தமிழக ஆட்சியாளர்களுக்கு தமிழ்மொழி சிதைந்து அழிவது குறித்தோ, தமிழர்களின் வரலாறு மறைக்கப்படுவது குறித்தோ, தமிழர்களின் பண்பாடு, கலை, இலக்கியம் சிதைந்து அழிவது குறித்தோ, நிலவளம் சுரண்டப்படுவது குறித்தோ கவலை கிடையாது என்று நாம் தமிழர் கட்சியின் தலைமை ஒருங்கிணைப்பாளர் சீமான் குற்றஞ்சாட்டினார்.

நாம் தமிழர் கட்சி சார்பில் போட்டியிடும் வேட்பாளர்களுக்கு வாக்கு சேகரித்து நாம் தமிழர் கட்சி தலைமை ஒருங்கிணைப்பாளர் சீமான் ஆண்டிப்பட்டி, போடி, பெரியகுளம், ஆகிய இடங்களில் நேற்று பிரசாரம் செய்தார். போடி வள்ளுவர் சிலை முன்பு திரண்டிருந்த மக்கள் மத்தியில் சீமான் பேசியதாவது:-

மக்களுக்கு எது அடிப்படையான தேவை, எதை கொடுத்தால் அவர்களின் வாழ்க்கைத்தரம் உயரும் என்ற சிந்தனையே இல்லாதவர்களிடத்தில் 50 ஆண்டுகளாக ஆட்சி, அதிகாரம் சிக்கிக்கொண்டுள்ளது.

இந்த ஆட்சியாளர்களுக்கு தமிழ்மொழி சிதைந்து அழிவது குறித்தோ, தமிழர்களின் வரலாறு மறைக்கப்படுவது குறித்தோ, தமிழர்களின் பண்பாடு, கலை, இலக்கியம் சிதைந்து அழிவது குறித்தோ, நிலவளம் சுரண்டப்படுவது குறித்தோ, மலை வளம் களவு போவது குறித்தோ கவலை கிடையாது.

அவர்களுக்கு இருக்கும் ஒரே நோக்கம் பணம். அரசியலுக்கு வருவது, பதவிக்கு வருவது, பணம் சம்பாதிப்பது, பணத்தை பதுக்கி வைத்து தேர்தல் வரும்போது வாக்குக்கு காசு கொடுத்து வாக்கை விலைக்கு வாங்குவது என்பதாக உள்ளது. அதைக் கொண்டு மறுபடியும் ஆட்சிக்கு வருவது, கொள்ளையடிப்பது என 50 ஆண்டுகளாக தி.மு.க.வும், அ.தி.மு.க.வும் தொடர்ச்சியாக செய்து வருகிறது. இதற்கு துணையாக தேசிய கட்சிகளான காங்கிரஸ், பா.ஜ.க. உள்ளன.

நாட்டு மக்கள் நிம்மதியாக வாழ அ.தி.மு.க., தி.மு.க.விடம் இருந்து விடுதலை பெற வேண்டும். இந்த இரு கட்சிகளும் தற்போது தேர்தல் அறிக்கையில் பல வாக்குறுதிகளை கொடுத்துள்ளன.

50 ஆண்டுகளாக மாறி மாறி ஆட்சியில் இருந்தபோதும் செய்யாததையா இப்போது செய்யப்போகிறார்கள்? தேர்தல் நேரம் என்பதால் இனிப்பான வார்த்தைகளை கூறி ஏமாற்றப் பார்க்கிறார்கள்.

வாக்குக்கு காசு கொடுப்பவர்கள் பெரிய ஜமீன்கள், திவான்கள் இல்லை. மக்களிடம் திருடிய பணத்தை வாக்குக்கு கொடுக்கிறார்கள். எங்களிடம் பணம் இல்லை. ஆனால் தூய உள்ளத்தோடு மக்களுக்கு சேவை செய்ய வேண்டும் என்ற உயர்ந்த மனம் இருக்கிறது. அவர்கள் கோடிகளை கொடுக்கிறார்கள்.

நாங்கள் உயர்ந்த கொள்கைகளை கொடுக்கிறோம். எது வேண்டுமென்று முடிவு செய்யுங்கள். பணமா? தமிழர் என்ற இனமா?. நாம் தமிழர் வேட்பாளர்களின் வெற்றி எங்கள் கட்சியின் வெற்றியல்ல. நம் இனத்தின் வெற்றி. எங்கள் வேட்பாளர்கள் வெல்வது என்பது நம் இன வரலாற்றில் ஒரு மாபெரும் புரட்சி.

