இந்தியா நிர்ணயித்த இமாலய இலக்கை எட்டி மே.தீவுகள் அணி சாதனை வெற்றி

இந்தியா நிர்ணயித்த 250 ரன்கள் என்ற இமாலய இலக்கை சாய் ஹோப்பின் அதிரடி சதத்தின் உதவியுடன் எளிதாக எட்டி, 6 விக்கெட்டுகள் வித்தியாசத்தில் மேற்கிந்திய தீவுகள் அணி வெற்றி பெற்றது.

இந்தியா மற்றும் மேற்கிந்திய தீவுகள் அணிகளுக்கு இடையிலான 2-வது T20 போட்டியில், முதலில் துடுப்பெடுத்தாடிய இந்தியா 20 ஓவர்களில் 5 விக்கெட் இழப்பிற்கு 249 ரன்கள் குவித்தது.

அடுத்து களம் இறங்கிய மேற்கிந்திய தீவுகள் அணி, 18.3 ஓவர்களிலேயே 4 விக்கெட்டுகளை மட்டும் இழந்து 252 ரன்கள் எடுத்து அபார வெற்றி பெற்றது.

நாணயச் சுழற்சியில் வென்று களம் கண்ட இந்திய அணிக்கு சஞ்சு சாம்சன் அதிரடித் தொடக்கத்தை அளித்தார். இந்தியா 4.2 ஓவர்களிலேயே 50 ரன்களைக் கடந்ததோடு, முதலாவது பவர்பிளே (6 ஓவர்கள்) முடிவில் 1 விக்கெட் இழப்பிற்கு 79 ரன்கள் குவித்தது.

வெறும் 21 பந்துகளில் 52 ரன்கள் விளாசிய சஞ்சு சாம்சன் (6 பவுண்டரிகள், 3 சிக்ஸர்கள்), மேற்கிந்திய தீவுகளின் பந்துவீச்சை ஆரம்பத்திலேயே துவம்சம் செய்தார்.

சாம்சனும் இஷான் கிஷனும் இணைந்து 22 பந்துகளில் 50 ரன்கள் கூட்டிணைப்பை உருவாக்கினர். இதில் இஷான் கிஷன் 12 பந்துகளில் 17 ரன்களும், சாம்சன் வெறும் 10 பந்துகளில் 33 ரன்களும் விளாசினர்.

தொடர்ந்து அதிரடியைத் தக்கவைத்த இந்திய அணி 8.1 ஓவர்களில் 100 ரன்களையும், 12.2 ஓவர்களில் 150 ரன்களையும் எட்டியது.

நடுவரிசையில் ஷ்ரேயாஸ் ஐயர் மற்றும் திலக் வர்மா கூட்டணி அணியின் ரன் வேகத்தை மேலும் உயர்த்தியது. இவர்கள் இருவரும் இணைந்து 22 பந்துகளில் 50 ரன்கள் சேர்த்தனர். இதில் ஷ்ரேயாஸ் ஐயர் 11 பந்துகளில் 31 ரன்களும், திலக் வர்மா 11 பந்துகளில் 21 ரன்களும் எடுத்தனர்.

இறுதியில் இந்தியா 20 ஓவர்கள் முடிவில் 5 விக்கெட் இழப்பிற்கு 249 ரன்கள் என்ற இமாலய இலக்கை நிர்ணயித்தது.

250 ரன்கள் என்ற கடினமான இலக்கை நோக்கி களம் இறங்கிய மேற்கிந்திய தீவுகள் அணி, ஆரம்ப முதலே அதிரடி ஆட்டத்தை வெளிப்படுத்தியது. 4.4 ஓவர்களில் 50 ரன்களை எட்டிய அந்த அணி, பவர்பிளேயில் 3 விக்கெட்டுகளை இழந்தபோதிலும் 6 ஓவர்களில் 72 ரன்களைக் குவித்தது.

சாய் ஹோப்பும் , ரோவ்மேன் பவலும் இணைந்து 25 பந்துகளில் 50 ரன்கள் சேர்த்தனர். இதில் பவல் 11 பந்துகளில் 23 ரன்களும், ஹோப் 14 பந்துகளில் 29 ரன்களும் எடுத்தனர். 8.1 ஓவர்களில் மேற்கிந்திய தீவுகள் 100 ரன்களை எட்டியது.

16.1 ஓவர்களில் 200 ரன்களைக் கடந்த மேற்கிந்திய தீவுகள் அணி, 18.3 ஓவர்களிலேயே இலக்கை அடைந்து 9 பந்துகள் மீதமிருந்த நிலையில் 6 விக்கெட் வித்தியாசத்தில் பிரம்மாண்ட வெற்றியைப் பதிவு செய்தது.

கடைசி வரை ஆட்டமிழக்காமல் இருந்த சாய் ஹோப், 45 பந்துகளில் 7 பவுண்டரிகள் மற்றும் 8 சிக்ஸர்களுடன் (ஸ்ட்ரைக் ரேட் 222.22) தனது அபார சதத்தைப் பூர்த்தி செய்தார்.