பஞ்சாப் அணிக்கு எதிரான போட்டியில் ஒரே ஓவரில் 5 சிக்சர்கள் அடித்து அசத்திய ராகுல் டெவாட்டியாவுக்கு பலரும் பாராட்டு தெரிவித்துவருகின்றனர்.

ராஜஸ்தான் ராயல்ஸ் – கிங்ஸ் லெவன் பஞ்சாப் அணிகளுக்கு இடையிலான ஆட்டம் ஷார்ஜாவில் நடைபெற்றது.

முதலில் ஆடிய கிங்ஸ் லெவன் பஞ்சாப் அணியில் மயங்க் அகர்வால் சதமடித்து அசத்தினார். கே எல் ராகுல் அரை சதமடித்தார். இறுதியில் பஞ்சாப் அணி 20 ஓவரில் 3 விக்கெட்டுக்கு 223 ரன்கள் குவித்தது.

தொடர்ந்து ஆடிய ராஜஸ்தான் அணி 224 ரன்கள் என்ற வெற்றி இலக்கை எட்டிப்பிடித்து, ஐ.பி.எல். வரலாற்றில் அதிகப்படியான ஸ்கோரை சேஸிங் செய்த அணி என்ற சாதனையைப் படைத்துள்ளது.

ஸ்மித் (50), சஞ்சு சாம்சன் (85) ஆகியோரின் சிறந்த ஆட்டத்தால் ராஜஸ்தான் ராயல்ஸ் வெற்றியை நோக்கி சென்றது.

கடைசி 3 ஓவர்களில் ராஜஸ்தான் அணிக்கு 51 ரன்கள் தேவைப்பட்டது. 18-வது ஓவரை காட்ரெல் வீசினார். இந்த ஓவரை ராகுல் டெவாட்டியா எதிர்கொண்டார்.

முதல் நான்கு பந்திலும் இமாலய சிக்சர் விளாசினார். இதனால் ஆறு பந்தில் ஆறு சிக்ஸ் அடிப்பாரா? என்ற ஆர்வம் எழுந்தது. ஆனால் ஐந்தாவது பந்து பேட்டில் படவில்லை. 6-வது பந்தை மீண்டும் ஒருமுறை எல்லைக்கோட்டுக்கு வெளியே அனுப்பினார். ஒரே ஓவரில் ஐந்து சிக்சர்கள் அடித்து அசத்தினார் டெவாட்டியா.

இறுதியில், ராஜஸ்தான் அணி 19.3 ஓவரில் 6 விக்கெட் இழப்புக்கு 226 ரன்கள் குவித்து சாதனை வெற்றி பெற்றது.

இந்நிலையில், ஒரே ஓவரில் 5 சிக்சர்கள் அடித்த ராகுல் டெவாட்டியாவுக்கு முன்னாள் ஆல் ரவுண்டர் யுவராஜ் சிங் உட்பட பலரும் பாராட்டு தெரிவித்துவருகின்றனர்.

https://www.iplt20.com/video/209477/5-sixes-1-over-a-tewatia-special 

ஐ.பி.எல். கிரிக்கெட்டில் பஞ்சாப்புக்கு எதிரான ஆட்டத்தில் 224 ஓட்டங்கள் இலக்கை சேசிங் செய்து ராஜஸ்தான் அணி வரலாறு படைத்தது.

13-வது ஐ.பி.எல். கிரிக்கெட் திருவிழா ஐக்கிய அரபு அமீரகத்தில் உள்ள துபாய், அபுதாபி, சார்ஜா ஆகிய நகரங்களில் நடந்து வருகிறது. இதில் நேற்றிரவு சார்ஜாவில் அரங்கேறிய 9-வது லீக் ஆட்டத்தில் ராஜஸ்தான் ராயல்சும், கிங்ஸ் லெவன் பஞ்சாப்பும் மோதின.

