ரொனால்டோ அசத்தல் – அடுத்த சுற்றுக்குள் நுழைந்தது போர்ச்சுகல்

உலகக்கிண்ணதொடரில் இன்று அதிகாலை நடைபெற்ற பரபரப்பான போட்டியில் 2-1 என்ற கணக்கிலான வெற்றியின் மூலம் போர்ச்சுகல் அணி அடுத்த சுற்றுக்கு முன்னேறியுள்ளது.

வரும் ஜூலை 6-ஆம் தேதி டல்லாஸ் (Dallas) நகரில் நடைபெறவுள்ள போட்டியில் போர்ச்சுகல் அணி, ஸ்பெயின் அணியை எதிர்கொள்கிறது.

ஆட்டத்தின் முக்கிய நிகழ்வுகள்

ஆட்டத்தின் 4-ஆவது நிமிடத்திலேயே போர்ச்சுகல் அணிக்குக் கோல் அடிக்கும் வாய்ப்பு கிடைத்தது.

ரஃபேல் லியோவின் (Rafael Leao) பாஸைப் பெற்ற புரூனோ ஃபெர்னாண்டஸ் அடித்த ஷாட்டை குரோஷிய கோல்கீப்பர் டொமினிக் லிவகோவிச் (Dominik Livakovic) தடுத்து நிறுத்தினார்.

முதல் பாதியில் போர்ச்சுகல் அணி பல கோல் வாய்ப்புகளைத் தவறவிட்டதற்குப் பலனாக, இரண்டாவது பாதி தொடங்கிய சில நிமிடங்களிலேயே குரோஷியா முதல் கோலை அடித்தது.

ஜோசிப் ஸ்டானிசிச் (Josip Stanisic) கொடுத்த கிராஸை (Cross) பயன்படுத்தி இவான் பெரிசிச் (Ivan Perisic) இந்த கோலை அடித்தார்.

குரோஷிய வீரர் நிகோலா விளாசிச், பெனால்டி பகுதிக்குள் ரெனாடோ வைகாவை இழுத்துப் பிடித்ததால், விஏஆர் (VAR) பரிசோதனைக்குப் பிறகு போர்ச்சுகல் அணிக்கு பெனால்டி வாய்ப்பு வழங்கப்பட்டது.

இதை உலகக்கோப்பையில் தனது 11-ஆவது கோலாக மாற்றிய கிறிஸ்டியானோ ரொனால்டோ, ஆட்டத்தைச் சமன் செய்தார்.

ஆட்டம் முடிய சில நொடிகள் இருந்தபோது (கூடுதல் நேரத்தின் 4-ஆவது நிமிடத்தில்), ரஃபேல் லியோ கொடுத்த அருமையான கிராஸை மாற்று ஆட்டக்காரர் கொன்சலோ ராமோஸ் (Goncalo Ramos) தலையால் முட்டி கோலாக மாற்றி போர்ச்சுகல் அணியை வெற்றி பெறச் செய்தார்.

இந்த ஆட்டத்தில் ஆஃப்சைடு (Offside) காரணமாக மொத்தம் மூன்று கோல்கள் நடுவரால் மறுக்கப்பட்டன.

குரோஷியாவின் இகோர் மடானோவிச் மற்றும் பீட்டர் சுசிக் ஆகியோரின் கோல்களும், போர்ச்சுகல் அணியின் ரொனால்டோ அடித்த ஒரு கோலும் ஆஃப்சைடு என அறிவிக்கப்பட்டன.

ஆட்டத்தின் இறுதி நொடியில் குரோஷியாவின் ஜோஸ்கோ குவார்டியோல் அடித்த கோலும் விஏஆர் பரிசோதனைக்குப் பிறகு ஆஃப்சைடு என மறுக்கப்பட்டது.