தமிழகம் திருப்பூர் மாவட்டம் தாராபுரம் (தனி) சட்டப்பேரவைத் தொகுதிக்கான இடைத்தேர்தல் ஒக்டோபர் 6-ம் திகதி நடைபெற உள்ளது. இதற்கான வேட்புமனு தாக்கல் நேற்று தொடங்கியது.
‘தேர்தல் மன்னன்’ என அழைக்கப்படும் சேலம் மாவட்டம் மேட்டூரைச் சேர்ந்த கே.பத்மராஜன் முதல் நபராக வந்து, தாராபுரம் கோட்டாட்சியரிடம் நேற்று வேட்புமனுவை தாக்கல் செய்தார்.
கடந்த 1988-ம் ஆண்டு முதல் இடைவிடாது தேர்தல் களத்தில் இயங்கிவரும் பத்மராஜன், உள்ளாட்சித் தேர்தல் முதல் சட்டப்பேரவை, மக்களவை, மாநிலங்களவை மற்றும் குடியரசுத் தலைவர் தேர்தல் வரை அனைத்து தேர்தல்களிலும் சுயேச்சை வேட்பாளராக மனு தாக்கல் செய்து வருகிறார்.
உலகிலேயே அதிக தேர்தல்களில் போட்டியிட்டு தோல்வியடைந்தவர் என்ற விசித்திரமான சாதனைக்காக இவரது பெயர் ‘லிம்கா’ சாதனைகள் புத்தகத்தில் இடம்பெற்றுள்ளது.
2026-ம் ஆண்டு நடைபெற்ற தமிழக சட்டப்பேரவை பொதுத்தேர்தலில் மேட்டூர் தொகுதியில் 254-வது முறையாக மனு தாக்கல் செய்த இவர், அதனைத் தொடர்ந்து நடைபெற்ற மாநிலங்களவை இடைத்தேர்தலிலும் போட்டியிட்டார்.
முன்னாள் முதலமைச்சர்கள் மு.கருணாநிதி, ஜெ.ஜெயலலிதா, மு.க.ஸ்டாலின், க.பழனிசாமி, தேசிய தலைவர்களான அடல் பிகாரி வாஜ்பாய், நரேந்திர மோடி, பி.வி.நரசிம்ம ராவ், ராகுல் காந்தி, பிரியங்கா காந்தி ஆகியோரை எதிர்த்தும் போட்டியிட்டுள்ளார்.
இதுகுறித்து பத்மராஜன் கூறும்போது, “1996-ல் ஒரே நேரத்தில் 5 மாநிலங்களில் வேட்பு மனு தாக்கல் செய்தேன். இதுவரை தேர்தல்களுக்காக ரூ.1 கோடிக்கும் மேல் செலவிட்டுள்ளேன். 2011-ல் மேட்டூர் தொகுதியில் பெற்ற 6,700 வாக்குகளே நான் பெற்ற அதிகபட்ச வாக்குகள்” என்றார்.
