உலகம் முழுவதும் கொரோனா வைரஸ் தொற்றுக்கு இலக்காகி உயிரிழந்தவர்களின் எண்ணிக்கை 14 லட்சத்து 77 ஆயிரத்தை தாண்டியுள்ளது.

சீனாவில் ஹூபேய் மாகாணம் வுகான் நகரில் கடந்த ஆண்டு டிசம்பர் மாதம் கொரோனா வைரஸ் கண்டுபிடிக்கப்பட்டது. இந்த வைரஸ் தற்போது உலகின் 213 நாடுகள்\ பிரதேசங்களுக்கு பரவி பெரும் மனித பேரழிவை ஏற்படுத்தி வருகிறது.

தற்போதைய நிலவரப்படி, 6 கோடியே 37 லட்சத்து 47 ஆயிரத்து 750 பேருக்கு வைரஸ் தொற்று உறுதி செய்யப்பட்டுள்ளது.

கொரோனாவில் இருந்து 4 கோடியே 41 லட்சத்து 43 ஆயிரத்துக்கும் அதிகமானோர் சிகிச்சைக்கு பின் குணமடைந்துள்ளனர்.

நாட்டில் மேலும் 268 பேருக்கு கொரோனா வைரஸ் தொற்று உறுதிப்படுத்தப்பட்டுள்ளது. பேலியகொடை கொரோனா தொற்றாளர்களுடன் தொடர்பில் இருந்தவர்களுக்கே இவ்வாறு வைரஸ் தொற்றியுள்ளது.

அதேவேளை, மொத்த தொற்றாளர்களின் எண்ணிக்கை 24 ஆயிரத்து 255 ஆக அதிகரித்துள்ளது.

கொரோனாவால் இதுவரையில் 118 பேர் உயிரிழந்துள்ளனர். 17 ஆயிரத்து 817 பேர் குணமடைந்துள்ளனர்.

2 ஆவது அலைமூலம் (மினுவாங்கொட, பேலியகொட கொத்தணிகள்) இதுவரையில் 20  ஆயிரத்து 710  பேருக்கு வைரஸ் தொற்றியுள்ளது.

மஹர சிறைச்சாலை கலவரத்தால் காயமடைந்த கைதிகளில் மேலும் இருவர் உயிரிழந்துள்ளனர். இதன்படி குறித்த சம்பவத்தால் பலியானவர்களின் எண்ணிக்கை 11 ஆக அதிகரித்துள்ளது.

இதேவேளை, காயமடைந்தோரின் எண்ணிக்கை 117 ஆக உயர்வடைந்துள்ளது. இதில் சிறைச்சாலை அதிகாரிகளும் உள்ளடங்குகின்றனர்.

கொரோனா வைரஸ் தொற்றுக்கு இலக்கான நிலையில் சிகிச்சைப்பெற்றுவருபவர்களில் மேலும்  257 பேர் இன்று குணமடைந்து வீடு திரும்பினர். இதன்படி இலங்கையில் கொரோனாவின் பிடிக்குள் இருந்து மீண்டவர்களின் எண்ணிக்கை 17 ஆயிரத்து 817 ஆக அதிகரித்துள்ளது.

அத்துடன் 6 ஆயிரத்து 52 பேருக்கு தொடர்ந்தும் சிகிச்சையளிக்கப்பட்டுவருகின்றது. கொரோனாவால் 118  பேர் உயிரிழந்துள்ளனர்.

அதேவேளை, இலங்கையில் கொரோனா வைரஸ் தொற்றினால் பாதிக்கப்பட்டவர்களின் எண்ணிக்கை 23 ஆயிரத்து 987 ஆக அதிகரித்துள்ளது.

சூரரை போற்று படத்தில் சூர்யாவுக்கு ஜோடியாக நடித்து தமிழில் அறிமுகமான அபர்ணா பாலமுரளி, அப்படம் தொடர்பான தனது அனுபவங்களை பகிர்ந்துகொண்டுள்ளார்.

