“மாகாணசபைத் தேர்தலை நடத்த வேண்டிய கட்டாயச் சூழ்நிலை இந்த அரசாங்கத்திற்கு ஏற்படும்; மேலும் மேல்மாகாணசபை முதல்வர் வேட்பாளராகக் களமிறங்குவதற்குத் தான் தயார்” என்று ஐக்கிய மக்கள் சக்தியின் ஊடகப் பேச்சாளர் எஸ்.எம். மரிக்கார் எம்.பி. தெரிவித்தார்.
தனியார் தொலைக்காட்சியொன்றுக்கு வழங்கிய நேர்காணலின்போதே அவர் இவ்வாறு கூறினார்.
இது தொடர்பில் அவர் மேலும் கூறியவை வருமாறு:
“ஐக்கிய மக்கள் சக்தி மற்றும் ஐக்கிய தேசியக் கட்சியின் இணைவு என்பது இரு கட்சிகளும் ஒரே கட்சியாக மாறுவது எனக் அர்த்தமாகாது. அடுத்து வரும் தேர்தல்களில் பொதுச் சின்னத்தின் கீழ் இரு கட்சிகளும் ஒன்றிணைந்து போட்டியிடும்.
இந்த அரசாங்கம் மாகாணசபைத் தேர்தலை நடத்தும்; அவ்வாறு நடத்துவதற்குரிய சூழ்நிலை உருவாகும்.
ஐக்கிய மக்கள் சக்தியை உருவாக்கிய நபர்களில் நானும் ஒருவன். எனவே, மேல் மாகாணசபைத் தேர்தலில் முதல்வர் வேட்பாளராகக் களமிறங்குமாறு கட்சியும் எனது ஆதரவாளர்களும் கேட்டுக்கொண்டால், நிச்சயம் அந்தச் சவாலை ஏற்பேன்” என்றார் எஸ்.எம். மரிக்கார்.
