உலகக் கோப்பை தொடரில் நடைபெற்ற மற்றுமொரு பரபரப்பான ஆட்டத்தில் போர்த்துகல் அணியை 1-0 என்ற கோல் கணக்கில் வீழ்த்தியுள்ளது ஸ்பெயின்.
போர்த்துகல் அடைந்த இந்த தோல்வியை அடுத்து , தனது கடைசி உலகக் கோப்பை போட்டியில் விளையாடிவிட்டதாக கிறிஸ்டியானோ ரொனால்டோ உறுதிப்படுத்தியுள்ளார்.
“நான் நலமாக இருக்கிறேன், ஆனால் இந்த முறையில் உலகக் கோப்பையிலிருந்து வெளியேறுவது வருத்தமளிக்கிறது.
நேற்று செய்தியாளர் சந்திப்பில் நான் கூறியது போல, எனது முழு திறமையையும் வெளிப்படுத்தினேன், ஒரு தெளிவான மனசாட்சியுடன் நான் வெளியேறுகிறேன்” என்று போட்டியின் முடிவில் அவர் தெரிவித்தார்.
“இதுதான் ஒரு கால்பந்து வீரரின் வாழ்க்கை. சில நேரங்களில் நாம் வெல்வோம், சில நேரங்களில் தோற்போம், நாம் தொடர்ந்து முன்னேறிச் செல்ல வேண்டும். உண்மை என்னவென்றால், இதுவே எனது கடைசி உலகக் கோப்பை.
உணர்ச்சிவசப்பட்டு எந்தவொரு முடிவையும் எடுக்காமல் இருக்க, இப்போது எனது குடும்பத்தினருடன் நேரத்தைச் செலவிடுவேன்.
[நாளை] நான் ஒரு தெளிவான மனசாட்சியுடன் எழுந்திருப்பேன். போர்ச்சுகல் அணிக்காக நான் மூன்று பட்டங்களை வென்றுள்ளேன் [ஒரு ஐரோப்பிய சாம்பியன்ஷிப் மற்றும் இரண்டு யுஇஎஃப்ஏ நேஷன்ஸ் லீக் தொடர்கள்].
கிறிஸ்டியானோவுக்கு முன்பு, போர்ச்சுகல் எந்தவொரு பட்டத்தையும் வென்றதில்லை. எனவே, நான் தெளிவான மனசாட்சியுடன் விடைபெறுகிறேன். எனது சிறந்த பங்களிப்பை அளித்துள்ளேன். நாளை ஒரு புதிய நாளாக விடியும், வாழ்க்கை தொடரும்.”
41 வயதான ரொனால்டோ, முதன்முதலில் 2006 ஜெர்மனி உலகக் கோப்பை தொடரில் விளையாடினார். அங்கு ஈரான் அணிக்கு எதிராக தனது முதல் உலகக் கோப்பை கோலை அடித்த அவர், 40 ஆண்டுகளில் முதன்முறையாக போர்ச்சுகல் அணி அரையிறுதிக்கு முன்னேற உதவினார்.
அதைத்தொடர்ந்து 2010 தென்னாப்பிரிக்கா, 2014 பிரேசில், 2018 ரஷ்யா மற்றும் 2022 கத்தார் ஆகிய உலகக் கோப்பை தொடர்களிலும் விளையாடி, அவை ஒவ்வொன்றிலும் குறைந்தபட்சம் ஒரு கோலையாவது பதிவு செய்தார்.
2026 ஃபிஃபா உலகக் கோப்பையின் போர்ச்சுகல் அணியின் இரண்டாவது போட்டியில், உஸ்பெகிஸ்தான் அணியின் எல்லைக்குள் (Box) தனக்கான இடத்தை உருவாக்கி, ஒரு குறுக்கு பந்தை (Cross) தனது வழக்கமான பாணியில் கோலாக மாற்றினார்.
இதன் மூலம் ஆறு உலகக் கோப்பை தொடர்களில் கோல் அடித்த முதல் வீரர் என்ற வரலாற்றுச் சாதனையை அவர் படைத்தார்.
ஒட்டுமொத்தமாக, இந்த முன்னணி வீரர் 27 உலகக் கோப்பை போட்டிகளில் விளையாடியுள்ளார் – இது உலகக் கோப்பை வரலாற்றில் அதிக போட்டிகளில் விளையாடியவர்கள் பட்டியலில் அவரை இரண்டாவது இடத்திற்கு கொண்டு சென்றுள்ளது – மேலும் அவர் மொத்தம் 11 கோல்களையும் அடித்துள்ளார்.