“நான் மலையாளத்தில் அதிக படங்களில் நடித்து இருக்கிறேன். சூர்யா படத்துக்கு நடிகை தேர்வு நடப்பது தெரிந்து அங்கு போனேன். நடிப்புக்கு பெயர்போன சூர்யாவுடன் நடிக்க வாய்ப்பு கிடைத்தால் பெரிய அதிர்ஷ்டம் என்று கருதினேன். வாய்ப்பு கிடைத்த தகவல் வந்ததும் ஆகாயத்திலேயே பறக்க ஆரம்பித்தேன்.

சீனியர் நடிகர் சூர்யா. எனது பெயர் கூட யாருக்கும் தெரிந்து இருக்காது. நான் புதுப்பெண். என்னை அவர் ஜோடியாக்க ஒப்புக்கொண்டதே பெரிய விஷயம். முதலில் அவருடன் நடிக்க மிகவும் பயந்தேன். ஆனால் பயிற்சியில் கதையை இருவரும் சேர்ந்து படித்தோம். எனக்கு மிகவும் உதவி செய்தார். அவரது ஒத்துழைப்பை என்றும் மறக்க முடியாது.

சூர்யாவின் பொறுமையை பார்த்தால் எல்லோரும் அதிசயிப்பார்கள். சக நடிகர்களை ஊக்குவிப்பார். படத்தில் வரும் எல்லா நடிகர்களும் அவர்கள் பங்கை சிறப்பாக செய்ய வேண்டும் என்பதில் அக்கறை எடுப்பார்.

நடிகர்களாக இருப்பவர்கள் நடித்து முடித்ததும் போய் விடுவார்கள். ஆனால் சூர்யா அப்படி இல்லை. ஒவ்வொருவர் நடிப்பையும் உன்னிப்பாக கவனிப்பார். மிகவும் நல்ல மனிதர். எனது அம்மாவும், அப்பாவும் இசை கலைஞர்கள். எனது ஊர் கேரளாவில் உள்ள பாலக்காடு.” இவ்வாறு அபர்ணா பாலமுரளி கூறினார்.

யாழ்ப்பாணம் காரைநகரில் தனிமைப்படுத்தப்பட்டிருந்த ஒருவர் திடீர் சுகயீனம் காரணமாக யாழ்ப்பாணம் போதனா வைத்தியசாலை தனிமைப்படுத்தல் விடுதியில் சிகிச்சை பெற்று வந்த நிலையில் உயிரிழந்துள்ளார்.

காரைநகரில் கொரோனா தொற்றாளர் அடையாளம் காணப்பட்ட நிலையில் அவரது வீட்டுக்கு அண்மையில் வசித்த வந்த 60 வயதுடைய வயோதிபரே உயிரிழந்துள்ளார். வயோதிபர் கடந்த சனிக்கிழமை முதல் வீட்டில் சுயதனிமைப்படுத்தப்பட்டுள்ளார்.

மூச்சுத் திணறல் காரணமாக அவர் நேற்று யாழ்ப்பாணம் போதனா வைத்தியசாலையில் சேர்க்கப்பட்டார். அவரை கோவிட் -19 நோய்த் தொற்று தனிமைப்படுத்தல் விடுதியில் வைத்து சிகிச்சையளிக்கப்பட்டது.எனினும் அவர் உயிரிழந்துள்ளார். மருத்துவர்களின் குறிப்பேட்டின் படி குருதியின் அளவு அரைவாசியாகக் குறைந்ததால் உயிரிழந்துள்ளார்.

அவரது இறப்புத் தொடர்பில் உடற்கூற்றுப் பரிசோதனையை செய்வதா? அல்லது பிசிஆர் பரிசோதனையின் அறிக்கை கிடைத்த பின்னர் உற்கூற்றுப் பரிசோதனையைச் செய்வதா? என்று யாழ்ப்பாணம் போதனா வைத்தியசாலை நிர்வாகம் ஆராய்ந்து வருகிறது.

