தாய்மாமன் தங்க மோதிரம் திட்டத்தை ஆரம்பித்து வைத்தார் முதல்வர்

மதுரை அரசு இராஜாஜி மருத்துவமனையில் ‘தாய்மாமன் தங்க மோதிரம்’ திட்டத்தை தமிழக முதலமைச்சர் விஜய் இன்று (செப். 28) முறைப்படி தொடங்கி வைத்தார்.

மதுரைக்கு வருகை தந்த முதலமைச்சருக்கு வழிநெடுகிலும் உற்சாக வரவேற்பு அளிக்கப்பட்ட நிலையில், மருத்துவமனை வளாகமும் விழாக்க கோலம் பூண்டிருந்தது.

முதல்கட்டமாக மும்மதங்களைச் சேர்ந்த குழந்தைகளுக்குத் தங்க மோதிரங்களை அணிவித்து இத்திட்டத்தை அவர் தொடங்கி வைத்தார்.

விழாவில் பயனடைந்த தாய்மார்களுடன் கலந்துரையாடிய முதலமைச்சர் விஜய், பெற்றோரின் வேண்டுகோளுக்கிணங்க பல குழந்தைகளுக்குப் பெயர் சூட்டி மகிழ்ந்தார்.

அப்போது உணர்ச்சிப் பெருக்கால் அழுத தாய் ஒருவரை கட்டிப்பிடித்து ஆறுதல் கூறிய அவர், பயனாளிகளான தாய்மார்கள் மற்றும் குழந்தைகளுடன் ‘செல்பி’ புகைப்படமும் எடுத்துக்கொண்டார்.

இந்நிகழ்வில் பேசிய அமைச்சர் அருண் ராஜ், “இத்திட்டத்திற்காக முதல்கட்டமாக 1,28,499 தங்க மோதிரங்கள் கொள்முதல் செய்யப்பட்டுள்ளன. அரசு மருத்துவமனைகளில் பிரசவித்து வீடு திரும்பும்போதே குழந்தைகளுக்கு இந்த 1 கிராம் தங்க மோதிரம் வழங்கப்படும்” என்று தெரிவித்தார்.