” மக்கள் வசம் இருக்கும் மிகப்பெரிய ஜனநாயக ஆயுதமே வாக்குரிமையாகும். அடுத்த ஐந்தாண்டுகளுக்கு உங்களை ஆளப்போகின்றவர்களை தெரிவுசெய்யும் நாளே தேர்தலாகும். அவ்வாறு தெரிவுசெய்யப்படுபவர்கள் மக்களுக்கான அரசியலை முன்னெடுப்பவர்களாக இருக்கவேண்டும். அதற்கேற்றவகையில் மக்கள் நிச்சயம் வாக்குரிமையைப் பயன்படுத்த வேண்டும்.” – என்று ஐக்கிய மக்கள் சக்தியின் நுவரெலியா மாவட்ட வேட்பாளர் வேலாயுதம் தினேஷ்குமார் தெரிவித்தார்.

இது தொடர்பில் அவர் விடுத்துள்ள அறிக்கையில் தெரிவிக்கப்பட்டுள்ளதாவது,

” இலங்கையர்களுக்கு 1931 ஆம் ஆண்டு டொனமூர் ஆணைக்குழுவின் பரிந்துரையின் பிரகாரம் சர்வஜன வாக்குரிமை வழங்கப்பட்டது. இதன்படி இலங்கையின் முதலாவது அரசுப்பேரவைக்கான பொதுத்தேர்தல் 1931 ஜுன் 13 ஆம் திகதி முதல் 20 ஆம் திகதிவரை நடைபெற்றுள்ளது.

1947 ஆம் ஆண்டுக்கு முன்னர் தேர்தலில் போட்டியிடும் வேட்பாளருக்கு, அவர் அங்கம் வகிக்கும் கட்சிக்கான நிறத்தின் அடிப்படையிலேயே வாக்களிப்பு இடம்பெற்றுள்ளது.1947 ஆம் ஆண்டுதான் அரசியல் கட்சிகளுக்கும், சுயேட்சைக்குழுக்களுக்கும் தேர்தல் சின்னங்கள் வழங்கப்பட்டு, தொகுதிவாரி முறையில் வாக்களிப்பு இடம்பெற்றது.

எனினும், 1978 இல் தொகுதிவாரிமுறைமாறியது. விகிதாசார – விருப்புவாக்கு முறை அறிமுகப்படுத்தப்பட்டது. இன்றளவிலும் அந்தமுறையிலேயே தேர்தல் நடைபெற்றுவருகின்றது. இந்த விருப்பு வாக்குமுறைதான் சிக்கலுக்குரியது. வாக்குகளைப்பெறுவதற்காக என்னவெல்லாம் செய்யமுடியுமோ அவற்றை அரசியல்வாதிகள் செய்கின்றனர். இந்நிலைமை மாறவேண்டும்.

எமது மலையக சொந்தங்களுக்கு 1948 இல் வாக்குரிமை பறிக்கப்பட்டது, 1989 இலும் அதன்பின்னர் 2000 காலப்பகுதியிலுமே அந்த உரிமை மீளக்கிடைத்தது. எனவே, நாம் அனைவரும் கட்டாயம் வாக்குரிமையைப் பயன்படுத்தவேண்டும். அது நீங்கள் நிறைவேற்ற வேண்டிய மிக முக்கிய ஜனநாயக கடமையாகும்.

5 ஆம் திகதி காலைவேளையிலேயே சென்று வாக்களித்து விடுங்கள். வாக்களிக்கசெல்வதற்கு முன்னர் அடையாள அட்டை அல்லது ஆள் அடையாளத்தை உறுதிப்படுத்துவதற்காக தேர்தல் ஆணைக்குழுவால் ஏற்றுக்கொள்ளப்பட்ட ஆவணங்கள் உள்ளனவா என்பதை அவமதானித்துக்கொள்ளுங்கள்.

கட்டாயம் முகக்கவசம் அணியவும், வரிசையில் நிற்கும்போது சமூக இடைவெளியை பின்பற்றவும். பேனையொன்றையும் எடுத்துசெல்லவும். வாக்களிப்போம், ஜனநாயகத்தை பாதுகாப்போம்.” – என்றுள்ளது.

நுவரெலியா உட்பட 19 மாவட்டங்களை ஶ்ரீலங்கா பொதுஜன பெரமுன தலைமையிலான கூட்டணி கைப்பற்றும் என்று பொதுஜன பெரமுனவின் ஸ்தாபகரான முன்னாள் அமைச்சர் பஸில் ராஜபக்ச தெரிவித்தார்.

கொழும்பில் இன்று (2) நடைபெற்ற ஊடகவியலாளர் சந்திப்பில் கலந்துகொண்டு உரையாற்றுகையிலேயே அவர் இவ்வாறு கூறினார்.