பொகவந்தலாவ குயினா தோட்டத்தில் மேலும் 06 பேருக்கு கொரோனா தொற்று உறுதி செய்யப்பட்டுள்ளது.  குறித்த தோட்டத்தில் நான்கு தோட்டத்தொழிலாளர் குடியிருப்புக்கள் தனிமைப்படுத்தப்பட்டள்ளன. அத்துடன், பொகவந்தலாவ நகரில் உள்ள வெற்றிலை கடை ஒன்றுமூடப்பட்டுள்ளது என்று நோர்வூட் பிரதேச சபையின் தலைவர் கே.கே.குழந்தவேல் தெரிவித்தார்.

கொழும்பிலிருந்து பொகவந்தலாவ குயினா தோட்டத்திற்கு வருகை தந்த நபர் ஒருவருக்கு கொரோனா தொற்று உறுதி செய்ததனையடுத்து,  கடந்த 28 ஆம் திகதி அவரின் குடும்ப உறுப்பினர்களுக்கும், தொடர்பில் இருந்தவர்களுக்கும் பி.சி.ஆர். பிரிசோதனை நடத்தப்பட்டுள்ளது. அதன் முடிவு இன்று வெளியான நிலையில் அறுவருக்கு வைரஸ் தொற்று உறுதிப்படுத்தப்பட்டுள்ளது.

இதன்படி குயினா தோட்டத்தில் ஒரே குடும்பத்தை சேர்ந்த ஐந்து பேரும் பொகவந்தலாவ நகரில் வெற்றிலை விற்பனையில் ஈடுபடும் நபர் ஒருவருக்கும் தொற்று உறுதி செய்யப்பட்டுள்ளது. இவர்களுடன் நெருக்கமான தொடர்பினை பேணியவர்கள் தனிமைப்படுத்த நடவடிக்கை எடுக்கப்பட்டுள்ளன.

குறித்த கொரோனா தொற்றுக்குள்ளான நபர்கள் கொரோனா சிகிச்சை நிலையத்திற்கு சிகிச்சைக்காக அனுப்பி வைப்பதற்கான நடவடிக்கைகள் எடுக்கப்பட்டுள்ளன.

குறித்த வெற்றிலை வியாபாரியிடம் பல தோட்டங்களைச் சேர்ந்த மக்கள் வெற்றிலை வாங்கி சென்றுள்ளதாக சுகாதார தரப்பினர் மேற்கொண்ட ஆரம்பகட்ட விசாரணையில் தெரிய வந்துள்ளது.

இது குறித்து நோர்வூட் நகர சபையின் தவைர் கே.கே.குழந்தைவேல் கருத்து தெரிவிக்கையில்,

 கொரோனா தொற்றாளர்கள் கண்டுபிடிக்கப்பட்ட தோட்டத்தின் குடியிருப்புக்களுக்கும்,  குறித்த வெற்றிலை கடை பிரதேசதிற்கும் தொற்று நீக்கம் செய்யதற்கான நடவடிக்கைகளை மேற்கொண்டிருப்பதாகவும், பொகவந்தலாவையில் இதற்கு முன்  14 கொரோனா தொற்றாளர்கள் கண்டுப்பிடிக்கப்பட்டுள்ளதாகவும் அதனால் இப்பிரதேசம் முடக்குவதா இல்லையா என்பது தொடர்பாக சுகாதார பிரிவினர் பாதுகாப்பு பிரிவினர், பொறுப்பு வாய்ந்த அதிகாரிகளிடம் கலந்தாலோசித்து வருவதாகவும் தெரிவித்தார்.

