகளை அடைந்துள்ளார்.
ஆண், பெண் இருபாலருக்கும் பொதுவான இந்த ‘இன்டர்நேஷனல் மாஸ்டர்’ பட்டம், போதனா தற்போது வைத்துள்ள வுமன் கிராண்ட்மாஸ்டர் மற்றும் வுமன் இன்டர்நேஷனல் மாஸ்டர் பட்டங்களை விட உயரிய தரத்தைக் கொண்டதாகும்.
சதுரங்க விளையாட்டின் மீதான தனது ஆர்வம் குறித்துப் பேசிய போதனா, “எனக்குப் பயணம் செய்வது பிடிக்கும். மேலும் நான் வழக்கமான பள்ளிக்கும் செல்வதால், இந்த விளையாட்டு எனது பல பாடங்களுடன் தொடர்புடையதாக இருக்கிறது. எனவே இது எனக்கு மிகவும் பயனுள்ளதாக உள்ளது” என்று கூட்டினார்.
தனக்கும் தனது மனைவிக்கும் சதுரங்கம் விளையாடத் தெரியாது என்றும், இருவருமே பொறியியல் பட்டதாரிகளான நிலையில் தனது மகளுக்கு இந்தத் திறமை எங்கிருந்து வந்தது என்று தெரியவில்லை என்றும் போதனாவின் தந்தை சிவா குறிப்பிட்டுள்ளார்.
சதுரங்க உலகில் போதனாவின் வளர்ச்சி மிகவும் அதிவேகமானது. கொரோனா ஊரடங்கு காலத்தில் சுயமாகக் கற்றுக்கொண்ட அவர், ஜூலை 2021-இல் ஹாரோ செஸ் கிளப்பில் தனது முதல் தொடரில் பங்கேற்றார்.
ஓராண்டுக்குப் பிறகு, தனது 7-வது வயதில், ஐரோப்பியப் பள்ளிகளுக்கான சாம்பியன்ஷிப் போட்டியில் தான் விளையாடிய 24 போட்டிகளிலும் வெற்றி பெற்றார்.