இவ்வாறு அவர் பேசினார்.

குணச்சித்திர நடிகர் தீப்பெட்டி கணேசன் உடல்நலக் குறைவு காரணமாக  காலமானார். அவருக்கு2 குழந்தைகள் உள்ளனர்.

ரேணிகுண்டா, பில்லா 2, தென்மேற்கு பருவக்காற்று, உஸ்தாத் ஹோட்டல், நீர்ப்பறவை, கண்ணே கலைமானே உள்ளிட்ட பல படங்களில் நடித்து தனக்கென ஓர் அடையாளத்தை ஏற்படுத்தியவர் நடிகர் தீப்பெட்டி கணேசன்.

ஆனால், அடுத்தடுத்த திரை வாய்ப்புகள் இல்லாத காரணத்தால் அவர் பாதிக்கப்பட்டார். பொருளாதாரத்தில் நலிவடைந்த நிலையில், தீப்பெட்டி கணேசன் பல்வேறு சிறு தொழில்களை செய்து வந்தார்.

கடந்த ஆண்டு, கொரோனா ஊரடங்கு காலத்தில், பால் வாங்கக்கூட காசு இல்லை என்றுகூறி இவர் வெளியிட்ட வீடியோவைப் பார்த்து கவிஞர் சினேகன் இவருக்கு உதவிக்கரம் நீட்டினார்.

இந்நிலையில், உடல்நலக் குறைவால் மதுரை ராஜாஜி அரசு மருத்துவமனையில் அனுமதிக்கப்பட்ட அவர் சிகிச்சை பலனின்றி நேற்றிரவு இறந்தார்.

” ஊடகங்களுக்கு அழுத்தம் கொடுக்கும், அச்சுறுத்தல் விடுக்கும் எந்தவொரு அதிகாரமும் ஜனாதிபதிக்கு கிடையாது.” – என்று ஜே.வி.பியின் தலைவர் அநுரகுமார திஸாநாயக்க தெரிவித்தார்.

ஜே.வி.பியின் ஊடகவியலாளர் மாநாடு நேற்று முற்பகல் அக்கட்சியின் தலைமை அலுவலகத்தில் நடைபெற்றது. இதன்போது கருத்து வெளியிடுகையிலேயே அவர் இவ்வாறு கூறினார்.

இது தொடர்பில் அவர்மேலும் கூறியவை வருமாறு,

” ஜனாதிபதி கோட்டாபய ராஜபக்ச சனிக்கிழமைதோறும் கிராமங்களுக்கு சென்று மக்கள் குறை கேட்கிறார் என்ற போர்வையில் ஊடக பிரச்சாரத்தை முன்னெடுத்துவருகின்றார். அரசுக்கு எதிராக அந்தவாரம் முன்வைக்கப்படும் குற்றச்சாட்டுகளுக்கு பதிலளிக்கும் வளமாக அதனை பயன்படுத்தி வருகின்றார். ஆக மக்கள் பிரச்சினைகளுக்கு செவிமடுக்காது, தான் எதிர்நோக்கும் பிரச்சினைகள் குறித்து கருத்து வெளியிட்டுவருகின்றார்.

குறிப்பாக நேற்று (நேற்று முன்தினம்) சனிக்கிழமை நடைபெற்ற மக்களுடனான சந்திப்பின்போது, சில ஊடகங்களையும், ஊடகவியலாளர்களையும் இலக்கு வைத்து ஜனாதிபதி உரையாற்றினார்.

” எனக்கு பாடம் கற்பிக்க தெரியும். படிப்பிக்க வேண்டிய விதமும் தெரியும். நான் ஊடக சுதந்திரத்தை வழங்கியுள்ளேன். 14 மாதங்கள் நாட்டை ஆண்டாலும் எந்தவொரு ஊடகங்களுக்கும் அழுத்தம் கொடுக்கவில்லை.” என ஜனாதிபதி குறிப்பிட்டார். இதன்மூலம் ஊடகங்களுக்கு அழுத்தம் கொடுக்கக்கூடிய அதிகாரம் தனக்கு இருந்தும் அதனை பயன்படுத்தவில்லை என்பதையே ஜனாதிபதி கூறவிளைகின்றார்.

