கண்டி, கலஹா பொலிஸ் பிரிவுக்குட்பட்ட பேரவத்தை பகுதியில் மேலுமொருவருக்கு கொரோனா வைரஸ் தொற்று இன்று (07.11.2020) உறுதிப்படுத்தப்பட்டுள்ளது.14 வயதுடைய மாணவரொருவருக்கே இவ்வாறு வைரஸ் தொற்றியுள்ளது. இதனையடுத்து அவருடன் தொடர்பில் இருந்தவர்கள் தனிமைப்படுத்தப்பட்டு, அவர்களிடமும் பிசிஆர் பரிசோதனை நடத்தப்பட்டுள்ளது.

கலஹா – பேரவத்தை பகுதியில் இருந்து கடந்த மாதம் 15 ஆம் திகதி16 வயதுடைய சிறுவனும், அவரின் பெற்றோரும் மீன் வாங்குவதற்காக பேலியகொடை மீன் சந்தைக்குச்சென்று மறுநாள் ஊர் திரும்பினர்.

பேலியகொடை கொரோனா கொத்தணி பரவலையடுத்து இவர்களிடம் கடந்த மாதம் 24 ஆம் திகதி பிசிஆர் பரிசோதனைக்கான மாதிரிகள் பெறப்பட்டன. பரிசோதனை முடிவுகள் 26 ஆம் திகதி வெளியாகின. இதில் 16 வயதுடைய சிறுவனுக்கு வைரஸ் தொற்று உறுதியானது.

இதனையடுத்து இவர்களுடன் தொடர்பில் இருந்த ஐந்து குடும்பங்களைச் சேர்ந்தவர்கள் சுய தனிமைக்கு உட்படுத்தப்பட்டனர். இந்நிலையில் 14 வயதுடைய சிறுவன் ஒருவருக்கு நோய் அறிகுறிகள் தென்பட்டதால் அவரிடம் நேற்று முன்தினம் 5 ஆம் திகதி பிசிஆர் பரிசோதனைக்கான மாதிரிகள் பெறப்பட்டன. இன்று (7) பிசிஆர் பரிசோதனை முடிவு வெளியானது. இதில் அவருக்கு வைரஸ் தொற்று உறுதியானது.

எனவே, ஏனைய உறுப்பினர்களிடமும் இன்று பிசிஆர் பரிசோதனைக்கான மாதிரிகள் பெறப்பட்டன. கொரோனா தொற்றுக்குள்ளான சிறுவர் கொரோனா சிகிச்சை நிலையத்துக்கு சுகாதார பாதுகாப்பு ஏற்பாடுகளுடன் அழைத்துச்செல்லப்படவுள்ளார்.

21/4 தற்கொலை குண்டு தாக்குதலின் முக்கிய சூத்திரதாரியான சஹ்ரானின் மனைவியான அப்துல் காதர் பாத்திமா ஹதியா என்பவருக்கு கொரோனா வைரஸ் தொற்றியுள்ளது. இதனையடுத்து அவர் பொலன்னறுவை, வெலிகந்தையிலுள்ள கொரோனா விசேட சிகிச்சை நிலையத்துக்கு கொண்டுசெல்லப்பட்டுள்ளார்.

வெலிக்கடை சிறைச்சாலையில் தடுத்துவைக்கப்பட்டிருந்த நிலையிலேயே சஹ்ரானின் மனைவிக்கு கொரோனா தொற்றியுள்ளது. அத்துடன், அவருடன் வெலிகடை சிறைச்சாலையிலிருந்த மேலும்  28 தொற்றாளர்களும் வெலிக்கந்தயிலுள்ள கொரோனா சிகிச்சை மத்திய நிலையத்தில் அனுமதிக்கப்பட்டுள்ளனர்.

கொரோனா வைரஸ் தொற்றுக்கு இலக்கான நிலையில் சிகிச்சைப்பெற்றுவருபவர்களில் மேலும் 537 பேர் இன்று குணமடைந்து வீடு திரும்பினர். இதன்படி இலங்கையில் கொரோனாவின் பிடிக்குள் இருந்து மீண்டவர்களின் எண்ணிக்கை 7 ஆயிரத்து 723 ஆக அதிகரித்துள்ளது.

அத்துடன் 5 ஆயிரத்து 217பேருக்கு தொடர்ந்தும் சிகிச்சையளிக்கப்பட்டுவருகின்றது. கொரோனாவால் 30 பேர் உயிரிழந்துள்ளனர்.

அதேவேளை, இலங்கையில் கொரோனா வைரஸ் தொற்றினால் பாதிக்கப்பட்டவர்களின் எண்ணிக்கை 12 ஆயிரத்து 970 ஆக அதிகரித்துள்ளது.