ராஜஸ்தான் அணியில் ஜெய்ஸ்வால், டேவிட் மில்லர் நீக்கப்பட்டு ஜோஸ் பட்லர், அங்கித் ராஜ்புத் சேர்க்கப்பட்டனர். பஞ்சாப் அணியில் மாற்றம் இல்லை. அதனால் இந்த முறையும் கிறிஸ் கெய்லுக்கு இடம் கிட்டவில்லை.

நாணயச்சுழற்சியில் வெற்றிபெற்ற ராஜஸ்தான் கேப்டன் ஸ்டீவன் சுமித் முதலில் பஞ்சாப்பை பேட் செய்ய பணித்தார்.

இதைத் தொடர்ந்து கேப்டன் லோகேஷ் ராகுலும், மயங்க் அகர்வாலும் தொடக்க ஆட்டக்காரர்களாக களம் புகுந்தனர். பேட்டிங்குக்கு உகந்த ஆடுகளம், சிறிய மைதானம் என்பதால் இருவரும் சரவெடியாய் வெடித்தனர்.

ஜோப்ரா ஆர்ச்சரின் ஒரு ஓவரில் ராகுல் ‘ஹாட்ரிக்’ பவுண்டரி விரட்ட, திவேதியாவின் ஓவரில் அகர்வால் இரண்டு சிக்சர், ஒரு பவுண்டரி தொடர்ச்சியாக விளாசினார்.
ஸ்ரேயாஸ் கோபாலின் சுழலையும் அகர்வால் விட்டுவைக்கவில்லை.

இதனால் பஞ்சாப் அணியின் ஸ்கோர் ராக்கெட் வேகத்தில் எகிறியது. இவர்களை கட்டுப்படுத்த வழிதெரியாமல் ராஜஸ்தான் பந்துவீச்சாளர்கள் விழிபிதுங்கினர்.

அட்டகாசப்படுத்திய மயங்க் அகர்வால் பந்தை எல்லைக்கோட்டுக்கு ஓடவிட்டு தனது முதலாவது சதத்தை நிறைவு செய்தார்.

இந்த ஜோடி முதல் விக்கெட்டுக்கு 183 ரன்கள் (16.3 ஓவர்) திரட்டிய நிலையில் பிரிந்தது. மயங்கர் அகர்வால் 106 ரன்களில் (50 பந்து, 10 பவுண்டரி, 7 சிக்சர்) கேட்ச் ஆனார். ராகுல் 69 ரன்களில் (54 பந்து, 7 பவுண்டரி, ஒரு சிக்சர்) ஆட்டம் இழந்தார்.

கடைசி கட்டத்தில் மேக்ஸ்வெல்லும், நிகோலஸ் பூரனும் இணைந்து ஸ்கோரை 220 ரன்களை கடக்க வைத்தனர். 20 ஓவர்களில் பஞ்சாப் அணி 2 விக்கெட் இழப்புக்கு 223 ரன்கள் குவித்தது. பூரன் 25 ரன்களுடனும் (8 பந்து, ஒரு பவுண்டரி, 3 சிக்சர்), மேக்ஸ்வெல் 13 ரன்னுடனும் களத்தில் இருந்தனர்.

பின்னர் 224 ரன்கள் இலக்கை நோக்கி ஆடிய ராஜஸ்தான் அணியில் தொடக்க வீரர் ஜோஸ் பட்லர் (4 ரன்) ஏமாற்றினார். இதன் பிறகு கேப்டன் ஸ்டீவன் சுமித்தும், சஞ்சு சாம்சனும் கூட்டணி அமைத்து ரன்மழை பொழிந்தனர். அணியின் ஸ்கோர் 100 ரன்களாக (9 ஓவர்) உயர்ந்த போது ஸ்டீவன் சுமித் (50 ரன், 27 பந்து, 7 பவுண்டரி, 2 சிக்சர்) வெளியேறினார்.

அடுத்து வந்த ராகுல் திவேதியா ஆரம்பத்தில் தடுமாறினார். மறுமுனையில் சாம்சன் பட்டையை கிளப்பினார். மேக்ஸ்வெலின் ஒரே ஓவரில் 3 சிக்சர்களை தெறிக்க விட்டார். ஆனால் சாம்சன் (85 ரன், 42 பந்து, 4 பவுண்டரி, 7 சிக்சர்) முக்கியமான கட்டத்தில் கேட்ச் ஆனார். இதனால் பஞ்சாப்பின் கை ஓங்குவது போல் தெரிந்தது.

