கறுப்பு ஜூலை இனவன்முறை தொடர்பான செயல்முறை வெறும் மன்னிப்பு கோருதலோடு நின்றுவிடக் கூடாது. பொறுப்பானவர்களைத் தண்டிப்பதற்கான ஒரு பொறிமுறை இருக்க வேண்டும் என இலங்கை தமிழ் அரசுக் கட்சியின் பதில் பொதுச்செயலர் எம்.ஏ.சுமந்திரன் தெரிவித்துள்ளார்.
1983 ஜூலை மாதம் இடம்பெற்ற தமிழர்களுக்கு எதிரான இன வன்முறைகள் தொடர்பாக நாடாளுமன்றத்தில் எதிர்க்கட்சித் தலைவர் சஜித் பிரேமதாச மன்னிப்பு கோரியது குறித்து கருத்து வெளியிட்ட அவர்,
” இது ஒரு வரவேற்கத்தக்க நகர்வு. முன்னாள் ஜனாதிபதி சந்திரிகா பண்டாரநாயக்க குமாரதுங்க 2001 ஆம் ஆண்டில் இந்த வன்முறைகள் குறித்து விசாரிக்க ஒருஜனாதிபதி ஆணைக்குழுவை நியமித்திருந்தார்.
2004 ஆம் ஆண்டில் அரசாங்கத்தின் சார்பில் அவர் மன்னிப்பு கோரியிருந்தார்.பலர் இதை மறந்துவிட்டார்கள்.
இருபத்தைந்து ஆண்டுகளுக்கு முன்பே ஒரு ஆணைக்குழு நியமிக்கப்பட்டு, அதன் பல பரிந்துரைகள் நடைமுறைப்படுத்தப்பட்டன.
இந்தச் செயல்முறை வெறும் மன்னிப்பு கோருதலோடு நின்றுவிடக் கூடாது. பொறுப்பானவர்களைத் தண்டிப்பதற்கான ஒரு பொறிமுறை இருக்க வேண்டும்.
பொறுப்புக்கூறல் உறுதி செய்யப்பட்டு, பொறுப்பானவர்கள் தண்டிக்கப்பட்டால் அதை நாங்கள் வரவேற்போம்.
அதேவேளை, ராஜபக்ச குடும்பத்தினர் மீது குற்றச்சாட்டுகள் முன்வைக்கப்பட்டுள்ளன; விசாரணைகள் நடத்தப்பட்டு வருகின்றன, கைது நடவடிக்கைகளும் மேற்கொள்ளப்படுகின்றன.
இந்தக் குற்றச்சாட்டுகள் மிகவும் தீவிரமானவை. இது ஊழல் தொடர்பான விவகாரம் என்பதால், முறையான விசாரணைகள் நடத்தப்பட வேண்டும்.
இந்த விசாரணைகளை நாங்கள் வரவேற்கிறோம், குற்றச்சாட்டுகள் குறித்து முழுமையான விசாரணை நடத்தப்பட வேண்டும்’ என்றும் சுமந்திரன் வலியுறுத்தியுள்ளார்.
