” நாட்டை முடக்கவேண்டிய அவசில்லை தற்போது இல்லை. அத்துடன் கொரோனா தொடர்பில் எந்தவொரு தகவலையும் அரசாங்கம் மறைக்கவில்லை. ” – என்று சுகாதார அமைச்சர் பவித்ராதேவி வன்னியாராச்சி தெரிவித்தார்.

பாராளுமன்றத்தில் இன்று (7) கொரோனா வைரஸ் தாக்கம் தொடர்பில் எதிர்க்கட்சித் தலைவரால் எழுப்பட்ட கேள்விகளுக்கு பதிலளிக்கையிலேயே இந்த விடயத்தை சுகாதார அமைச்சர் குறிப்பிட்டார்.

இது தொடர்பில் அவர் மேலும் கூறியவை வருமாறு,

” கொரோனா வைரஸ் தொடர்பில் அரசியலை மையப்படுத்தி அரசாங்கம் முடிவுகளை எடுப்பதில்லை. மாறாக சுகாதார நிபுணர்களால் முன்வைக்கப்படும் பரிந்துரைகளை அடிப்படையாகக்கொண்டே முடிவுகள் எடுக்கப்படுகின்றன. தற்போது நாட்டை முடக்கும் எண்ணம் இல்லை.

நேற்று மாத்திரம் 4 ஆயிரத்து 800 பிசிஆர் பரிசோதனைகள் மேற்கொள்ளப்பட்டுள்ளன. கொரோனா தொடர்பில் எந்தவொரு தகவல்களையும் அரசாங்கம் மறைக்கவில்லை. நோயாளர்கள் அடையாளம் காணப்படுவதை அடிப்படையாகக்கொண்டே ஊரடங்கு பிறப்பிக்கப்படுகின்றது. ” – என்றார்.

மஸ்கெலியா பிரதேச சபைக்குட்பட்ட பிரவுன்லோ தோட்ட வீதி நீண்டகாலமாக புனரமைக்கப்படாமல் உள்ளது. இதனால் அப்பகுதி மக்கள் பல்வேறு இன்னல்களுக்கு முகங்கொடுத்துவருகின்றனர்.

மேற்படி தோட்டத்தில் 49 குடியிருப்புகள் காணப்படுகின்றன. 130 இற்கும் மேற்பட்டோர் வாழ்ந்துவருகின்றனர். இவர்கள் இவ்வீதியையே பயன்படுத்திவருகின்றனர்.

இவ்வீதி புனரமைக்கப்படாமையால்  மழைக் காலங்களில் பாடசாலை மாணவர்களுக்கும் சேற்றில் நடந்து செல்ல வேண்டிய நிலை ஏற்பட்டுள்ளது.

அத்துடன், இப்பாதையை பல அரசியல் கட்சி தலைவர்கள், பிரதேச சபை உறுப்பினர்கள் என அனைவரும் வந்து பார்வையிட்டு செல்கின்றனர். எனினும், புனரமைப்பதற்கு நடவடிக்கை எடுக்கப்படவில்லை என் மக்கள் தெரிவிக்கின்றனர்.

”  நகரத்திற்கு சென்று பொருட்களை கொள்வனவு செய்து, திரும்பும் போது ஆட்டோவோன்றை வாடகைக்கு எடுத்துச் செல்ல வேண்டுமானால் 500 ரூபாவுக்கு மேல் செலுத்தவேண்டியுள்ளது.  எனவே, வீதியை புனரமைத்து தருமாறு கோருகின்றோம்.” – எனவும் குறிப்பிட்டனர்.

மஸ்கெலியா நிருபர் – பெருமாள்

ஐ.பி.எல். கிரிக்கெட்டில் ராஜஸ்தானை பந்தாடிய மும்பை அணி 4ஆவது வெற்றியை சுவைத்தது.

8 அணிகள் பங்கேற்றுள்ள 13-வது ஐ.பி.எல். கிரிக்கெட் தொடர் அபுதாபி, துபாய், சார்ஜா ஆகிய நகரங்களில் நடந்து வருகிறது. அபுதாபியில் நேற்றிரவு நடந்த 20-வது லீக் ஆட்டத்தில் நடப்பு சாம்பியன் மும்பை இந்தியன்ஸ் அணி, முன்னாள் சாம்பியன் ராஜஸ்தான் ராயல்சுடன் பலப்பரீட்சை நடத்தியது. இதில் ‘டாஸ்’ ஜெயித்து முதலில் பேட் செய்த மும்பை அணி பவுண்டரியுடன் கணக்கை தொடங்கியது.

கேப்டன் ரோகித் சர்மாவும், குயின்டான் டி காக்கும் முதல் விக்கெட்டுக்கு 49 ரன்கள் (4.5 ஓவர்) சேர்த்து வலுவான தொடக்கம் அமைத்து தந்தனர். டி காக் 23 ரன்களில் கேட்ச் ஆனார். சிறிது நேரத்தில் ரோகித் சர்மா (35 ரன், 23 பந்து, 2 பவுண்டரி, 3 சிக்சர்) ஸ்ரேயாஸ் கோபாலின் சுழலில் சிக்கினார். அதே ஓவரில் இஷான் கிஷனும் (0) ஆட்டம் இழந்தார்.