டயலொக் ஆசி ஆட்டாபி எல்சி (டயலொக்) உடன் சுகாதார அமைச்சு இணைந்து, பண்டாரநாயக்க சர்வதேச விமான நிலையத்தில் (BIA) விரைவான பி.சி. ஆர்பரிசோதனைகளை மேற்கொள்ள வழிவகுத்துள்ளது.

Robotic Arm இணக்கமான 4000 பரிசோதனைக் கருவிகளுக்கான டயலொக்கின் பங்களிப்பானது,கோவிட் -19 தொற்று நோய்களின்போது தேசிய சுகாதாரப் பாதுகாப்பு முயற்சிகளை மேம்படுத்துவதற்கான நிறுவனத்தின் தற்போதைய உறுதிப்பாட்டின் ஒருபகுதியாகும்.

ஏப்ரல் 2020 இல், கோவிட் -19 தொற்று நோயுடன் தொடர்புடைய சிக்கலான சுகாதார உள்கட்டமைப்பை மேம்படுத்துவதற்காக டயலொக் ரூ.2000 இலட்சம் தொகையை வழங்குவதற்கான உறுதிமொழியை அளித்தது.

இலங்கையின் முன்னணி இணைப்பு வழங்குனரின் உறுதிமொழிக்கு அமைய சில வாரங்களுக்கு முன்பு நீர்கொழும்பு மருத்துவமனையில் 10 படுக்கைகளை கொண்டICUஐ மேம்படுத்த உதவியுள்ளதுடன் மேலும்பல ICU விரிவாக்கங்கள் விரைவில் மேற்கொள்ளப்படும்.

Robotic Arm பி.சி.ஆர் சோதனை வசதி பி.சி.ஆர்பரிசோதனையை நடத்துவதற்கும் முடிவுகளை அறிக்கையிடுவதற்குமான நேரத்தை 8 மணித்தியாலத்திலிருந்து 2.5 மணிநேரமாக வெகுவாக குறைக்கின்றது.

இது குறித்து டயலொக் ஆசி ஆட்டாபி எல் சி நிறுவனத்தின் குழும தலைமை நிர்வாக அதிகாரி சுபுன் வீரசிங்ஹ கருத்து தெரிவிக்கையில்,

“CE மற்றும் ஐரோப்பிய IVD சான்றளிக்கப்பட்ட உலகத்தரம் வாய்ந்த ரோபோ தீர்வுகள், 32 மாதிரிகளை இணையாகசெயலாக்குவதுடன், கணிசமாக பாதுகாப்பான மற்றும் விரைவான சோதனை மற்றும் அறிக்கையிடலைவெறும் 2.5 மணிநேரத்தில் செயல்படுத்துகிறது.

இந்த பொறிமுறையானது வாரத்திற்கு மனித நேரங்களை பயனுள்ளதாக குறைப்பதன் மூலம் சுகாதாரத் துறைக்கும் அரசாங்கசுகாதார அதிகாரிகளுக்கும் சிறப்பாக உதவுகிறது.

இந்த ரோபோ தீர்வுகள் மூலம் விரைவான சோதனை மற்றும் அறிக்கையிடலுடன் பயணிகளின் மற்றும் நமது தேசத்தின் பாதுகாப்பை உறுதிசெய்யும் இந்த முயற்சியில் பங்கேற்க எங்களுக்கு ஒரு வாய்ப்பை வழங்கிய சுகாதார அமைச்சகத்திற்கு நாங்கள் கடமைப்பட்டுள்ளோம்” என தெரிவித்தார்.

இந்த சந்தர்ப்பத்தில் கருத்து தெரிவித்த சுகாதார மற்றும் சுதேச மருத்துவ சேவைகள் அமைச்சர் பவித்ராவன்னியராச்சி,

“பண்டாரநாயக்க சர்வதேச விமான நிலையத்தில் அதிவேக ரோபோ பி.சி.ஆர் பரிசோதனைக்கு வசதிசெய்வதுட யலொக்கின் மற்றொரு சிறந்த முயற்சியாகும். ஏனெனில் அவர்கள் இலங்கையில் கோவிட் -19 ஐ எதிர்த்துப் போராடுவதற்கான எங்கள் முயற்சிகளில் சுகாதார அமைச்சகத்திற்கு தொடர்ந்து ஆதரவளித்துவருகின்றனர்.

