நமுனுகுல – தன்னகும்பர பிரதான பாதையின் மிக மோசமான நிலையைக் கண்டித்தும், அதனை உடனடியாகப் புனரமைக்கக் கோரியும் அப்பகுதி மக்கள் இன்று நமுனுகுல நகரில் கவனயீர்ப்பு ஆர்ப்பாட்டம் ஒன்றினை முன்னெடுத்தனர்.
பல ஆண்டுகளாகப் பராமரிப்பு இன்றிச் சேதமடைந்து காணப்படும் இப்பாதையினால், போக்குவரத்துச் சிரமங்கள் நாளுக்கு நாள் அதிகரித்தே வருகின்றன.
இதனால் பொதுமக்கள், மாணவர்கள் மற்றும் விவசாயிகள் அன்றாடம் சொல்லொணாத் துயரங்களை எதிர்நோக்கி வருவதாக ஆர்ப்பாட்டத்தில் கலந்துகொண்டவர்கள் கவலை தெரிவித்தனர்.
அபாயகரமான பயணம்:
குறிப்பாக மழைக்காலங்களில் வீதி முற்றாகச் சேதமடைந்து காணப்படுவதால், இப்பாதையிலான பயணம் உயிருக்கு ஆபத்தானதாக மாறியுள்ளதாகச் சுட்டிக்காட்டப்பட்டது.
தாமதமாகும் அவசர சேவைகள்:
வீதி சீர்கேடு காரணமாக அவசர கால நோயாளர் காவு வண்டிகள் (Ambulance) மற்றும் ஏனைய அத்தியாவசியச் சேவைகள் உரிய நேரத்திற்குப் பயணிக்க முடியாமல் தாமதமடைவதாக மக்கள் தெரிவிக்கின்றனர்.
பொருளாதாரப் பாதிப்பு:
விவசாயப் உற்பத்திப் பொருட்களைச் சந்தைப்படுத்துவதற்காகக் கொண்டு செல்வதில் பாரிய சிக்கல்கள் எழுந்துள்ளதோடு, வாழ்வாதாரமும் பாதிக்கப்பட்டுள்ளது.
மக்களின் வலியுறுத்தல்:
சம்பந்தப்பட்ட அதிகாரிகள் இவ்விடயத்தில் இனியும் காலம் தாழ்த்தாது, உடனடியாகத் தலையிட்டு நமுனுகுல – தன்னகும்பர பிரதான பாதையை விரைவாகப் புனரமைத்துத் தர வேண்டும் என ஆர்ப்பாட்டக்காரர்கள் வலியுறுத்தினர்.
இந்த ஆர்ப்பாட்டம் காரணமாக அப்பகுதியூடான போக்குவரத்துச் சிறிது நேரம் ஸ்தம்பித்திருந்ததுடன், நமுனுகுல நகரில் பெரும் பரபரப்பும் ஏற்பட்டது.
(செய்தித் தொகுப்பு: நடராஜா மலர்வேந்தன், பசறை நிருபர்)
