நீதித்துறைக்குள் அரசியல் சூழ்ச்சியா? நீதிபதிகளின் ஓய்வு வயது நீடிப்பிற்கு ஜி.எல்.பீரிஸ் கடும் எதிர்ப்பு

அரசியலமைப்பின் 107 ஆவது பிரிவின் (v) துணைப் பிரிவைத் திருத்துவதற்கு அரசாங்கம் திட்டமிட்டுள்ளதாக பேராசிரியர் ஜி.எல்.பீரிஸ் தெரிவித்தார். இதன் மூலம் உச்ச நீதிமன்ற நீதிபதிகளின் ஓய்வு பெறும் வயது 65 இலிருந்து 67 ஆகவும், மேன்முறையீட்டு நீதிமன்ற நீதிபதிகளின் ஓய்வு பெறும் வயது 63 இலிருந்து 65 ஆகவும் நீடிக்கப்படவுள்ளதாக அவர் குறிப்பிட்டார்.

கொள்ளுப்பிட்டி அமாரி ஹோட்டல் கேட்போர் கூடத்தில் நேற்று (9) கூட்டு எதிர்க்கட்சியினால் ஏற்பாடு செய்யப்பட்டிருந்த “நீதித்துறையின் சுதந்திரத்தை சீர்குலைக்கும் அரசியல் சூழ்ச்சிகளை தோற்கடிப்போம்” என்ற மாநாட்டில் கலந்துகொண்டு உரையாற்றும் போதே அவர் இதனைத் தெரிவித்தார்.

அங்கு தொடர்ந்து உரையாற்றிய பேராசிரியர் ஜி.எல்.பீரிஸ், இந்த முன்மொழியப்பட்ட திருத்தங்களை அரசாங்கம் வெற்றிகரமாக நிறைவேற்றினால், இந்த நாட்டில் நீண்டகாலமாகப் பாதுகாக்கப்பட்ட ஜனநாயகக் கலாச்சாரம் மற்றும் நிறுவனங்கள் அனைத்தும் முற்றாக அழிந்துவிடும் என்பதை எவ்வித மிகைப்படுத்தலுமின்றி கூற வேண்டும் என்றார்.

“சட்டத்தரணிகள் சங்கம் இந்தத் திருத்தத்தை முற்றாக எதிர்க்கிறது. சட்டத்தரணிகளோ, நீதிபதிகளோ அல்லது சிவில் சமூகத்தினரோ இந்தத் திருத்தத்தைக் கோரவில்லை. குறுகிய சுயநல அரசியல் நோக்கங்களை நிறைவேற்றிக் கொள்வதற்காகவே அரசியலமைப்பை இவ்வாறு திருத்துவதற்கு தற்போதைய அரசாங்கத்திற்கு இந்தத் தேவை ஏற்பட்டுள்ளது” என்றும் அவர் கூறினார்.

ஒவ்வொரு நாட்டிற்கும் உள்ள தனித்துவமான தீர்வுகளாக சில நாடுகளில் நீதிபதிகளின் ஓய்வு பெறும் வயது மாறுபடும் என்றும், அந்த நாடுகளில் உள்ள அனைத்து நீதிபதிகளும் சமமாகவே நடத்தப்படுகிறார்கள் என்றும் கூறிய பேராசிரியர், இலங்கையில் இந்த ஆண்டு உச்ச நீதிமன்றத்தின் 3 நீதிபதிகள் ஓய்வு பெற்றுள்ளதாகவும், இந்தத் திருத்தம் அடுத்த மாதம் கொண்டுவரப்பட்டால், இந்த ஆண்டு இதுவரை ஓய்வு பெற்ற நீதிபதிகளுக்கு இந்தத் திருத்தம் பொருந்தாது என்றும் சுட்டிக்காட்டினார்.

உச்ச நீதிமன்ற மற்றும் மேன்முறையீட்டு நீதிமன்ற நீதிபதிகளின் ஓய்வு பெறும் வயதை மேலும் இரண்டு வருடங்களால் நீடிப்பதற்கு அரசாங்கம் எடுத்துள்ள தீர்மானத்தின் காரணமாக, இந்நாட்டின் ஒட்டுமொத்த நீதித்துறை அமைப்பில் உள்ள ஏனைய நீதிபதிகளின் பதவி உயர்வு வாய்ப்புகள் முற்றாக முடக்கப்படும் கடுமையான அபாயம் ஏற்பட்டுள்ளதாகக் கூறிய பேராசிரியர் ஜி.எல்.பீரிஸ், இதன் காரணமாக ஒட்டுமொத்த நீதித்துறை சேவை அதிகாரிகளும் பெரும் ஏமாற்றமடைந்துள்ளனர் என்றார்.

இந்த புதிய முடிவு நடைமுறைப்படுத்தப்பட்டால், மேல் நீதிமன்றங்கள், மாவட்ட நீதிமன்றங்கள் மற்றும் நீதவான் நீதிமன்றங்களில் பணிபுரியும் நூற்றுக்கணக்கான நீதிபதிகளின் தொழில்சார் எதிர்காலம் கடுமையாகப் பாதிக்கப்படும் என்றும், இந்நாட்டின் நீதவான் நீதிமன்றம் முதல் உச்ச நீதிமன்றம் வரையான அனைத்து நீதிமன்றங்களிலும் பணிபுரியும் பெரும்பான்மையான நீதிபதிகள் 26 வருடங்களுக்கும் மேலாக பல்கலைக்கழக அமைப்பினூடாக சட்டக் கல்வியைப் பெற்று வந்தவர்கள் என்றும் அவர் கூறினார்.

