பிக்பாஸ் 3 நிகழ்ச்சியில் கலந்து கொண்டு ஒரு ஆண்டாகியும் தனக்கான சம்பளம் தரவில்லை என்று நடிகை கஸ்தூரி குற்றம் சாட்டியுள்ளார்.

சர்வதேச அளவில் பிரபலமான பிக்பாஸ் நிகழ்ச்சி கடந்த 3 ஆண்டுகளாக தமிழில் ஒளிபரப்பாகி வருகிறது. கொரோனா காரணமாக தள்ளிப்போன பிக்பாஸ் நிகழ்ச்சியின் 4-வது சீசன் வரும் அக்டோபர் 4ஆம் திகதி முதல் ஆரம்பமாகிறது. வழக்கம் போல் நடிகர் கமல்ஹாசனே இந்த சீசனையும் தொகுத்து வழங்குகிறார்.

இந்நிலையில், நடிகை கஸ்தூரி தனது டுவிட்டர் பக்கத்தில் வெளியிட்டுள்ள பதிவு ஒன்று பரபரப்பை ஏற்படுத்தியுள்ளது. அதில் பிக்பாஸ் 3 நிகழ்ச்சியில் கலந்து கொண்டு ஒரு ஆண்டாகியும் தனக்கான சம்பளம் தரவில்லை என்று குற்றம் சாட்டியுள்ளார்.

 “நான் பிக்பாஸ் நிகழ்ச்சியில கலந்துக்கிட்டதே ஆதரவற்ற குழந்தைகளோட ஆபரே‌ஷன் செலவுக்காகத்தான். நான் எப்போதுமே பொய் வாக்குறுதிகளை நம்புவதில்லை. ஆனால் இதிலும் அப்படியே நடக்கும் என்று எதிர்பார்க்கவில்லை’ என்று கூறியுள்ளார்.

இதை கண்ட ரசிகர்கள் பலர் கஸ்தூரிக்கு ஆதரவாக கருத்து கூறினால் சிலரோ எதிர்மறை விமர்சனங்களை முன்வைத்து வருகின்றனர். ஓராண்டு கழித்து இப்படி ஒரு முறைப்பாட்டை கூறுவது ஏன்? இதுவும் வீண் விளம்பரத்திற்காகவா என்று கேள்வி எழுப்பி வருகின்றனர்.

உலகம் முழுவதும் கொரோனா வைரஸ் தாக்குதலுக்கு உயிரிழந்தோர் எண்ணிக்கை 10 லட்சத்து 12 ஆயிரத்தை கடந்தது.

சீனாவில் ஹூபேய் மாகாணம் வுகான் நகரில் கடந்த ஆண்டு டிசம்பர் மாதம் கொரோனா வைரஸ் கண்டுபிடிக்கப்பட்டது. இந்த வைரஸ் தற்போது உலகின் 213 நாடுகள்\ பிரதேசங்களுக்கு பரவி பெரும் மனித பேரழிவை ஏற்படுத்தி வருகிறது.

இந்த வைரசுக்கு தடுப்பு மருந்து கண்டுபிடிக்க விஞ்ஞானிகள் தீவிர முயற்சி மேற்கொண்டு வருகின்றனர். ஆனாலும் கொரோனாவின் தாக்கம் நாளுக்கு நாள் அதிகரித்துக்கொண்டே செல்கிறது.

இந்நிலையில், உலகம் முழுவதும் கொரோனாவால் உயிரிழந்தவர்களின் எண்ணிக்கை 10 லட்சத்து 12 ஆயிரத்தை கடந்துள்ளது.

தற்போதைய நிலவரப்படி, 3 கோடியே 38 லட்சத்து 44 ஆயிரத்து 343 பேருக்கு வைரஸ் தொற்று உறுதி செய்யப்பட்டுள்ளது.

வைரஸ் பரவியவர்களில் 76 லட்சத்து 83 ஆயிரத்து 273 பேர் சிகிச்சை பெற்று வருகின்றனர். சிகிச்சை பெறுபவர்களில் 65 ஆயிரத்து 917 பேரின் நிலைமை கவலைக்கிடமாக உள்ளது.

கொரோனாவில் இருந்து 2 கோடியே 51 லட்சத்துக்கும் அதிகமானோர் சிகிச்சைக்கு பின் குணமடைந்துள்ளனர்.

கொரோனாவுக்கு அதிக உயிரிழப்பை சந்தித்த நாடுகள்:-

அமெரிக்கா – 210,785
பிரேசில் – 143,010
இந்தியா – 96,318
மெக்சிகோ – 76,603
இங்கிலாந்து – 42,072
இத்தாலி – 35,875
பெரு – 32,396
பிரான்ஸ் – 31,893
ஸ்பெயின் – 31,614
ஈரான் – 25,986
கொலம்பியா – 25,828

மல்வத்த பிளான்டேசனுக்குச் சொந்தமான பதுளை – ஊவா ஹைலன்ஸ் தோட்டத்தில் கொழுந்துகளை நிறுப்பதற்கு பெண் தொழிலாளர் பயன்படுத்தப்படுகிறார்கள்.