இதைத் தொடர்ந்து சூர்யகுமார் யாதவுடன், குருணல் பாண்ட்யா ஜோடி சேர்ந்தார். நிலைத்து நின்று மட்டையை சுழட்டிய சூர்யகுமார் ஏதுவான பந்துகளை எல்லைக்கோட்டுக்கு துரத்தினார். என்றாலும் ரன்வேகம் சற்று மந்தமானது. தடுமாற்றத்துடன் ஆடிய குருணல் பாண்ட்யா 12 ரன்னில் (17 பந்து) வெளியேறினார். 10-ல் இருந்து 14-வது ஓவருக்குள் மும்பை அணி 3 விக்கெட்டுகளை பறிகொடுத்து வெறும் 29 ரன்கள் மட்டுமே எடுத்தது.

ஆனால் இறுதி கட்டத்தில் மும்பை பேட்ஸ்மேன்கள் அதிரடியில் வெளுத்து கட்டினர். சூர்யகுமாரும், ஹர்திக் பாண்ட்யாவும் தொடுத்த தாக்குதலில் மும்பை அணி 190 ரன்களை கடந்தது. 20 ஓவர் முடிவில் மும்பை அணி 4 விக்கெட் இழப்புக்கு 193 ரன்கள் குவித்தது. கடைசி 5 ஓவர்களில் மட்டும் 68 ரன்கள் திரட்டினர்.

ஐ.பி.எல்.-ல் தனது அதிகபட்ச ரன்களை பதிவு செய்த சூர்யகுமார் யாதவ் 79 ரன்களுடனும் (47 பந்து, 11 பவுண்டரி, 2 சிக்சர்), ஹர்திக் பாண்ட்யா 30 ரன்களுடனும் (19 பந்து, 2 பவுண்டரி, ஒரு சிக்சர்) களத்தில் இருந்தனர். அதிரடி புயல் பொல்லார்ட்டுக்கு களம் காண வாய்ப்பே கிடைக்கவில்லை. அவரை முன்கூட்டியே இறக்கியிருந்தால் மும்பை அணி 200 ரன்களை கடந்திருக்கலாம்.

அடுத்து 194 ரன்கள் இலக்கை நோக்கி ராஜஸ்தான் அணி ஆடியது. தொடக்க வீரர் ஜெய்ஸ்வால் (0) டிரென்ட் பவுல்ட் பந்து வீச்சில் விக்கெட் கீப்பர் டி காக்கிடம் கேட்ச் ஆனார். அடுத்து இறங்கிய கேப்டன் ஸ்டீவன் சுமித் (6) பும்ராவின் பந்து வீச்சை விளாச முயற்சித்த போது அது பேட்டில் உரசிக்கொண்டு விக்கெட் கீப்பர் டி காக்கிடம் கேட்ச்சாக தஞ்சமடைந்தது. தொடர்ந்து சஞ்சு சாம்சன் (0), லோம்ரோர் (11 ரன்) ஆகியோரும் நடையை கட்டினர்.

இதற்கு மத்தியில் மற்றொரு தொடக்க வீரர் ஜோஸ் பட்லர் போராடினார். ராகுல் சாஹர், குருணல் பாண்ட்யா ஆகியோரது சுழற்பந்து வீச்சில் 4 சிக்சர்களை பறக்க விட்டார். இதனால் ராஜஸ்தானுக்கு லேசான நம்பிக்கை பிறந்தது. ஸ்கோர் 98 ரன்களை எட்டிய போது ஜோஸ் பட்லர் (70 ரன், 44 பந்து, 4 பவுண்டரி, 5 சிக்சர்) பேட்டின்சனின் ஓவரில் பந்தை தூக்கியடித்தார். அதை எல்லைக்கோடு அருகே பொல்லார்ட் தட்டிவிட்டு சூப்பராக கேட்ச் செய்தார். அத்துடன் ராஜஸ்தானின் வெற்றி வாய்ப்பு சிதைந்தது.

முடிவில் ராஜஸ்தான் அணி 18.1 ஓவர்களில் 136 ரன்னில் சுருண்டது. இதனால் மும்பை அணி 57 ரன்கள் வித்தியாசத்தில் அபார வெற்றி பெற்றது. மும்பை தரப்பில் பும்ரா 4 ஓவர்களில் 20 ரன்கள் மட்டுமே கொடுத்து 4 விக்கெட்டுகளை சாய்த்தார். ஐ.பி.எல்.-ல் அவரது சிறந்த பந்து வீச்சு இதுவாகும். டிரென்ட் பவுல்ட், பேட்டின்சன் தலா 2 விக்கெட்டுகளை கைப்பற்றினர்.

