அமெரிக்கா மற்றும் இஸ்ரேல் உள்ளிட்ட அதன் தோழமை நாடுகள் மீதான விசாரணைகளை அடுத்து, சர்வதேசக் குற்றவியல் நீதிமன்றத்தை (ICC) முடக்கும் நடவடிக்கையின் ஒரு பகுதியாக, அந்நீதிமன்றத்தின் மீது ட்ரம்ப் நிர்வாகம் கடுமையான புதிய தடைகளை விதித்துள்ளது.
சர்வதேசக் குற்றவியல் நீதிமன்றம் மற்றும் ஏனைய சர்வதேச நீதிமன்றங்களின் முன்னாள் நீதிபதியான தென்னாப்பிரிக்கச் சட்ட வல்லுநர் நவி பிள்ளைக்கு அமைதிக்கான நோபல் பரிசு அறிவிக்கப்பட்டதைத் தொடர்ந்து, வெள்ளிக்கிழமையன்று அமெரிக்க வெளியுறவுத்துறைச் செயலாளர் மார்கோ ரூபியோ இந்தத் தடைகளை அறிவித்தார்.
சமூக வலைதளங்களில் வெளியிட்டுள்ள வீடியோ பதிவில் பேசிய ரூபியோ, “இந்த போலி நீதிமன்றத்துடன் மேற்கொள்ளப்படும் அனைத்துப் பரிவர்த்தனைகளுக்கும் தடை விதிக்கிறோம்; இதன் மூலம் அவர்களின் வளங்களைத் துண்டித்து, நமக்கு எதிராகச் செயல்படும் அவர்களின் திறனை முடக்குவோம். அமெரிக்காவும் அமெரிக்க மக்களும் இந்த போலி சர்வதேசக் குற்றவியல் நீதிமன்றத்தின் வரம்பிற்குள் வர மாட்டார்கள்” என்று தெரிவித்துள்ளார்.
இந்தத் தடைகளின் மூலம், அமெரிக்காவை அடிப்படையாகக் கொண்ட நிதிச் சேவைகள், தொழில்நுட்ப நிறுவனங்கள் மற்றும் அமெரிக்க டாலர் பயன்பாடு ஆகியவற்றிலிருந்து அந்த நீதிமன்றம் துண்டிக்கப்படுகிறது. மேலும், நீதிமன்றத்துடன் வணிகத் தொடர்பு வைத்துள்ள அமெரிக்க நிறுவனங்களும் தனிநபர்களும் அடுத்த ஆறு மாதங்களுக்குள் அந்தத் தொடர்புகளை முடிவுக்குக் கொண்டு வர கெடு விதிக்கப்பட்டுள்ளது.
அமெரிக்காவின் தோழமை நாடான ஜப்பானைச் சேர்ந்த சர்வதேசக் குற்றவியல் நீதிமன்றத்தின் தலைவர் டோமோகோ அகானே இது குறித்து கருத்துத் தெரிவிக்கையில், “கடுமையான குற்றங்களால் பாதிக்கப்பட்ட எண்ணற்ற மக்களின் நலனுக்காக, சட்டம் மற்றும் ஆதாரங்களின் அடிப்படையில் மட்டுமே சுதந்திரமாகவும் நடுநிலையாகவும் நீதிமன்றம் தன் பணிகளைத் தொடர்ந்து முழுமையாக நிறைவேற்றும்” என்று உறுதிபடக் கூறியுள்ளார்.
மேலும், “இது ஒரு தனி அமைப்பைப் பாதுகாப்பது பற்றியது மட்டுமல்ல; மாறாக, சட்டத்தின் ஆட்சியை அடிப்படையாகக் கொண்ட சர்வதேச ஒழுங்கைப் பாதுகாப்பதாகும்” என்று குறிப்பிட்ட அவர், ஏனைய உறுப்பு நாடுகளின் ஆதரவையும் கோரியுள்ளார்.
மனித உரிமை அமைப்புகளும் அமெரிக்காவின் இந்தத் தடை நடவடிக்கைக்குக் கடும் கண்டனம் தெரிவித்துள்ளன.
