கண்டி நகர கழிவுநீர் முகாமைத்துவக் கருத்திட்டத்தின் கீழ் பேராதனைப் பல்கலைக்கழக வளாகத்தையும் உள்வாங்குவதற்கும், அதற்காகக் கூடுதல் நிதியை ஒதுக்கி திட்டக் காலத்தை நீடிப்பதற்கும் அமைச்சரவை அங்கீகாரம் வழங்கியுள்ளது.
ஜப்பான் சர்வதேச ஒத்துழைப்பு முகவராண்மையின் (JICA) நிதி உதவியுடன், இருதரப்பு கடன் ஒப்பந்தத்தின் கீழ் கண்டி நகர கழிவுநீர் முகாமைத்துவக் கருத்திட்டமானது 2010 ஆம் ஆண்டு முதல் 04 கட்டங்களாக (Packages) அமுல்படுத்தப்பட்டு வருகிறது.
இக்கருத்திட்டத்தின் காலப்பகுதியை 2025 ஜனவரி 1 ஆம் திகதி முதல் 2027 ஓகஸ்ட் 31 ஆம் திகதி வரை நீடிப்பதற்கு ஏற்கனவே கடந்த ஜனவரி மாதம் நடைபெற்ற அமைச்சரவைக் கூட்டத்தில் அங்கீகாரம் வழங்கப்பட்டிருந்தது.
இந்நிலையில், இந்த கழிவுநீர் முகாமைத்துவத் திட்டத்திற்குள் பேராதனைப் பல்கலைக்கழக வளாகத்தையும் உள்ளீர்க்குமாறு பல்கலைக்கழகத் துணைவேந்தர் விடுத்த வேண்டுகோளுக்கமைய விசேட சாத்தியவளக் கற்கை (Feasibility Study) ஒன்று மேற்கொள்ளப்பட்டது.
அதன் பெறுபேறுகளின் அடிப்படையில், பல்கலைக்கழக வளாகத்தையும் இத்திட்டத்திற்குள் உள்ளடக்க முடியும் எனக் கண்டறியப்பட்டுள்ளது.
நிதியொதுக்கீடும் கால நீடிப்பும்
இதற்கமைய, பேராதனைப் பல்கலைக்கழகத்தை இத்திட்டத்தின்கீழ் உட்சேர்ப்பதற்கான மதிப்பீட்டுச் செலவாக 2,000 மில்லியன் ரூபாய்கள் கணக்கிடப்பட்டுள்ளது. இந்த நிதியானது பின்வருமாறு திரட்டப்படவுள்ளது:
800 மில்லியன் ரூபாய்: ஜப்பான் சர்வதேச ஒத்துழைப்பு நிறுவனத்தின் (JICA) கடன்தொகை மூலம்.
1,200 மில்லியன் ரூபாய்: உள்நாட்டு நிதி ஏற்பாடுகள் மூலம்.
அத்துடன், பேராதனைப் பல்கலைக்கழக வளாகப் பணிகளையும் உள்ளடக்கும் வகையில் இக்கருத்திட்டத்தின் கால எல்லையை 2027 டிசம்பர் 31 ஆம் திகதி வரை மேலும் நீடிப்பதற்கும் தீர்மானிக்கப்பட்டுள்ளது.
வீடமைப்பு, நிர்மாணிப்பு மற்றும் நீர் வழங்கல் அமைச்சர் அவர்களினால் சமர்ப்பிக்கப்பட்ட இந்த விசேட யோசனைக்கு அமைச்சரவை தனது முழுமையான அங்கீகாரத்தை வழங்கியுள்ளது.
