ஆஸ்திரேலியா மற்றும் சிங்கப்பூர் ஆகிய இரு நாடுகளும் தங்களின் எரிசக்தி பாதுகாப்பை உறுதிப்படுத்தும் நோக்கில் ஒரு முக்கிய ஒப்பந்தத்தை மேற்கொண்டுள்ளன.

மத்திய கிழக்கில் நிலவும் பதற்றமான சூழலால் எண்ணெய் மற்றும் எரிவாயு விநியோகத்தில் பாதிப்பு ஏற்படக்கூடும் என்ற அச்சத்தில், இரு நாடுகளும் தங்களுக்குள் தடையற்ற வர்த்தகத்தை தொடர உறுதிபூண்டுள்ளன.

இந்த உடன்படிக்கையின்படி, பெட்ரோலியப் பொருட்கள் மற்றும் திரவ இயற்கை எரிவாயு போன்ற அத்தியாவசியத் தேவைகள் எவ்விதத் தடையுமின்றி பகிர்ந்துகொள்ளப்படும்.

மேலும், விநியோகச் சங்கிலியில் ஏதேனும் சிக்கல்கள் ஏற்பட்டால், அதுகுறித்து பரஸ்பரம் ஆலோசித்து திறந்த சந்தை கொள்கையைப் பின்பற்றுவதாக இரு பிரதமர்களும் தெரிவித்துள்ளனர்.

புதுப்பிக்கத்தக்க எரிசக்தி மாற்றத்தை விரைவுபடுத்தவும், தேவையற்ற ஏற்றுமதி கட்டுப்பாடுகளை தவிர்க்கவும் இந்த இரு நாடுகளும் ஒப்புக்கொண்டுள்ளன.

ஒட்டுமொத்த பிராந்தியத்தின் பொருளாதார செழிப்புக்காக மற்ற நாடுகளும் இத்தகைய வெளிப்படையான வர்த்தக முறையைப் பின்பற்ற வேண்டும் என்று இந்த அறிக்கை வலியுறுத்துகிறது.

ஆசிய அபிவிருத்தி வங்கியின் தலைவர் இலங்கைக்கு வருகை!

ஆசிய அபிவிருத்தி வங்கியின் (ADB) தலைவர் Masato Kanda மூன்று நாள் உத்தியோகபூர்வ விஜயத்தை மேற்கொண்டு இன்று (23) காலை இலங்கை வந்தடைந்தார்.

பொருளாதார ஒத்துழைப்பை வலுப்படுத்துதல், முக்கிய பங்குதாரர்களுடன் கலந்துரையாடல்களை நடத்துதல் மற்றும் ‘டித்வா’ சூறாவளியினால் பாதிக்கப்பட்ட பகுதிகளின் சேதங்களை நேரில் ஆராய்தல் ஆகிய நோக்கங்களுக்காகவே அவரது விஜயம் இடம்பெறுகின்றது.

அவரை, தொழில் அமைச்சரும் நிதி மற்றும் திட்டமிடல் பிரதி அமைச்சருமான அனில் ஜயந்த பெர்னாண்டோ கட்டுநாயக்க பண்டாரநாயக்க சர்வதேச விமான நிலையத்தில் வைத்து வரவேற்றார்.

ஆசிய அபிவிருத்தி வங்கித் தலைவர் இன்று (23) முற்பகல் கொழும்பு துறைமுக வளாகத்திற்கு கண்காணிப்பு விஜயமொன்றை மேற்கொள்ளவுள்ளதுடன், கொழும்பில் தனியார் துறை பிரதிநிதிகளுடன் கலந்துரையாடலிலும் ஈடுபடவுள்ளார்.

மேலும், அவர் ஆசிய அபிவிருத்தி வங்கியின் இலங்கைக்கான வதிவிட அலுவலகத்திற்கும் (SLRM) விஜயம் செய்யவுள்ளார்.

நாளை (24) தலைவர் உள்ளிட்ட தூதுக்குழுவினர் ‘டித்வா’ சூறாவளியினால் பாதிக்கப்பட்ட பகுதிகளில் கண்காணிப்பு விஜயத்தை மேற்கொள்ளவுள்ளனர்.

அத்துடன், சூறாவளியினால் பாதிக்கப்பட்ட அம்பலங்கந்த பகுதிக்கும் சென்று, அங்கிருக்கும் மக்களுடன் கலந்துரையாடி ஏற்பட்ட சேதங்களை நேரடியாகக் கண்டறியவும் திட்டமிடப்பட்டுள்ளது.

இதனைத் தொடர்ந்து, ஆசிய அபிவிருத்தி வங்கித் தலைவர் ஜனாதிபதி அலுவலகத்தில் ஜனாதிபதி அநுர குமார திசாநாயக்கவை சந்திக்கவுள்ளார்.