தேயிலைக் கொழுந்து நிறுப்பதற்கு தோட்டத் தொழிலாளர்களைப் பயன்படுத்தி, அவர்களை உடல் ரீதியாக மேலும் சிரமத்திற்கு உள்ளாக்கும் படங்கள் சமூக வலைத்தளங்களில் பெரும் அதிர்வலைகளை ஏற்படுத்தியிருந்தன.

குறிப்பாக தேயிலைக் கொழுந்து நிறுக்கும் கட்டை ஒருபுறத்தில் சுவரில் பொருத்தியிருக்க, மற்றுமொரு புறத்தில் அதனை தோட்டத் தொழிலாளி தலையில் சுமக்கும் படம், பெரும் அதிருப்தியை ஏற்படுத்தியுள்ளது.

இந்த நிலையில், குறித்த புகைப்படங்கள் சமூக வலைத்தளங்களில் பரவிய நிலையில், இதுகுறித்து பெருந்தோட்ட இணைப்புச் செயலாளர் செந்தில் தொண்டமான், குறித்த தோட்ட கம்பனியின் நிறைவேற்றுப் பணிப்பாளர் சமர திவாகரவை தொடர்புகொண்டு, இதுகுறித்து எச்சரித்துள்ளார்.

முன்னதாக இதனை மறுத்த தோட்ட நிர்வாகம், இந்தப் படங்களை அனுப்பிவைத்த பின்னர், தமது பக்க தவறை ஏற்றுக்கொண்டுள்ளனர். இதனையடுத்து வரும் வெள்ளிக்கிழமைக்குள் இதற்கான தீர்வைப் பெற்றுத்தருவதாக கம்பனியின் நிறைவேற்றுப் பணிப்பாளர் உறுதியளித்துள்ளார்.

கொழுந்து நிறைபார்ப்பதில் தொடர்ச்சியான சிக்கல்கள் இருந்து வரும் நிலையில், மேலும் தொழிலாளர்கள் மீது தோட்ட நிர்வாகங்கள் சுமைகளை அதிகரிப்பது கண்டித்தக்கதாகும்.

மஸ்கெலியா பிரதேச சபைக்குட்பட்ட  சாமிமலை டீசைட் தோட்டத்தில் அமைக்கப்பட்டுவரும் வீடமைப்பு திட்டத்தில் பயனாளிகளிடம் பணம் அறவிடப்படுவதாக குற்றச்சாட்டு முன்வைக்கப்பட்டுள்ளது.

2018 ஆகஸ்ட்   28ஆம் திகதி முன்னாள் அமைச்சர் பழணி திகாம்பரத்தால் மேற்படி தோட்டத்தில் 16 வீடுகளுக்கான அடிக்கல் நாட்டப்பட்டு, நிர்மாணப் பணிகள் ஆரம்பிக்கப்பட்டன .

குறித்த வீடமைப்பு திட்டம் முழுமை பெறாத நிலையில் சுமார் ஒரு வருட காலமாக பிற்போடப்பட்டு தற்போது புதிய அரசாங்கத்தின் மூலமாக, மீண்டும் கட்டுமான பணிகள் ஆரம்பிக்கப்பட்டன.

குறித்த வீடமைப்பு திட்டத்தில் திட்டம் ஆரம்பிக்கப்பட்ட நாளில் இருந்து பயனாளிகளிடம் ஒப்பந்தக்காரர்களால் பணம் வசூலிக்க படுவதாக மக்கள் குறிப்பிடுகின்றனர் .

அந்த வகையில் வீட்டிற்கு அத்திவாரம் இடுவதற்கு ஒவ்வருவரிடமும் தலா ஆறாயிரம் ரூபாவும், மலசலகூடம் அமைப்பதற்காக பத்தாயிரம் ரூபாவும் வசூலிக்கப்பட்டுள்ளதாக தெரிவிக்கப்பட்டுள்ளது.

மேலும் தற்போது வீட்டின் உள்புறத்தில் அமைக்கப்பட்டுள்ள நுழைவாயிலுக்கு நிலை பொருத்துவதற்காக ஒவ்வருவரிடமும் 3600/_ ரூபாய் பணம் செலுத்துமாரு கோரப்பட்டுள்ளது .அதன் உண்மையான விலை சுமார் 2400/ ரூபாய் எனவும் மக்கள் தெரிவிக்கின்றனர்.

குறித்த வீடமைப்பு திட்டத்தில் தோட்டகமிட்டி முக்கியஸ்தர்கள் உதவியாளர்களாக வேலை செய்து வருகின்றனர். அவர்கள் மூலமாகவே ஒப்பந்தகாரரால் இவ்வாறு பணம் வசூலிக்கப்படுவதாக சுட்டிக்காட்டப்பட்டுள்ளது.

எனவே குறித்த விடயம் சம்பந்தமாக பொறுப்பு வாய்ந்த அதிகாரிகள் முன்வர வேண்டும் என்று மக்கள் கோரிக்கை விடுக்கின்றனர் .

