பரபரப்பான ஆட்டம் – நெதர்லாந்தை வீழ்த்தியது மொராக்கோ

மெக்சிகோவின் மான்டிரே நகரில் நடைபெற்ற FIFA உலகக்கோப்பையின் விறுவிறுப்பான நாக்-அவுட் சுற்றில், நெதர்லாந்து அணியை பெனால்டி ஷூட்-அவுட்டில் 3-2 என்ற கணக்கில் வீழ்த்தி மொராக்கோ அணி அசத்தல் வெற்றி பெற்றுள்ளது.

இதன் மூலம் சனிக்கிழமை ஹூஸ்டனில் நடைபெறவுள்ள ‘ரவுண்ட் ஆப் 16’ சுற்றில் கனடா அணியை எதிர்கொள்ள மொராக்கோ தகுதி பெற்றுள்ளது.

நிர்ணயிக்கப்பட்ட ஆட்ட நேரம் மற்றும் கூடுதல் நேர முடிவில் இரு அணிகளும் 1-1 என சமநிலை வகித்ததால், வெற்றியாளரைத் தீர்மானிக்க பெனால்டி ஷூட்-அவுட் முறை கடைப்பிடிக்கப்பட்டது.

ஆரம்பம் முதலே இரு அணி வீரர்களும் ஆக்ரோஷமாக மோதிக் கொண்டனர். பிரேசில் நாட்டு நடுவர் வில்டன் சாம்பாயோ (Wilton Sampaio)-வின் பொறுமையைச் சோதிக்கும் வகையில் ஆட்டம் மிகவும் காரசாரமாக அமைந்தது.

ஆட்டத்தின் 20வது நிமிடத்தில் மொராக்கோவின் அஷ்ரஃப் ஹக்கிமி கொடுத்த கார்னர் வாய்ப்பை, நெய்ல் எல் ஐனௌய் தலையால் முட்ட, அதை நெதர்லாந்து கோல்கீப்பர் பார்ட் வெர்ப்ரூஜென் (Bart Verbruggen) அசாத்தியமாகத் தடுத்தார்.

அடுத்த சில நிமிடங்களில் ஹக்கிமி அடித்த அதிவேகப் பந்தையும் வெர்ப்ரூஜென் கோல் போஸ்ட்டுக்கு மேலாகத் தட்டிவிட்டார்.

ஆட்டத்தின் இடையே மொராக்கோவின் சைபாரி, நெதர்லாந்தின் ஜான் பால் வான் ஹெக்கேயின் முகத்தில் முழங்கையால் தாக்கியும் கார்டு (Card) தப்பித்தார். வான் ஹெக்கே முதல் பாதியின் இறுதியில் தலையில் பலத்த காயமடைந்து இரத்தம் வழிந்த நிலையிலும் தொடர்ந்து விளையாடினார்.

நெதர்லாந்து அணி பந்தை அதிக நேரம் தன் வசம் வைத்திருந்தாலும், ஆட்டத்தின் 72வது நிமிடத்தில் தான் அவர்களுக்கு முதல் கோல் வாய்ப்பு கிடைத்தது.

பயிற்சியாளர் ரொனால்ட் கூமன் மாற்று ஆட்டக்காரராக களம் இறக்கிய வூட் வெகோர்ஸ்ட் (Wout Weghorst) கொடுத்த பாஸை, சம்மர்வில் காக்போவிடம் கடத்தினார். அதை கோடி காக்போ (Cody Gakpo) பறந்து வந்து கோலாக மாற்றினார்.

சமீபத்தில் தனது பிறக்காத குழந்தையை இழந்த சோகத்தில் இருந்த காக்போ, கோல் அடித்தவுடன் மைதானத்தில் மண்டியிட்டு அழுது தனது சோகத்தை வெளிப்படுத்தினார்.

நெதர்லாந்து அணி கேப்டன் விர்ஜில் வான் டைக் தலைமையில் தற்காப்பு ஆட்டத்தை பலப்படுத்தி வெற்றியை நெருங்கியது.

ஆனால், ஆட்டத்தின் கூடுதல் நேரத்தில் (91வது நிமிடம்) மொராக்கோவின் மாற்று ஆட்டக்காரர் செம்ஸ்டின் தால்பி கொடுத்த கிராஸை, இசா தியோப் (Issa Diop) யாரும் எதிர்பாராத வண்ணம் தலையால் முட்டி கோலாக்கி ஆட்டத்தை 1-1 என சமன் செய்தார்.

கூடுதல் நேரத்திலும் மொராக்கோவின் சுபியான் ரஹிமி அடித்த கோல் வாய்ப்பை நெதர்லாந்து கோல்கீப்பர் வெர்ப்ரூஜென் தடுத்ததால் ஆட்டம் பெனால்டிக்குச் சென்றது.

பெனால்டியின் முதல் வாய்ப்பிலேயே மொராக்கோவின் எல் ஐனௌய் அடித்த பந்து கோல் போஸ்ட்டின் மேல் கம்பியில் பட்டுத் தவறியது. இதனால் மொராக்கோவுக்குத் பின்னடைவு ஏற்பட்டது. ஆனால், நெதர்லாந்தின் கிரிசென்சியோ சம்மர்வில் அடித்த 4வது பெனால்டி வாய்ப்பை மொராக்கோ கோல்கீப்பர் யாசின் புனோ (Yassine Bounou) மிகச் சிறப்பாகத் தடுத்தார்.

இறுதியாக மொராக்கோவின் நட்சத்திர ஸ்ட்ரைக்கர் இஸ்மாயில் சைபாரி (Ismael Saibari) பந்தை பலமாக கோல் வலைக்குள் அடித்து 3-2 என்ற கணக்கில் மொராக்கோவின் த்ரில் வெற்றியை உறுதி செய்தார்.

சனிக்கிழமை ஹூஸ்டனில் நடைபெறவிருக்கும் அடுத்த சுற்றில் மொராக்கோ – கனடா அணிகள் பலப்பரீட்சை நடத்தவுள்ளன.