அத்துடன், ஊடக சுதந்திரத்தை வழங்கியுள்ளாராம். ஊடக சுதந்திரம் என்பது ஜனாதிபதியால் வழங்கப்படும் அனுமதி பத்திரமோ அல்லது வரப்பிரதாசமோ கிடையாது. அது ஊடகங்களுக்கான உரிமையாகும்.

அதேபோல கடந்த காலங்களில் ஊடகங்களுக்கு எப்படி பாடம் கற்பிக்கப்பட்டது என்பது எமக்கு தெரியும். ஊடக நிறுவனங்கள் தாக்கப்பட்டன. தீயிட்டுக்கொளுத்தப்பட்டன. லசந்த விக்கிரமதுங்க கொல்லப்பட்டார். எக்னெலிகொட காணாமல்ஆக்கப்பட்டார். இப்படி பல அச்சுறுத்தலான பாடங்கள் கற்பிக்கப்பட்டுள்ளன.

எனவே, ஜனாதிபதி கற்பிக்கவுள்ள பாடம் என்பது நவீன ஊடகம் தொடர்பானதாக இருக்காது. அது அச்சுறுத்தலாகவும், அழுத்தமாகவுமே அமையும். ஊடகங்களுக்கு அழுத்தம் கொடுக்ககூடிய அதிகாரம் ஜனாதிபதிக்கு கிடைக்காது. தனது நிகழ்ச்சி நிரலை ஆதரிக்கும் ஊடகங்களை அரவணைப்பதும், மக்கள் பக்கம் நின்று விமர்சிக்கும் ஊடகங்களை அச்சுறுத்துவம் என இரட்டை நிலைப்பாட்டை ஜனாதிபதி கிடைபிடிக்ககூடாது.”

நடிகர் கார்த்திக் சென்னை போயஸ் கார்டனில் வசித்து வருகிறார். அவருக்கு திடீரென முச்சுத்திணறல் ஏற்பட்டது. இதையடுத்து உடனடியாக ஆம்புலன்ஸ் மூலம் அடையாறு பகுதியில் உள்ள தனியார் ஆஸ்பத்திரிக்கு கொண்டு சென்று அனுமதித்தனர்.

அங்கு அவருக்கு தீவிர சிகிச்சை அளிக்கப்பட்டு வருகிறது. பல்வேறு பரிசோதனைகளும் மேற்கொள்ளப்பட்டு வருகின்றன. கார்த்திக்குக்கு கொரோனா பரிசோதனையும் செய்யப்பட்டது. அதில் அவருக்கு தொற்று இல்லை என்று வந்துள்ளது.

நடிகர் கார்த்திக் தமிழ் திரையுலகில் 1980 மற்றும் 1990-களில் முன்னணி கதாநாயகனாக வலம் வந்தார். தற்போது படங்களில் அவர் வில்லனாகவும், குணசித்திர வேடங்களிலும் நடித்து வருகிறார்.

மனித உரிமை காக்கும் கட்சி என்ற பெயரிலான அரசியல் கட்சியின் தலைவராகவும் இருக்கிறார். சில தினங்களுக்கு முன்பு தனது கட்சி அ.தி.மு.க கூட்டணியில் தொடர்வதாகவும், சட்டமன்ற தேர்தலில் அ.தி.மு.க கூட்டணி வேட்பாளர்களை ஆதரித்து பிரசாரத்தில் ஈடுபடப்போவதாகவும் அறிவித்து இருந்தார்.

தமிழ் பேசும் மக்களின் தாயகமான வடக்கு, கிழக்கை பௌத்தமயமாக்குவதை இலக்காக வைத்து தொல்லியல் திணைக்களம் செயற்பட்டு வருகின்றது என இலங்கை தமிழரசுக் கட்சியின் தலைவர் மாவை சேனாதிராஜா தெரிவித்துள்ளார்.

கிளிநொச்சி, உருத்திரபுரம் உருத்திரபுரீஸ்வரர் ஆலயத்தில் தொல்லியல் அடையாளம் இருப்பதாக கூறி தொல்லியல் திணைக்களம் அகழ்வுகளை மேற்கொள்ளவுள்ள நிலையில், இதனை எவ்வாறு கையாள்வது என்பது தொடர்பாக ஆலய நிர்வாகத்தினரும் தமிழ் அரசியல் தரப்புகளும் கலந்துரையாடலை மேற்கொண்ட வேளையிலேயே அவர் இவ்வாறு தெரிவித்துள்ளார்.

