நுவரெலியா நிருபர் எஸ்.தியாகு
தோட்டத் தொழிலாளியின் மகன் மீது தோட்ட முகாமையாளர் உள்ளிட்ட குழுவினர் தாக்குதல் நடத்திய சம்பவத்தைக் கண்டித்து, உடபுஸ்ஸல்லாவ – பெயாலமன்ட் (Blairlomond) தோட்டத்தைச் சேர்ந்த சென்மார்கிரட் பிரிவின் தொழிலாளர்கள் இன்று (15) பணிப்புறக்கணிப்பு போராட்டத்தில் ஈடுபட்டனர்.
சம்பவத்தின் பின்னணி
மேற்படி தோட்டத்தை சேர்ந்த ரூபராணி என்ற பெண் தொழிலாளியின் ஊழியர் சேமலாப நிதி (EPF) தொடர்பான ஆவணங்கள் கிடைப்பதில் நீண்டகால தாமதம் ஏற்பட்டுள்ளது. இது குறித்து விசாரிப்பதற்காக அவரது மகனான சுப்பையா நிரோசன் (37) என்பவர், பெயாலமன்ட் பிரிவு அலுவலகத்திற்குச் சென்றுள்ளார்.
அங்கு ஆவணங்கள் தாமதமாவதற்கான காரணம் குறித்து அவர் விசாரித்துக் கொண்டிருந்தபோது, அங்கு வந்த தோட்ட முகாமையாளர், உதவி முகாமையாளர் மற்றும் வெளிக்கள உத்தியோகஸ்தர்கள் இணைந்து இளைஞன் மீது தாக்குதல் நடத்தியதாகக் கூறப்படுகிறது.
பாதிக்கப்பட்ட இளைஞர் இது குறித்துத் தெரிவிக்கையில்:
“தோட்ட முகாமையாளர் முதலில் தனது மோட்டார் சைக்கிள் தலைக்கவசத்தால் (Helmet) என்னைத் தாக்கினார். நான் கீழே விழுந்ததும், அங்கிருந்த உதவி முகாமையாளரும் வெளிக்கள உத்தியோகஸ்தரும் என்னை காலால் உதைத்தனர்.”
காயமடைந்த நிரோசன், அவரது தாயாரால் மீட்கப்பட்டு உடபுஸ்ஸல்லாவ பிரதேச வைத்தியசாலையில் அனுமதிக்கப்பட்டார். பின்னர் மேலதிக சிகிச்சைக்காக அவர் நுவரெலியா மாவட்ட பொது வைத்தியசாலைக்கு மாற்றப்பட்டுள்ளார்.
காவல்துறை நடவடிக்கை
இச்சம்பவம் குறித்து இரு தரப்பினரும் உடபுஸ்ஸல்லாவ காவல் நிலையத்தில் புகார் அளித்துள்ளனர். இளைஞர் தரப்பில் தாக்குதல் குறித்து புகார் அளிக்கப்பட்ட நிலையில், முகாமையாளர் தரப்பில் ‘தமது கடமைக்கு இடையூறு விளைவித்ததாக’ புகார் அளிக்கப்பட்டுள்ளது.
தாக்குதல் நடத்தியதாகக் கூறப்படும் மூவரில் இருவரை உடபுஸ்ஸல்லாவ காவல்துறையினர் நேற்று (14.05.2026) மாலை கைது செய்தனர். அவர்கள் இன்று (15.05.2026) வலப்பனை நீதிமன்றத்தில் ஆஜர்படுத்தப்பட்ட நிலையில், பிணையில் செல்ல நீதிமன்றம் அனுமதி வழங்கியுள்ளது.
இச்சம்பவம் தொடர்பாக நாளை (16.05.2026) கந்தப்பளை உடபுஸ்ஸல்லாவ பெருந்தோட்ட நிறுவன அலுவலகத்தில் விசேட கலந்துரையாடல் ஒன்று நடைபெறவுள்ளது.
தொடர்புடைய தோட்ட முகாமையாளர் மற்றும் உதவி முகாமையாளரை உடனடியாக அந்தத் தோட்டத்திலிருந்து இடமாற்றம் செய்ய வேண்டும் என்பதே தொழிலாளர்களின் பிரதான கோரிக்கையாக உள்ளது.
பேச்சுவார்த்தையில் சுமுகமான முடிவு எட்டப்படாத பட்சத்தில், நுவரெலியா மாவட்டம் தழுவிய ரீதியில் பாரிய வேலை நிறுத்தப் போராட்டத்தை முன்னெடுக்கவுள்ளதாகத் தொழிலாளர்கள் எச்சரித்துள்ளனர்.
தொழிலாளர்களுக்கு ஆதரவு தெரிவித்து தொழிற்சங்க பிரதிநிதிகளும் இன்று அங்கு சென்று மக்களுடன் கலந்துரையாடலில் ஈடுபட்டனர்.