25, 30, 35 வருடங்கள் என நீண்ட காலம் தொடர்ச்சியாக நீதித்துறை சேவையில் ஈடுபட்டுள்ள நீதிபதிகளின் ஒரே நம்பிக்கையும் எதிர்பார்ப்பும் தாங்கள் தேர்ந்தெடுத்த தொழிலில் உயர்ந்த நிலையை அடைவதாகும் என்றும், நீதவான் நீதிமன்றத்தில் இருந்து மாவட்ட நீதிமன்றத்திற்கும், அங்கிருந்து மேல் நீதிமன்றம், மேன்முறையீட்டு நீதிமன்றம் மற்றும் இறுதியாக உச்ச நீதிமன்றம் வரை பதவி உயர்வு பெறுவது மனித இயல்பு மற்றும் தொழில்சார் லட்சியமாகும் என்றும் அவர் தெரிவித்தார்.

நீதித்துறையில் உள்ள திறமையான நிபுணர்களுக்கு மாற்று வழிகள் மூலம் பெருமளவு பணம் சம்பாதிப்பதற்கான வாய்ப்புகள் இருந்தபோதிலும், அவர்கள் தொழில்சார் கண்ணியம் மற்றும் சேவை திருப்திக்காகவே தங்களின் விருப்பத்தின் பேரில் நீதிபதிகளாக பணியாற்ற தீர்மானிக்கிறார்கள் என்று கூறிய பேராசிரியர், மேல் நீதிமன்றங்களின் நீதிபதிகளின் சேவைக்காலம் நீடிக்கப்படுவதால், கீழ் நீதிமன்றங்களில் உள்ள நீதிபதிகள் தாங்கள் எதிர்பார்த்த பதவிகளை அடைவதற்கு முன்பே, எதிர்பாராத விதமாக ஓய்வு பெற நேரிடும் என்றும், இதனால் அவர்கள் தங்களின் தற்போதைய பதவிகளிலேயே தொடர்ந்து நீடிக்க வேண்டிய நிலை ஏற்படும் என்றும் குறிப்பிட்டார்.

இந்த தன்னிச்சையான முடிவினால் ஒட்டுமொத்த நீதித்துறை சேவையும் முடங்கும் அபாயமும், நீதிபதிகள் தொழில் ரீதியாக கடுமையான அநீதிக்கு உள்ளாகும் போக்கும் காணப்படுவதால், இது குறித்து பொறுப்பு வாய்ந்தவர்கள் உடனடியாக கவனம் செலுத்த வேண்டும் என்றும் பேராசிரியர் ஜி.எல்.பீரிஸ் வலியுறுத்தினார்.

ஜனாதிபதி சட்டத்தரணி மைத்ரி குணரத்ன மற்றும் ஜெப்ரி அழகரத்னம் ஆகியோரின் கருத்துக்கள்

சுதந்திர சட்டத்தரணிகள் சங்கத்தின் தலைவரான ஜனாதிபதி சட்டத்தரணி மைத்ரி குணரத்ன உரையாற்றுகையில், இன்று இந்த அரசாங்கத்திற்கு தேவையாயிருப்பது உச்ச நீதிமன்ற நீதிபதிகளின் சேவைக்காலத்தை நீடித்துக் கொள்வதேயாகும் என்றும், இன்றைய நிலவரப்படி உச்ச நீதிமன்றம் மற்றும் மேன்முறையீட்டு நீதிமன்றங்களில் 8 வெற்றிடங்கள் நிலவுவதாகவும் கூறினார்.

பொதுவாக இந்த வெற்றிடங்கள் மேன்முறையீட்டு நீதிமன்றத்தில் இருந்து 3 பேரும், சட்டமா அதிபர் திணைக்களத்தில் இருந்து ஒருவரும் அல்லது சட்டத்தரணிகளுக்கு இடையில் உள்ள ஒருவரும் நியமிக்கப்படுவதன் மூலம் நிரப்பப்படும் என்று கூறிய மைத்ரி குணரத்ன, அண்மைக்காலமாக மேன்முறையீட்டு நீதிமன்றத்திலிருந்தே நியமனங்கள் வழங்கப்பட்டுள்ளதாகக் குறிப்பிட்டார்.

உச்ச நீதிமன்றத்தில் வழக்குகளை விசாரணை செய்வதற்கு ஒரு அமர்வில் (Bench) கட்டாயமாக 3 நீதிபதிகள் இருக்க வேண்டும். உச்ச நீதிமன்றம் வரையறுக்கப்பட்ட எண்ணிக்கையிலான நீதிமன்றங்களையே கொண்டிருக்க முடியும் என்பதோடு, தற்போது 4 நீதிபதிகள் குறைவாக உள்ளதாக ஜனாதிபதி சட்டத்தரணி மைத்ரி குணரத்ன தெரிவித்தார்.

இதன்போது, சட்டத்தரணிகள் சங்கத்தின் முன்னாள் தலைவரான ஜனாதிபதி சட்டத்தரணி ஜெப்ரி அழகரத்னமும் தனது கருத்துக்களைப் பகிர்ந்துகொண்டார்.

இந்நிகழ்வில் முன்னாள் அமைச்சர்கள், நாடாளுமன்ற உறுப்பினர்கள் மற்றும் எதிர்க்கட்சி அரசியல் அமைப்புகளின் தலைவர்கள் பலர் கலந்துகொண்டனர்.