இந்தச் சந்திப்பின் போது பொருளாதார மறுமலர்ச்சி, அபிவிருத்தி நிதியளிப்பு மற்றும் இலங்கைக்கும் ஆசிய அபிவிருத்தி வங்கிக்கும் இடையிலான இருதரப்பு ஒத்துழைப்பை வலுப்படுத்துவது குறித்து கவனம் செலுத்தப்படும் என எதிர்பார்க்கப்படுகிறது.

ஆசிய அபிவிருத்தி வங்கியின் தெற்காசிய பிராந்திய திணைக்களத்தின் பணிப்பாளர் நாயகம் சோனா ஸ்ரேஸ்தா (Sona Shrestha), தலைவர் அலுவலக பிரதம ஆலோசகர் கெயிச்சிரோ இனுய் (Keiichiro Inui), சிரேஷ்ட ஆலோசகர் மனிஷா பிரதானாங்கா (Manisha Pradhananga) உள்ளிட்ட உயர் அதிகாரிகளும் இவ்விஜயத்தில் கலந்துகொண்டுள்ளனர்.

ஐரோப்பிய நாடுகளை தாக்கக்கூடிய ஏவுகணை திறன் ஈரான் வசமுள்ளதாக இஸ்ரேல் முன்வைத்துள்ள குற்றச்சாட்டு தொடர்பில் நேட்டோ அமைப்பு கழுகுப் பார்வை செலுத்தியுள்ளது.

லண்டன், பாரிஸ் மற்றும் பெர்லின் போன்ற நகரங்களை இலக்கு வைக்கும் தொழில்நுட்பம் ஈரானிடம் உள்ளதாக இஸ்ரேலிய பாதுகாப்புப் படை எச்சரிக்கை விடுத்துள்ளது.

எனினும், இது தொடர்பில் நேட்டோவின் பொதுச்செயலாளர் மார்க் ரூட்டே Mark Rutte இதுவரை உறுதிப்படுத்தவில்லை, எனினும், ஈரான் அத்தகைய ஆற்றலை அடைவதற்கு மிக நெருக்கமான நிலையில் உள்ளதை அவர் ஒப்புக்கொண்டுள்ளார்.

இந்த விவகாரம் உண்மையாக இருக்கும் பட்சத்தில், அது சர்வதேச பாதுகாப்பிற்குப் பெரும் அச்சுறுத்தலாக அமையும் என்பதால் இதுகுறித்த மேலதிக ஆய்வுகள் தற்போது மேற்கொள்ளப்பட்டு வருகின்றன.

சுமார் 4 ஆயிரம் கிலோ மீற்றர் தூரம்வரை சென்று தாக்கக்கூடிய ஏவுகணை ஈரான் வசம் இருப்பது ஐரோப்பிய நாடுகள் மத்தியில் அச்சத்தை ஏற்படுத்தியுள்ளது என ஏற்கனவே தகவல் வெளியானது.

அமைச்சரவைக் கூட்டம் ஜனாதிபதி அநுரகுமார திஸாநாயக்க தலைமையில் இன்று (23) நடைபெறவுள்ளது.

இதன்போது முக்கிய சில முடிவுகள் எடுக்கப்படவுள்ளன.
குறிப்பாக பஸ் கட்டணத்தை 10 சதவீதத்துக்கு மேல் அதிகரிப்பதற்குரிய யோசனைக்கு அனுமதி வழங்கப்படலாம் என தெரியவருகின்றது.

எரிபொருள் விலை அதிகரிக்கப்பட்டுள்ள நிலையிலேயே இதற்குரிய யோசனை முன்வைக்கப்பட்டுள்ளது.

ஈரானின் மின் உற்பத்தி நிலையங்கள் மீது தாக்குதல் நடத்தப்படும் என்ற அமெரிக ஜனாதிபதி ட்ரம்பின் எச்சரிக்கையைத் தொடர்ந்து, இரு நாடுகளுக்கும் இடையே போர் பதற்றம் உச்சம் தொட்டுள்ளது.

ட்ரம்பி கூறியதுபோல நடந்தால் மத்திய கிழக்கு பிராந்தியம் முழுவதும் உள்ள முக்கிய உள்கட்டமைப்புகளை இலக்கு வைக்கப்படும் என ஈரான் பதிலடி கொடுத்துள்ளது.

குறிப்பாக, ஈரான் மீது தாக்குதல் நடத்தப்பட்டால் பிராந்தியத்தின் எரிசக்தி வசதிகள் நிரந்தரமாக அழிக்கப்படும் என்றும், இதன் விளைவாக உலகளவில் எண்ணெய் விலை கடுமையாக உயரும் என்றும் ஈரான் நாடாளுமன்றத் தலைவர் தெரிவித்துள்ளார்.

ஈரான் தனது ராணுவக் கொள்கையைத் தற்காப்பு நிலையிலிருந்து தாக்குதல் நிலைக்கு மாற்றியுள்ளதாக அறிவித்துள்ளதுடன், அமெரிக்காவின் இந்த மிரட்டல் அதன் பலவீனத்தையே காட்டுவதாக ஈரான் ஊடகங்கள் விமர்சித்துள்ளன.