மும்பை அணிக்கு இது 4-வது வெற்றியாகும். இதன் மூலம் மறுபடியும் புள்ளி பட்டியலில் முதலிடத்தை பிடித்தது. ராஜஸ்தான் அணி தொடர்ச்சியாக சந்தித்த 3-வது தோல்வியாகும்.

” இந்த ஆண்டு இறுதிக்குள் கொரோனா தடுப்பூசி தயாராகிவிடும் என்பதில் மிகுந்த நம்பிக்கை உள்ளது.” – என்று உலக சுகாதார அமைப்பின் தலைவர் நம்பிக்கை வெளியிட்டுள்ளார்.

உலகம் முழுவதும் தற்போது 9 தடுப்பூசிகள் மருத்துவ பரிசோதனையின் பல்வேறு கட்டங்களில் உள்ளன.

சீனாவில் ஹூபேய் மாகாணம் வுகான் நகரில் கடந்த ஆண்டு டிசம்பர் மாதம் கொரோனா வைரஸ் கண்டுபிடிக்கப்பட்டது. கொரோனா பரவி ஏறத்தாழ 10 மாதங்கள் ஆகியுள்ள போதிலும் தொற்று பரவலை கட்டுப்படுத்த முடியாமல் உலக நாடுகள் விழி பிதுங்கி நிற்கின்றன.

கொரோனா பரவலைக் கட்டுப்படுத்த ஊரடங்கு போன்ற கட்டுபாடுகளை பல்வேறு நாடுகள் விதித்த போதிலும் தொற்று பாதிப்பை முழுமையாக கட்டுப்படுத்த முடியவில்லை. பொருளாதாரம் பாதிக்கப்படுவதாக ஊரடங்கு விதித்த நாடுகளும் பின்னர் கட்டுப்பாடுகளை விலக்கிக் கொண்டன. இதனால், தடுப்பூசி எப்போது கிடைக்கும் என பெரும் எதிர்பார்ப்பு உலகம் முழுவதும் உள்ளது.

தடுப்பூசி கண்டுபிடிக்கும் மும்முரமாக நடந்து வருகிறது. மருத்துவ பரிசோதனையின் இறுதி கட்டங்களில் உள்ள தடுப்பூசிகள் எப்போது பொது பயன்பாட்டுக்கு கிடைக்கும் என்பதே பல நாடுகளின் ஏக்கமாக உள்ளது. இந்த நிலையில், இந்நிலையில், கொரோனா தடுப்பூசி எப்போது என்ற கேள்விக்கு உலக சுகாதார அமைப்பின் தலைவர் டெட்ரோஸ் ஆதனாம் பதிலளித்துள்ளார். இது தொடர்பாக நேற்று அவர் கூறியதாவது:-

கொரோனா தடுப்பூசி தயாரான உடன் அவை அனைவருக்கும் சமமான விகிதத்தில் விநியோகம் செய்ய உலக நாடுகளின் தலைவர்கள் ஒத்துழைப்பு தரவேண்டும். கொரோனாவை ஒழிக்க தடுப்பூசி நிச்சயம் தேவைப்படுகிறது. இந்த ஆண்டு இறுதிக்குள் கொரோனா தடுப்பூசி தயாராகிவிடும் என்பதில் மிகுந்த நம்பிக்கை உள்ளது” என்றார்.

சிறுவர் துஷ்பிரயோகம் தொடர்பில், தேசிய சிறுவர் பாதுகாப்பு அதிகார சபைக்கு  2020 ஜனவரி முதல் செப்டம்பர்வரையான காலப்பகுதியில் 6 ஆயிரத்து 63 முறைப்பாடுகள் கிடைக்கப்பெற்றுள்ளன என்று கல்வி அமைச்சர் பேராசிரியர் ஜீ.எல்.பீரிஸ் தெரிவித்தார்.

நாடாளுமன்றத்தில் நேற்று (6) தேசிய மக்கள் சக்தியின் எம்.பி. கலாநிதி ஹரினி அமரசூரியவால் எழுப்பட்ட கேள்விக்கு பதிலளிக்கையிலேயே கல்வி அமைச்சர் மேற்படி தகவலை வெளியிட்டார்.

” இவ்வாறு கிடைக்கப்பெற்றுள்ள 6 ஆயிரத்து 63 முறைப்பாடுகளில் 3 ஆயிரத்து 900 முறைப்பாடுகள் தொடர்பான விசாரணைகள் நிறைவுபெற்றுள்ளன. இவற்றில் 330 முறைப்பாடுகள் தொடர்பிலேயே குற்றப்பத்திரம் தாக்கல் செய்யப்பட்டுள்ளது.

முறைப்பாடுகள் தொடர்பான விசாரணைகளை துரிதப்படுத்தவதற்காக பல நடவடிக்கைகள் முன்னெடுக்கப்பட்டுள்ளன. ” – என்றும் பீரிஸ் குறிப்பிட்டார்.