குறித்த கலந்துரையாடலில் தமிழரசுக் கட்சியின் தலைவர் மாவை சேனாதிராஜா, தமிழ்த் தேசியக் கூட்டமைப்பின் யாழ்.மாவட்ட நாடாளுமன்ற உறுப்பினர் சிவஞானம் சிறிதரன்,பிரதேச சபைகளின் தவிசாளர்கள் பொதுமக்கள் என பலர் கலந்துகொண்டனர்.

இந்தக் கலந்துரையாடலில் ஆலயத்தின் தொன்மைகள் தொடர்பாகவும் வரலாறுகள் தொடர்பாகவும் கலந்துரையாடப்பட்டன.

கலந்துரையாடலின் பின் ஊடகங்களுக்கு கருத்து தெரிவித்தபோதே மாவை சேனாதிராஜா இவ்வாறு தெரிவித்துள்ளார்.

இங்கு தொடர்ந்து பேசிய அவர்;

“நாங்கள் அனைத்து விடயங்களிலும் போராட வேண்டிய நிலையில் உள்ளோம்.

அரசின் தொல்லியல் ஆய்வாளர்கள் மற்றும் இராணுவத்தினர், பௌத்த பிக்குகள் சிலர் இங்கு வந்து சென்றுள்ளதுடன், வருகின்ற 23 ஆம் திகதி அகழ்வுகளில் ஈடுபடவுள்ளதாக அறிய முடிகின்றது.

எங்களுடைய நிலங்கள், பாரம்பரியங்கள் இருக்கின்ற தெய்வ சந்நிதிகளிலே தங்களது பௌத்த சமயத்தை நிலைநாட்டுவதற்காக தொல்லியல் திணைக்களம் எனும் குழுவை அரசு உருவாக்கியுள்ளது.

குறிப்பாக வடக்கு, கிழக்கு மாகாணங்களில் தங்களது பௌத்த அடையாளங்கள் இருக்கின்றன எனக் கூறி பௌத்த விகாரைகளை நிலைநாட்ட அரசு முயற்சிக்கின்றது.

பல ஆயிரம் வருடங்களாக இருக்கும் இந்த ஆலயத்தை ஆராய்ச்சி செய்து பார்க்க இவர்கள் எத்தனித்துள்ளார்கள். இந்த இடத்தை இராணுவத்தினர் பல வருடங்களாக ஆளுகைக்குள் வைத்திருந்தனர். அவர்களே இந்த ஆய்வைச் செய்ய பௌத்த மதகுருமாருடன் ஆர்வமாக உள்ளனர்.

இவற்றைத் தடுப்பதற்கு நாங்கள் சட்ட நடவடிக்கைகளை எடுக்க வேண்டும். எம்மிடம் இருக்கும் ஆதாரங்களை வைத்து தடை உத்தரவைப் பெறுவதற்கு முயற்சிக்க வேண்டும்.

எங்களுடைய பிரதேசங்கள் மற்றும் எங்களுடைய தெய்வங்கள் இருக்கின்ற இடங்களை பௌத்த விகாரைகளாக – அடையாளங்களாக உருவாக்கி அதனை நிரூபித்து இந்தப் பிரதேசம் தங்களுடையது என்றும் இந்தப் பூமி தமிழர்களுடையது அல்ல, சிங்களவர்களுடையது என்றும் வரலாற்று ஆவணங்களைத் தயாரிப்பதற்கு அவர்கள் முயற்சிக்கின்றார்கள்.

இதற்கு நாங்கள் இடம் கொடுக்காது எமது மண்ணை நாங்கள் காப்பாற்ற சட்ட நடவடிக்கை மற்றும் போராட்டங்களை முன்னெடுக்க வேண்டும் என்று அவர் மேலும் தெரிவித்தார்.

வீதி பாதுகாப்பு தொடர்பில் விழிப்புணர்வூட்டும் உலகக்கிண்ண கிரிக்கெட் தொடர்பில் வெற்றிபெற்று சம்பியன் பட்டத்தை தனதாக்கியது இந்திய ஆளுமைகள் அணி.

சாலை பாதுகாப்பு விழிப்புணர்வு உலக தொடர் 20 ஓவர் கிரிக்கெட் தொடரில் மும்பையில் நேற்றிரவு அரங்கேறிய இறுதி ஆட்டத்தில் சச்சின் டெண்டுல்கர் தலைமையிலான இந்திய ஆளுமைகள் அணி, டில்வான் தலைமையிலான இலங்கை ஆளுமைகள் அணியை சந்தித்தது.

