எரிபொருள் விலையேற்றம் அதிகரிப்புக்கான காரணம் தொடர்பில் இலங்கை பெற்றோலியக் கூட்டுத்தாபனம் இன்று விளக்கமளித்துள்ளது.
குறிப்பாக உலகச் சந்தையில் எரிபொருள் விலைகள் கடுமையாக உயர்ந்துள்ள போதிலும், அதன் முழுச் சுமையையும் நுகர்வோர் மீது சுமத்தாமல் இலங்கை பெற்றோலியக் கூட்டுத்தாபனம் (CPC) கணிசமான தொகையைத் தொடர்ந்து ஏற்றுக்கொண்டு வருவதாக அதன் தலைவர் டி.ஜே. ராஜகருணா தெரிவித்துள்ளார்.
கடந்த பெப்ரவரி மாதத்துடன் ஒப்பிடுகையில் சர்வதேசச் சந்தையில் டீசல் மற்றும் பெட்ரோல் விலைகள் கணிசமாக உயர்ந்துள்ளதாகக் குறிப்பிட்ட அவர், இலங்கை கொள்முதல் செய்யும் கச்சா எண்ணெயின் விலை பேரல் ஒன்றுக்குச் சுமார் 69 அமெரிக்க டாலரிலிருந்து 115 அமெரிக்க டாலர் வரை உயர்ந்துள்ளதாகவும் சுட்டிக்காட்டினார்.
தற்போதைய சர்வதேச நிலவரத்தின் அடிப்படையில், ஒரு லிட்டர் டீசலின் உண்மைச் செலவு சுமார் 528 ரூபாய் எனப் பட்டியலிடப்பட்டுள்ள போதிலும், உள்நாட்டுச் சந்தையில் அது 392 ரூபாய்க்கே விற்பனை செய்யப்படுவதாக அவர் தெரிவித்துள்ளார்.
இதனால் லிட்டருக்கு ஏற்படும் 136 ரூபாய் இழப்பில், அரசாங்கம் அறிவித்துள்ள எரிபொருள் நிவாரணத் திட்டத்தின் கீழ் 70 ரூபாயை அரசாங்கம் ஏற்றுக்கொள்கிறது. மீதமுள்ள சுமார் 66 ரூபாய் இழப்பை CPC ஏற்றுக்கொள்வதாக அவர் கூறியுள்ளார்.
அடுத்த மூன்று மாதங்களுக்கு டீசல் நிவாரணம் வழங்குவதற்காக அரசாங்கம் 41 பில்லியன் ரூபாயை ஒதுக்கியுள்ளது.
இதேவேளை, ஒரு லிட்டர் பெட்ரோலின் தற்போதைய உற்பத்திச் செலவு சுமார் 446 ரூபாய் எனக் கணக்கிடப்பட்டுள்ள நிலையில், சமீபத்திய விலை திருத்தத்திற்குப் பிறகு ‘ஆக்டேன் 92’ பெட்ரோல் 414 ரூபாய்க்கு விற்பனை செய்யப்படுவதாக பெற்றோலியக் கூட்டுத்தாபனத் தலைவர் தெரிவித்துள்ளார்.
மேலும், ஒரு லிட்டர் சூப்பர் டீசலின் உண்மைச் செலவு சுமார் 581 ரூபாய் என்றபோதிலும், அது 528 ரூபாய்க்கு விற்பனை செய்யப்படுவதால், லிட்டருக்கு ஏற்படும் சுமார் 53 ரூபாய் இழப்பையும் CPC ஏற்றுக்கொள்கிறது.
சர்வதேச எரிபொருள் விலை உயர்வின் முழுத் தாக்கமும் நுகர்வோருக்கு நேரடியாக மாற்றப்படவில்லை என்பதையே இந்த புள்ளிவிவரங்கள் காட்டுவதாக பெற்றோலியக் கூட்டுத்தாபனத் தலைவர் தெரிவித்துள்ளார். தலைவர் மேலும் குறிப்பிட்டுள்ளார்.