இந்த சூழலில் விசுவரூம் எடுத்த ராகுல் திவேதியா, காட்ரெலின் ஒரே ஓவரில் 5 சிக்சர்களை நொறுக்கினார். இதனால் பரபரப்பான இந்த ஆட்டம் ராஜஸ்தான் பக்கம் நகர்ந்தது. திவேதியா 53 ரன்களில் (31 பந்து, 7 சிக்சர்) விக்கெட்டை இழந்தார். இதன் பின்னர் ஜோப்ரா ஆர்ச்சரின் (13 ரன்) இரு சிக்சர் வெற்றியை உறுதிப்படுத்தியது.

ராஜஸ்தான் அணி 19.3 ஓவர்களில் 6 விக்கெட் இழப்புக்கு 226 ரன்கள் குவித்து 4 விக்கெட் வித்தியாசத்தில் திரில் வெற்றியை சுவைத்தது. ஐ.பி.எல். வரலாற்றில் ஒரு அணி விரட்டிப்பிடித்த அதிகபட்ச இலக்கு இது தான். இதற்கு முன்பு இதே ராஜஸ்தான் அணி 2008-ம் ஆண்டு டெக்கான் அணிக்கு எதிராக 215 ரன்களை சேசிங் செய்ததே அதிகபட்சமாக இருந்தது.

நடப்பு தொடரில் ராஜஸ்தான் அணிக்கு இது 2-வது வெற்றியாகும்.

” தமிழ் மக்களுக்கான நினைவேந்தல் உரிமை வழங்கப்படவேண்டும். அதனை எவரும் தடுக்கமுற்படக்கூடாது. நினைவேந்தலுக்குகூட தடை ஏற்படுத்தி புது குழப்பத்தை ஏற்படுத்துவதற்கு அரசாங்கம் முயற்சிக்கின்றதா என்ற சந்தேகம் எழுகின்றது.” – என்று ஐக்கிய மக்கள் சக்தியின் பதுளை மாவட்ட நாடாளுமன்ற உறுப்பினர் வடிவேல் சுரேஷ் தெரிவித்தார்.

நினைவேந்தல் உரிமையை வலியுறுத்தி வடக்கு, கிழக்கில் முன்னெடுக்கப்படவுள்ள போராட்டம் தொடர்பில் கருத்து வெளியிடுகையிலேயே அவர் மேற்கண்டவாறு கூறினார். இது தொடர்பில் அவர் மேலும் கூறியவை வருமாறு,

” இலங்கை என்பது ஜனநாயக சோஷலிஸக் குடியரசாகும். எனவே, ஒரு சமுகத்துக்காக, இனத்துக்காக யாராவது தியாகம்செய்திருந்தால், உயிர்நீத்திருந்தால் அவ்வாறானவர்களை நினைவுகூருவதற்கான நினைவேந்தலை நடத்துவதற்கான உரிமை இருக்கவேண்டும். அது கலாசார சம்பந்தப்பட்ட விடயமும்கூட. இதனை பயங்கரவாதம் எனக்கூறிவிடமுடியாது.

எனவே, நினைவேந்தலுக்கு விதிக்கப்படும் தடையை ஏற்றுக்கொள்ளமுடியாது. அவ்வாறு தடைவிதித்து புது குழப்பத்தை ஏற்படுத்த முயற்சிக்கின்றார்களோ எனவும் எண்ண தோன்றுகிறது. தீலிபன் உண்ணாவிரமிருந்து அறவழியில் போராட்டம் நடத்தி உயிர்நீத்தவர். எனவே அவரை நினைவுகூருவதற்கு அனுமதி இருக்கவேண்டும்.” – என்றார்.