இதில் முதலில் துடுப்பெடுத்தாடிய  இந்தியா 4 விக்கெட்டுகளை இழந்து 181 ஓட்டங்கள் குவித்தது. யுவராஜ்சிங் 60 ஓட்டங்களும்  (41 பந்து, 4 பவுண்டரி, 4 சிக்சர்), யூசுப்பதான் 62 ஓட்டங்களையும் (36 பந்து, 4 பவுண்டரி, 5 சிக்சர்) விளாசினர்.அணித் தலைவர்  டெண்டுல்கர் தனது பங்குக்கு 30 ஓட்டங்கள் எடுத்தார்.

அடுத்து களம் கண்ட இலங்கை அணியால் 20 ஓவர்களில் 7 விக்கெட்டுகளை இழந்து 167 ஓட்டங்களை எடுக்க முடிந்தது. இதன் மூலம் இந்திய அணி 14 ஓட்டங்கள் வித்தியாசத்தில் வெற்றி பெற்று சாம்பியன் கோப்பையை தனதாக்கியது.

இறுதிவரை போராடியே இலங்கை அணி தோற்றது. சனத் ஜயசூரிய 43 ஓட்டங்களையும், ஜயசிங்க 40 ஓட்டங்களையும், வீரரத்ன 38 ஓட்டங்களையும் பெற்றனர்.

ஐக்கிய நாடுகள் மனித உரிமைகள் பேரவையில் இலங்கை அரசுக்கு எதிராக வாக்களித்து தமிழர் பக்கம் இந்தியா நிற்க வேண்டும் என காங்கிரஸ் சிரேஷ்ட தலைவரும் முன்னாள் மத்திய அமைச்சருமான ப.சிதம்பரம் தெரிவித்துள்ளார்.

இதுதொடர்பில் ருவிட்டரில் பதிவிட்டுள்ள அவர்: ஐ.நா. பாதுகாப்புச் சபையில் இலங்கை அரசின் மனித உரிமை மீறலுக்கு எதிராகத் தீர்மானம் கொண்டு வருவது பரிசீலனையில் உள்ளது.

ஐ.நா. பாதுகாப்புச் சபையில் இலங்கைக்கு எதிராக இந்தியா வாக்களிக்க வேண்டும். தீர்மானத்துக்கு ஆதரவாக இந்தியா வாக்களித்து இலங்கைத் தமிழர்களின் பக்கம் நிற்க வேண்டும் என அவர் பதிவிட்டுள்ளார்.

ஐக்கிய நாடுகள் மனித உரிமைகள் பேரவையின் 46ஆவது கூட்டத் தொடர் தற்போது ஜெனிவாவில் இடம்பெற்று வரும் நிலையில், இலங்கையில் இறுதிக்கட்ட போரின்போது தமிழர்களுக்கு எதிராக இழைக்கப்பட்டதாகக் கூறப்படும் மனித உரிமை மீறல்களுக்கு இலங்கை அரசை பொறுப்பேற்குமாறு வலியுறுத்தும் தீர்மானம் மீதான வாக்கெடுப்பு நாளை திங்கள்கிழமை இடம்பெறவுள்ளது.

இலங்கைக்கு எதிரான இந்தத் தீர்மானத்தை எதிர்த்து வாக்களிக்க வேண்டும் என இந்தியா உள்ளிட்ட நாடுகளிடம் இலங்கை அரசு கோரிக்கை விடுத்துள்ளது.

இதை ஏற்று இந்தியாவும் தீர்மானத்துக்கு எதிராக வாக்களிக்கவுள்ளதாக தகவல் வெளியாகியுள்ளது.

நாட்டில் மேலும் 177 கொரோனா வைரஸ் தொற்றாளர்கள் இன்று அடையாளம் காணப்பட்டனர்.

இதன்படி வைரஸ் தொற்றாளர்களின் எண்ணிக்கை 90 ஆயிரத்து 23 ஆக அதிகரித்துள்ளது. அத்துடன், 2ஆவது அலைமூலம் 85 ஆயிரத்து 465 பேருக்கு வைரஸ் பரவியுள்ளது.

வைரஸ் தொற்றியவர்களில் இதுவரை 86 ஆயிரத்து 759 பேர் குணமடைந்துள்ளனர்.

அதேவேளை, கொரோனாவால் மேலும் ஒருவர் உயிரிழந்துள்ளார். இதன்படி கொரோனாவால் உயிரிழந்தவர்களின் எண்ணிக்கை 546 ஆக அதிகரித்துள்ளது.