பாலஸ்தீன மக்களுக்காக இஸ்ரேல் அணிக்கு மைதானத்தில் தரமான பாடம் புகட்டிய அயர்லாந்து

அயர்லாந்து மற்றும் இஸ்ரேல் அணிகளுக்கு இடையிலான நெஷன்ஸ் லீக் (Nations League) போட்டிக்கு முன்னதாக, இரு அணி வீரர்களுக்கும் இடையே எவ்வித கரம்பற்றுதல்களும் (Handshakes) இடம்பெறவில்லை. இப்போட்டியில் அயர்லாந்து அணி 3-0 என்ற கோல் கணக்கில் வெற்றியீட்டியதுடன், அயர்லாந்து வீரர்கள் கருப்புப் பட்டி அணிந்து விளையாடினர்.

காசாவில் இஸ்ரேலின் நடவடிக்கைகளுக்கு அயர்லாந்தில் கடுமையான எதிர்ப்புகள் கிளம்பியிருந்த நிலையில், இஸ்ரேலுக்கு எதிரான இரு போட்டிகளையும் புறக்கணிக்குமாறு அயர்லாந்து வீரர்களுக்கு கடும் அழுத்தம் கொடுக்கப்பட்டிருந்தது.

இதனிடையே, “அப்பாவி மக்கள் கொல்லப்படுவது தவறு என்ற தனது தனிப்பட்ட நம்பிக்கையின் காரணமாக” அணி மாற்றுப் போஸ்ட்கீப்பரான கெவின் பாஸுனோ (Gavin Bazuno) முதல் போட்டிக்கு முந்தைய நாள் இரவே இரு போட்டிகளிலிருந்தும் விலகினார்.

இஸ்ரேலிய தேசிய கீதம் இசைக்கப்பட்ட போது, அயர்லாந்து வீரர்கள் தலையைக் குனிந்தவாறு, கைகளைக் பின்னால் கட்டிக்கொண்டு புல் தரையைப் பார்த்தவாறு நின்றிருந்தனர்.

மேலும், போட்டியின் தலைவர்கள் மற்றும் நடுவர்களுடனான போட்டிக்கு முந்தைய சந்திப்பின் போது, அயர்லாந்து அணியின் தலைவர் டாரா ஓ’ஷியா (Dara O’Shea) தனது கைகளை பின்னால் கட்டியவாறே மைதானத்தின் மையப்பகுதியை நோக்கி வந்தார்.

ஓ’ஷியா போட்டி நடுவர் மற்றும் உதவி நடுவர்களுடன் கரம்பற்றினார், ஆனால் இஸ்ரேலிய அணியின் தலைவர் மனோர் சொலொமனுடன் (Manor Solomon) கைகுலுக்க எந்த முயற்சியும் செய்யவில்லை.

ஹங்கேரியின் டெப்ரெசென் (Debrecen) நகரில் அமைந்திருந்த, பார்வையாளர்கள் அதிகமின்றி காலியாக இருந்த அரங்கில் சிறிய அளவிலான இஸ்ரேலிய ரசிகர்கள் மட்டுமே இருந்தனர்.

போட்டியின் 13வது நிமிடத்தில் டிராய் பாரட் (Troy Parrott) முதல் கோலை அடித்த போது, எந்தவித அணி அடையாளங்களும் இன்றி இருந்த சுமார் 10 பேரைக் கொண்ட மிகச்சிறிய குழுவொன்று அதை கொண்டாடியது.

இப்போட்டியைக் காண அயர்லாந்து ரசிகர்கள் எவரும் வருகை தரக்கூடாது என அறிவிக்கப்பட்டிருந்தது.

இஸ்ரேலிய கால்பந்து கூட்டமைப்பு மூலம் டிக்கெட்டுகளைப் பெற்ற சில அயர்லாந்து ஆதரவாளர்கள், போட்டிக்கு முன்னதாக தங்கள் டிக்கெட்டுகள் ரத்து செய்யப்பட்டதாக அயர்லாந்து ஊடகமான RTÉ இடம் தெரிவித்தனர்.

பாரட் கோல் அடித்த மூன்று நிமிடங்களின் பின்னர் ஆடம் இடா (Adam Idah) இரண்டாவது கோலையும், 25வது நிமிடத்தில் ஜேக் மொய்லான் (Jack Moylan) மூன்றாவது கோலையும் அடித்தனர்.

இரண்டாம் பாதியில் இஸ்ரேலின் கோல் முயற்சிகளைத் தடுப்பதற்கு அயர்லாந்து கோல்கீப்பர் கெய்மின்கெல்லெஹர் (Caoimhín Kelleher) மிகச் சிறப்பாகச் செயல்பட வேண்டியிருந்தது.

போட்டியின் ஒரு மணி நேரத்தைக் கடந்த போது, இடா மற்றும் ரஸ் ஷ்லோமோ (Raz Shlomo) ஆகியோருக்கு இடையே ஏற்பட்ட மோதலால் ஆட்டத்தில் பதற்றம் தொற்றிக் கொண்டது.

இதனைத் தொடர்ந்து ஜெர்மன் நடுவர் ஹார்ம் ஒஸ்மர்ஸ் (Harm Osmers) இரு வீரர்களுக்கும் மஞ்சள் அட்டை காண்பித்தார்.

கடந்த வியாழக்கிழமை ஆஸ்திரியாவுக்கு எதிரான 3-1 என்ற தோல்வியின் போது, கோல் அடித்த பிறகு அதை கொண்டாடிய விதத்திற்காக இஸ்ரேலிய முன்னோக்கி ஆட்டக்காரர் சைஃபா அபு ஃபார்ச்சி (Sayed Abu Farchi) இடைநீக்கம் செய்யப்பட்டதால் இப்போட்டியில் விளையாடவில்லை.

அயர்லாந்து மற்றும் இஸ்ரேல் அணிகள் மீண்டும் அக்டோபர் 4 அன்று செர்பியாவின் பாகா டோபோலாவில் (Backa Topola) நடைபெறும் அயர்லாந்தின் “சொந்த மண்” போட்டியில் சந்திக்கவுள்ளன.