நுவரெலியா மாவட்டத்தில் டயகம பகுதியில் மேற்கு 5ஆம் பிரிவிலுள்ள பெண்ணொருவர் வட்டிக்கு பணம் கொடுத்து மோசடியான நடவடிக்கைகளில் ஈடுபடுகின்றார் எனவும், அவருக்கு எதிராக பொலிஸ் நிலையத்தில் முறைப்பாடுகள் முன்வைக்கப்பட்டுள்ளபோதிலும் உரிய நடவடிக்கை எடுக்கப்படவில்லை எனவும் பாதிக்கப்பட்ட மக்கள் குற்றஞ்சாட்டுகின்றனர்.

வழங்கும் பணத்துக்கு அதிக வட்டி அறவிடப்படுவதாகவும், இது தொடர்பில் வினவினால் அடியாட்களை வைத்து அப்பெண் தாக்குவதாகவும் அவருக்கு எதிராக விமர்சனங்கள் முன்வைக்கப்பட்டுள்ளன.

சில காவல்துறை அதிகாரிகளின் ஒத்துழைப்போடும் – அடியாட்களையும் வைத்துக்கொண்டும் சினிமாப்பாணியில் வட்டி வர்த்தகம் நடத்தும் இப்பெண் தொடர்பில் பாதிக்கப்பட்ட மக்கள் தினமும் உள்ளக்குமுறல்களை வெளிப்படுத்தினர். அவர்களின் சார்பில் எமக்கு கீழ்வரும் பதிவு அனுப்பிவைக்கப்பட்டிருந்தது. அதனை உங்கள் பார்வைக்கு முன்வைக்கின்றோம்.

தனிநபரகளின் செயல்கள் சமூகத்துக்கு அல்லது மக்களுக்கு பாதிப்பெனில் அவற்றை செய்தியாக வெளியிடுவது தவறில்லை என்ற அடிப்படையில் பதிவிடுகின்றோம்.

“கடன் வாங்கிறது நம்ம அம்மாமார் பழக்கம்தான். அதை திருப்பிக் கொடுக்கத்தான் வேணும். ஆனா இங்கு பெரிய அநியாயம் நடக்குது. ஒரு பெண் ரொம்ப அடாவடி நடத்திக்கிட்டு இருக்காங்க.

வட்டிக்கு காசு எடுக்கும்போது வெத்து காகிதத்தில கையெழுத்து வாங்கிறது, அப்படி வெத்து காகிதத்தில கையெழுத்து போட முடியாதுனு சொன்னா, தொகைய எழுத்தில எழுதாமல் இலக்கத்தில மட்டும் எழுதிக்கிறது.

அப்புறம் வட்டி கொடுக்க கொஞ்சம் லேட் ஆகிச்சினா அந்த இலக்கத்தில தொகை கூட்டி போடுறதுனு அடாவடி பண்ணிக்கிட்டு இருக்கிறாங்க. உதாரணமாக 40,000 வாங்கியிருந்து, வட்டிக்கொடுக்க லேட் ஆகிட்டா, அதை 4 லட்சமாக மாத்தி, மிரட்டுறது.

பொலிஸ் நிலையத்தில அந்த பெண்மீது ஏகப்பட்ட முறைப்பாடு இருக்கு. ஆனால் பொலிஸ் பொறுப்பதிகாரி பல தடவை கண்டிச்சி இருக்கிறாரு. இப்போது பொலிஸ் நிலையத்தில இரண்டாவது மூனாவது உள்ள பொலிஸ் அதிகாரிகளை கைக்குள்ள போட்டுக்கிட்டு, பொலிஸ் நிலையத்தில யாராவது முறைப்பாடு செய்யப்போனா அவங்களுக்கு எதிராக ரொம்ப அடாவடி பண்ணுறது. இப்படி ரொம்ப அடாவடி பண்ணிக்கிட்டு இருக்காங்க.