மறைந்த பின்னணி பாடகர் எஸ்.பி.பாலசுப்ரமணியத்துக்கு தாமரைப்பாக்கத்தில் அழகான நினைவில்லம் கட்டப்படும் என்று அவரது மகன் எஸ்.பி.சரண் தெரிவித்துள்ளார்.

பிரபல பின்னணி பாடகர் எஸ்.பி.பாலசுப்ரமணியம் கடந்த வெள்ளிக்கிழமை காலமானார். அவரது உடலுக்கு திரையுலக பிரபலங்கள், அரசியல்வாதிகள், ரசிகர்கள் என ஏராளமானோர் அஞ்சலி செலுத்தினர். இதையடுத்து எஸ்.பி.பி.யின் உடல் தாமரைப்பாக்கத்தில் உள்ள அவரது பண்ணை வீட்டின் அருகே பொலிஸ் மரியாதையுடன் நல்லடக்கம் செய்யப்பட்டது.

நினைவிடத்தில் எஸ்.பி.பி.க்கு அஞ்சலி செலுத்த பல்வேறு ஊர்களில் இருந்து மக்கள் வருகின்றனர். ஆனால் அவர்கள் உள்ளே அனுமதிக்கப்படாததால், அருகில் உள்ள வயல்வெளி வழியாக வந்து பார்த்து செல்கின்றனர். இங்கு மணிமண்டபம் அமைக்கப்பட வேண்டும் என்று ரசிகர்களும், தங்களது பங்களிப்புடன் நினைவில்லம் கட்ட வேண்டும் என்று கிராம மக்களும், எஸ்.பி.பி.யின் மகன் எஸ்.பி.சரணிடம் கோரிக்கை விடுத்தனர்.

இதனை ஏற்றுக்கொண்ட அவர் தனது தந்தைக்கு அழகான நினைவில்லம் அமைக்கப்படும் என்றும், ஒரு வாரத்தில் அதற்கான தகவல் வெளியாகும் என்றும் உறுதி அளித்துள்ளார். வெளியூர்களில் இருந்து வரும் ரசிகர்கள் நினைவிடத்தில் அஞ்சலி செலுத்துவதற்கான ஏற்பாடுகள் குறித்து இரண்டு, மூன்று நாட்களில் காவல்துறையினருடன் ஆலோசித்து அறிவிக்கப்படும் என எஸ்.பி.சரண் கூறினார்.

உலகம் முழுவதும் கொரோனா வைரஸ் தாக்குதலுக்கு உயிரிழந்தோர் எண்ணிக்கை 9 லட்சத்து 98 ஆயிரத்தை லட்சத்தை கடந்துள்ளது.

சீனாவில் ஹூபேய் மாகாணம் வுகான் நகரில் கடந்த ஆண்டு டிசம்பர் மாதம் கொரோனா வைரஸ் கண்டுபிடிக்கப்பட்டது. இந்த வைரஸ் தற்போது உலகின் 213 நாடுகள்\ பிரதேசங்களுக்கு பரவி பெரும் மனித பேரழிவை ஏற்படுத்தி வருகிறது.

இந்த வைரசுக்கு தடுப்பு மருந்து கண்டுபிடிக்க விஞ்ஞானிகள் தீவிர முயற்சி மேற்கொண்டு வருகின்றனர். ஆனாலும் கொரோனாவின் தாக்கம் நாளுக்கு நாள் அதிகரித்துக்கொண்டே செல்கிறது.

இந்நிலையில், உலகம் முழுவதும் கொரோனாவால் உயிரிழந்தவர்களின் எண்ணிக்கை 9 லட்சத்து 98 ஆயிரத்து 700 ஐ கடந்துள்ளது.

தற்போதைய நிலவரப்படி, 3 கோடியே 30 லட்சத்து 58 ஆயிரத்துக்கும் மேற்பட்டோருக்கு வைரஸ் தொற்று உறுதி செய்யப்பட்டுள்ளது.

கொரோனாவில் இருந்து 2 கோடியே 44 லட்சத்து 11 ஆயிரத்துக்கும் அதிகமானோர் சிகிச்சைக்கு பின் குணமடைந்துள்ளனர்.