நுவரெலியா மாவட்டத்தில் இன்றைய (05.08.2020) தினம் வாக்களிப்பு மிகவும் சுமுகமாக நடைபெற்றதாகவும் மாவட்டத்தில் 75 வீதமான வாக்குகள் அளிக்கப்பட்டுள்ளதாகவும் நுவரெலியா மாவட்ட செயலாளரும் தேர்தல் தெரிவத்தாட்சி அதிகாரியுமான ஆர்.எம்.பி.புஸ்பகுமார தெரிவித்துள்ளார்.
498 வாக்களிப்பு நிலையங்களில் 577,717 வாக்காளர்கள் வாக்களிக்க தகுதி பெற்றிருந்தனர். பதிவு செய்யப்பட்ட அஞ்சல் மூல வாக்குகள் 19741 .நாளைய தினம் காலை7.00 மணியளவில் (06.08.2020) வாக்கு என்னும் பணிகள் ஆரம்பமாகவுள்ளது.
வழமையாக நுவரெலியா காமினி தேசிய பாடசாலையிலேயே வாக்குகள் என்னப்படும்.ஆனால் இம்முறை நான்கு இடங்களில் வாக்குகள் கணக்கிடுவதற்கான ஏற்பாடுகள் செய்யப்பட்டுள்ளன.
நுவரெலியா காமினி தேசிய பாடசாலையில் 45 வாக்கு என்னும் நிலையங்களும் நுவரெலியா தொழில்நுட்ப கல்லூரியில் 15 வாக்கு என்னும் நிலையங்களும் நுவரெலியா பரிசுத்த திரித்துவ மத்திய கல்லூரியில் 35 வாக்குகள் என்னும் நிலையங்களும் தபால் மூல வாக்குகளை கணக்கிடுவதற்காக நுவரெலியா மாவட்ட செயலகத்தில் 10 வாக்கு என்னும் நிலையங்களும் அமைக்கப்பட்டுள்ளது.மொத்தமாக 95 வாக்கு என்னும் நிலையங்களில் வாக்குகள் கணக்கிடப்படவுள்ளது.
இம்முறை நுவரெலியா மாவட்டத்தில் 12 அரசியல் கட்சிகளும் 13 சுயேட்சை குழுக்களும் போட்டியிடுகின்றன.8 பாராளுமன்ற பிரதிநிதிகளை தெரிவு செய்வதற்காக 275 பேர் போட்டியிடுகின்றனர்.
நாளை (06.08.2020) மாலை 4.00 மணியளவில் மாவட்ட பெறுபேறுகள் வெளியிடப்படலாம் என எதிர்பார்க்கப்படுகின்றது.நாளை மறுதினம் (07.08.2020) விருப்பு வாக்குகளின் விபரம் வெளியிடப்படுவதற்கான சாத்தியகூறுகள் இருப்பதாக நுவரெலியா மாவட்ட செயலாளரும் தேர்தல் தெரிவத்தாட்சி அதிகாரியுமான ஆர்.எம்.பி.புஸ்பகுமார தெரிவிக்கின்றார்.
நுவரெலியா நிருபர் எஸ்.தியாகு