அத்துடன், தன்னிடம் பணம் பெற்று திரும்பி செலுத்த தாமதிக்கும் பெண்களை தரக்குறைவாக பேசுவதுடன், ஆண்களைக்கூட ஆள்வைத்து மிரட்டும் அளவுக்கு குறித்த பெண் நடந்துகொள்வதாக கூறப்படுகிறது.

சினிமாவில பண்ணுற மாதிரியே அந்த பெண் பண்ணிக்கிட்டு இருக்கு. ஒரு தம்பதிக்கு ரொம்ப நாளா குழந்தை இல்லை. அவங்க ஒரு பிள்ளைய எடுத்து வளர்க்கிறாங்க. அதில் அந்த பெண் கொழும்பில் வேலை செய்கிறார்.

அந்தப் பிள்ளை வீட்டில் இருக்கும்போது, உங்க உண்மையான அம்மா, அப்பா இவங்க இல்லை. உங்க அம்மா, அப்பா வேற என்று அந்த பிள்ளைக்கிட்ட சொல்லியிருக்கிறாங்க. தங்கட அம்மா, அப்பா என்டு நினைச்சு வாழ்த்துக்கிட்டு இந்த அந்தப் பிள்ளை இப்போ ரொம்ப மனசு உடைஞ்சு போய் இருக்கு. இதை கேட்கப்போன அப்பாவை, ரொம்ப கெட்ட வார்த்தையால திட்டி, மிளகாய் தண்ணிய ஊத்தி, இதை தனது பிள்ளைக்கிட்ட கொடுத்து வீடியோ எடுத்து, பயமுறுத்திறாங்க. பொலிசில முறையிட்டா, தன்னுடைய பிள்ளைய மானபங்கப்படுத்த முயற்சித்ததா சொல்லுவேனு மிரட்டுராங்க.

தமது பெண்கள் குடும்ப பொருளாதார சுமையினால் அதனை சமாளிக்க கடன் வாங்கி இவ்வாறு சிக்கிக் கொள்ளும் பல சந்தர்ப்பங்கள் அமைகின்றன. எனினும், அவற்றை கையாள்வதற்கு சில வழிமுறைகளைப் பின்பற்றுவது அவசியமாகிறது. குறிப்பாக கடன் வாங்குபவரும், கொடுப்பவரும்கூட இந்த வழிமுறைகளைப் பின்பற்றி, ஒரு ஒழுங்கை ஏற்படுத்திக் கொள்ள வேண்டும்.

அத்துடன், இவ்வாறு பணத்திற்காக மனிதர்களைக் கீழ்த்தரமாக நடத்தும், பேசும் நபர்களுக்கு எதிராகவும் மக்கள் முறைப்பாடுகளை செய்ய வேண்டும்.
டயகம அல்லது அண்டிய பிரதேசங்களில் இருக்கும் சட்டம் படித்தவர்கள் அல்லது மனித உரிமை, சமூக செயற்பாட்டாளர்கள் இவ்வாறான செயற்பாடுகளுக்கு முற்றுப்புள்ளி வைக்க முன்வர வேண்டும்.

அல்லது தொண்டு நிறுவனங்களின் இலவச சட்ட ஆலோசனைப் பெற்று இவ்வாறான சமூகப் பிரச்சினைகளுக்குத் தீர்வு காண முன்வர வேண்டும். இந்தப் பதிவைப் பார்க்கும் யாராவது ஒருவர் இவ்வாறான பிரச்சினைகளுக்குத் தீர்வு காண்பதற்கான வழிகாட்டல்களை வழங்க முன்வர வேண்டும்.” – என்று குறிப்பிடப்பட்டுள்ளது.

குறிப்பு : (குறித்த பெண் நடந்துகொள்ளும் விதம், வார்த்தைப் பிரயோகங்கள் உள்ளிட்ட பல வீடியோக்கள் வந்துள்ள போதிலும், நாகரீகம் கருதி அவற்றை நாம் வெளியிடவில்லை)