டயலொக்கின் இந்த சமீபத்திய பங்களிப்பானது நாட்டின் முக்கியமான சுகாதார உள்கட்டமைப்பு மற்றும் பல பாராட்டத்தக்க முயற்சிகளை அபிவிருத்தி செய்வதாக சுகாதார அமைச்சகத்திற்கு வழங்கியரூ.2000 இலட்சம் உறுதிமொழிக்கு அமையவே இடம்பெறுகின்றது. டயலொக் ஆசி ஆட்டாவின் தொடர்ச்சியான முயற்சிகள் மற்றும் இந்த தேசிய முயற்சிக்கு அவர்கள் அர்ப்பணித்த சேவைக்கு எங்கள் மனமார்ந்த நன்றியையும் பாராட்டையும் தெரிவித்துக்கொள்கிறோம் என கூறினார்.

“கேகாலை மாவட்டத்தில் கொரோனா வைரஸ் அதிதீவிரமாக நாளுக்குநாள் அதிகரித்து செல்கின்றமை அபாய நிலையை தோற்றுவித்துள்ளது. நேற்று மாலைவரை தொற்றா ளர்களின் எண்ணிக்கை 180 ஆக அதிகரித்துள்ளது. நேற்று  மாத்திரம் 22 தொற்றாளர்கள் அடையாளம் காணப்பட்டுள்ளனர். மொத்தமாக 3 ஆயிரத்து 706 பேர் தனிமைப்படுத்தப்பட்டுள்ளனர். தொற்றுக்குள்ளானவர்களில் 109 பேர் குணமடைந்துள்ளனர்.” – என்று கேகாலை மாவட்ட செயலாளர் மஹிந்த எஸ் வீரசூரிய தெரிவித்துள்ளார்.

கேகாலை மாவட்டத்தில் பரவலாக அனைத்து பிரதான நகரங்களை மையப்படுத்திய பிரதேச செயலகங்களில் தொற்றாளர்கள் இனங்காணப்பட்டுள்ளனர்.

பதிவான தொற்றாளர்களின் எண்ணிக்கையின் அடிப்படையில் 180 தொற்றாளர்களில் மாவனல்லையில் 34பேரும்,கேகாலையில் 20பேரும், வரக்காபொலையில் 20 பேரும், ருவன்வெல்லையில் 20பேரும், தெஹியோவிட்டயில் 20பேரும், அரனாயக்கவில் 14பேரும், புலத்கோஹ{பிட்டியவில் 14பேரும், எட்டியாந்தோட்டையில் 13 பேரும், கலிகமுவயில் 12பேரும், ரம்புக்கணையில் 09பேரும், தெரணியகலையில் 04பேரும் தொற்றுக்குள்ளாகியுள்ளதாக மாவட்ட செயலாளர் தெரிவித்தார்.

இவற்றில் அதிகமானதொற்றாளர்கள் மாவனல்லைபிரதேசத்தில் இனங்காணப்பட்டுள்ளமை குறிப்பிடத்தக்க அம்சமாகும். பொதுமக்கள் சுகாதார நடைமுறைகளை பின்பற்றி வெளியில் வருவதைதவிர்த்துக்கொள்வதை பின்பற்றாது இருந்தால் எதிர்வரும் நாட்களில் நிலைமை மேலும் மோசமடையலாம். நிலைமையை கருத்தில் கொண்டுஎதிர்வரும் நாட்களில் கேகாலை மாவட்டத்தை முற்றாக முடக்குவது தொடர்பாக ஆலோசித்துவருவதாகவும் அவர் மேலும் தெரிவித்தார்.

யாழ். மாவட்ட செயலகத்தில் நேற்று நடைபெற்ற கிராமிய பொருளாதார மேம்பாடு தொடர்பான கூட்டத்தில் இராஜாங்க அமைச்சர் ஜீவன் தொண்டமானுக்கு இரண்டாவது வரிசையிலேயே ஆசனம் வடங்கப்பட்டது.

மேற்படி கூட்டத்தில் முதல் வரிசையில் அமைச்சர்கள், இராஜாங்க அமைச்சர்கள், அரச அதிபர்கள், பாராளுமன்ற குழுக்களின் பிரதி தலைவர் அமர்ந்திருந்த நிலையில் ஜீவன் தொண்டமானுக்கு மாத்திரம் அவர்களுக்கு பின் வரிசையில் இருக்கை வழங்கப்பட்டது.

இதன்போது கூட்டத்தில் இராஜாங்க அமைச்சர் ஜீவன் தொண்டமான், எந்தவித கருத்துக்களையும் தெரிவிக்காது, கூட்டம் நிறைவடையும் வரை மௌனமாகவே இருந்தார்.

நன்றி – தினகரன்

( நேற்று நடைபெற்ற இக்கூட்டத்தில் சுகாதார நடைமுறைகள் முறையாக பின்பற்றப்படவில்லை என்ற குற்றச்சாட்டும் முன்வைக்கப்பட்டுள்ளது.)