2027ஆம் ஆண்டுக்கான வரவு – செலவுத் திட்டத்தின் இரண்டாம் வாசிப்பு மீதான விவாதம் இன்று (13) நாடாளுமன்றத்தில் ஆரம்பமாகியுள்ளது.
முற்பகல் 11 மணி முதல் மாலை 6 மணி வரை நடைபெறவுள்ள இன்றைய விவாதத்தில் ஆளுங்கட்சி சார்பில் 21 உறுப்பினர்களும், எதிர்க்கட்சிகள் சார்பில் ஆறு உறுப்பினர்களும் உரையாற்றவுள்ளனர்.
இந்நிலையில், மலையக மக்களின் பிரதிநிதித்துவம் தொடர்பிலும் இன்றைய விவாதம் முக்கியத்துவம் பெற்றுள்ளது.
ஆளுங்கட்சி சார்பில் மலையகத்தைப் பிரதிநிதித்துவப்படுத்தும் பதுளை மாவட்ட நாடாளுமன்ற உறுப்பினர் கிட்ணன் செல்வராஜாவுக்கு 8 நிமிடங்களும், நுவரெலியா மாவட்ட நாடாளுமன்ற உறுப்பினர் கிருஸ்ணன் கலைச்செல்விக்கு 8 நிமிடங்களும் உரையாற்றுவதற்கு நேரம் ஒதுக்கப்பட்டுள்ளது.
அதேவேளை, எதிர்க்கட்சி சார்பில் மலையக மக்களின் பிரதிநிதியாக நுவரெலியா மாவட்ட நாடாளுமன்ற உறுப்பினர் ஜீவன் தொண்டமான் உரையாற்றவுள்ளார். அவருக்கு 18 நிமிடங்கள் ஒதுக்கப்பட்டுள்ளன.
இன்றைய விவாதத்தில் ஜீவன் தொண்டமானின் உரை அரசியல் மற்றும் மலையக மக்கள் மத்தியில் விசேட கவனத்தைப் பெற்றுள்ளது.
குறிப்பாக, 2027ஆம் ஆண்டுக்கான வரவு – செலவுத் திட்டத்தில் மலையக மக்களின் வாழ்வாதாரம், பொருளாதார முன்னேற்றம் மற்றும் சமூக அபிவிருத்தி ஆகியவற்றுக்காக ஒதுக்கப்பட்டுள்ள நிதி போதுமானதா என்பது தொடர்பில் அவர் தனது கருத்துக்களை முன்வைப்பார் என எதிர்பார்க்கப்படுகின்றது.
தோட்டத் தொழிலாளர்களின் சம்பளப் பிரச்சினை, பெருந்தோட்ட மக்களின் வீடமைப்பு, காணி உரிமை, சுகாதாரம், கல்வி, குடிநீர் வசதி, உட்கட்டமைப்பு அபிவிருத்தி மற்றும் இளைஞர்களுக்கான வேலைவாய்ப்புகள் உள்ளிட்ட பல்வேறு விடயங்கள் அவரது உரையில் முக்கியத்துவம் பெறலாம் என எதிர்பார்க்கப்படுகிறது.
குறிப்பாக, மலையக மக்களின் அபிவிருத்திக்காக கடந்த காலங்களில் முன்வைக்கப்பட்ட திட்டங்கள் எந்தளவுக்கு நடைமுறைப்படுத்தப்பட்டுள்ளன என்பதையும், தற்போதைய வரவு – செலவுத் திட்டத்தில் அவற்றுக்கான நிதி ஒதுக்கீடுகள் எவ்வாறு அமைந்துள்ளன என்பதையும் அவர் ஒப்பீட்டு ரீதியில் எடுத்துரைப்பார் என எதிர்பார்க்கப்படுகின்றது.