சாமிமலை நிருபர் ஞானராஜ்

அரசியலமைப்பின் 20 சட்டமூலத்தை சவாலுக்குட்படுத்தி உயர் நீதிமன்றத்தில் தாக்கல் செய்யப்பட்டுள்ள 39 மனுக்கள்மீதான பரீசிலனை இன்று (30) இரண்டாவது நாளாக நடைபெறுகின்றது.

பிரதம நீதியரசர் தலைமையிலான ஐவரடங்கிய நீதியரசர்கள் குழாம் முன்னிலையில் இந்த மனுக்கள் பரிசீலனைக்கு எடுத்துக் கொள்ளப்படவுள்ளன.

எதிர்வரும் வெள்ளிக்கிழமைக்கு முன்னர் மனுக்கள்மீதான பரிசீலனையை நிறைவு செய்ய முடியும் என பிரதம நீதியரசர் நேற்று அறிவித்தார்.

மனுக்கள் தொடர்பான உயர்நீதிமன்றத்தின் தீர்ப்பு – சட்டவிளக்கம் ஒக்டோபர் 21 ஆம் திகதிக்கு முன்னர் சபாநாயகருக்கு அனுப்பிவைக்கப்படும் என பிரதம நீதியரசர் குறிப்பிட்டுள்ளார்.

அதேவேளை, அரசியலமைப்பின் 20ஆவது திருத்தச்சட்டமூலம் பாராளுமன்றத்தில் குழுநிலை விவாதத்தின்போது திருத்தப்படும் என சட்டமாஅதிபர் நேற்று நீதிமன்றத்துக்கு அறிவித்தார்.

இம்முறை பல்கலைக்கழகத்திற்கு தெரிவு செய்யப்படவுள்ள மாணவர்களுக்கான வெட்டுப்புள்ளியை இரு வாரங்களுக்குள் அறிவிக்கவுள்ளதாக பல்கலைக்கழகங்கள் மானியங்கள் ஆணைக்குழு தெரிவித்துள்ளது.

அதற்கு முன்னர் பல்கலைக்கழகங்களின் உப வேந்தர்களுடன் அது தொடர்பிலான கலந்துரையாடல் இடம்பெறும் எனவும் பல்கலைக்கழகங்கள் மானியங்கள் ஆணைக்குழுவின் உப தலைவர் பேராசிரியர் ஜனிதா லியனகே தெரிவித்துள்ளார்.

பல்கலைக்கழக உள்ளீர்ப்பிற்கான 36 தேர்வுகளின் பெறுபேறுகள் தற்போது வௌியிடப்பட்டுள்ளன.

2019 ஆம் ஆண்டு உயர்தரப் பரீட்சை பெறுபேற்றின் அடிப்படையில் இம்முறை சுமார் 40,000 மாணவர்கள் பல்கலைக்கழகங்களுக்கு தெரிவு செய்யப்படவுள்ளனர்.

கடந்த வருடத்துடன் ஒப்பிடுகையில் இந்த வருடம் 10,000 மாணவர்கள் மேலதிகமாக சேர்த்துக் கொள்ளப்படவுள்ளதாகவும் பல்கலைக்கழகங்கள் மானியங்கள் ஆணைக்குழுவின் உப தலைவர் பேராசிரியர் ஜனிதா லியனகே சுட்டிக்காட்டியுள்ளார்.

மருத்துவ, பொறியியலாளர் உள்ளிட்ட பீடங்கள் சிலவற்றிற்கு உள்ளீர்க்கப்படும் எண்ணிக்கையில் இம்முறை அதிகரிப்பு ஏற்பட்டுள்ளதாகவும் அவர் குறிப்பிட்டுள்ளார்.

நானுஓயா, டெஸ்போட்தோட்ட ஆற்றிலிருந்து  சடலமாக மீட்கப்பட்ட மாணவியின் பிரேத பரிசோதனை இன்று இடம்பெறவுள்ளது.

நானுஓயா எபஸ்போட் தமிழ் வித்தியாலயத்தில் தரம் 10 இல் கல்வி பயின்ற – டெஸ்போட் தோட்டத்தில் கீழ்பிரிவில் வசித்த  யசோதா என்ற மாணவியே நேற்று காலை  சடலமாக மீட்கப்பட்டுள்ளார்.

” மகள் நேற்றிரவு (28) 10.30 மணிவரை கல்வி நடவடிக்கையில் ஈடுபட்டுக் கொண்டிருந்தார். நாம் நித்திரைக்கு சென்றுவிட்டோம். பின்னர் அதிகாலை 2.30 மணியளவில் எழுந்துபார்க்கும் போது மகளை காணவில்லை. இதனையடுத்து தேட ஆரம்பித்தோம்.” என யசோதாவின் தாயார் நானுஓயா பொலிஸாரிடம் நேற்று குறிப்பிட்டுள்ளார்.

இன்று இடம்பெறவுள்ள பிரதே பரிசோதனை ஊடாக மரணத்திற்கான காரணம் தெரியவரும் என பொலிஸ் அதிகாரியொருவர் தெரிவித்துள்ளார்.