” நடைபெறவுள்ள பொதுத்தேர்தலில் 130 ஆசனங்களுக்குமேல் எமது அணி கைப்பற்றும். 150 தான் எமது இலக்காக இருக்கின்றது. அதற்கான பேராதரவை மக்கள் வழங்குவார்கள் என நம்புகின்றோம்.

யாழ்ப்பாணம், வன்னி, மட்டக்களப்பு, அம்பாறை மற்றும் திருகோணமலை ஆகிய மாவட்டங்களே எமக்கு சவால்மிக்க தேர்தல் களம். மற்றும்படி ஏனைய 19 தேர்தல் மாவட்டங்களிலும் வெற்றி உறுதி.”  – என்றும் அவர் குறிப்பிட்டார்.

” இலங்கைத் தொழிலாளர் காங்கிரஸே மலையக மக்களின் பலம். அபிவிருத்திகளையும், உரிமைகளையும் வென்றெடுப்பதற்கான பேரம் பேசும் சக்தியும் எம்மிடமே இருக்கின்றது. எனவே, காங்கிரஸை மேலும் பலப்படுத்தி மலையகத்தில் மாற்றத்தை ஏற்படுத்தும் பயணத்தில் அனைவரும் இணைவோம்.” – என்று இ.தொ.காவின் பொதுச்செயலாளர் ஜீவன் தொண்டமான் அழைப்பு விடுத்துள்ளார்.

கொட்டகலையில் 02.08.2020 அன்று நடைபெற்ற தேர்தல் பிரச்சாரக்கூட்டத்தில் கலந்துகொண்டு உரையாற்றுகையிலேயே அவர் இந்த அழைப்பை விடுத்தார்.

அவர் மேலும் உரையாற்றுகையில் தெரிவித்ததாவது,

இலங்கைத் தொழிலாளர் காங்கிரஸ் எங்கு பிரச்சாரக்கூட்டங்களை நடத்தினாலும் மக்கள் திரண்டுவந்து பேராதரவை வழங்குகின்றனர். எமக்கான ஆதரவு நாளுக்கு நாள் பெருகியதை அண்மைக்காலங்களில் கண்டோம். இன்று பேராதரவு கிட்டியுள்ளது. மலையகத்தின் தாய்க்கட்சியான காங்கிரஸின் பின்னால்தான் நாம் நிற்போம் என்பதை மக்கள் உறுதிப்படுத்திவிட்டனர்.

விமர்சன அதேபோல் குறைகூறும் அரசியலுக்கு அப்பால் கொள்கை ரீதியில் திட்டங்களை முன்வைத்தே எமது அணி பிரச்சாரம் முன்னெடுத்தது. இது மக்கள் மத்தியில் பெரும் வரவேற்பை பெற்றுள்ளது. இவ்வாறானதொரு அரசியல் கலாச்சாரத்தையே மக்கள் விரும்புகின்றனர். அதனை ஏற்படுத்துவதற்கே நாம் முயற்சிக்கின்றோம்.

எதிர்காலத் திட்டங்களை நாம் முன்வைத்த பின்னர், தற்போது சிலர் அதேபோன்று செய்கின்றனர். எம்மால் முன்வைக்கப்படும் யோசனைகளை முன்வைத்து பிரச்சாரம் செய்கின்றனர். பரவாயில்லை, மக்கள் நலனே எமக்கு முக்கியம். இரண்டு தேர்தல் விஞ்ஞாபனங்களையும் ஒப்பிடுங்கள். அதில் மாற்றத்தை ஏற்படுத்தக்கூடிய திட்டங்கள் எமது விஞ்ஞாபனத்திலேயே இருக்கின்றது என்பதை கூறிக்கொள்கின்றேன்.

மலையகத்தில் மறுமலர்ச்சியை ஏற்படுத்தவேண்டும் என்பதே எனது எண்ணம். அதற்காக தீவிரமாக உழைத்துக்கொண்டிருக்கின்றேன். இலக்கை அடைவதற்கான வயதும் எனக்கு இருக்கின்றது. எனவே, அதிகாரத்தை வழங்கி எனது கரங்களைப்பலப்படுத்தி மாற்றத்துக்கான பயணத்தில் நீங்களும் இணையவேண்டும். இன்னும் 10 ஆண்டுகளில் மலையகம் எப்படி இருக்கவேண்டும் என நாம் யோசிக்கின்றோம். அதற்கான திட்டங்களை அடுத்துவரும் காலப்பகுதியில் அமைப்போம்.

அதேவேளை, மலையகத்தில் சுமார் 2 ஆயிரம் வீடுகள்வரைதான் கட்டப்பட்டுள்ளன. விரைவில் கணக்கு விபரத்தை வெளியிடுவோம். கட்டப்பட்ட வீடுகளிலும் பல குறைப்பாடுகள் உள்ளன. மனிதன் வாழும் வகையில் அவை அமையவில்லை.

இறுதிநேரத்தில் குழப்பங்களை விளைவிப்பதற்கு சிலர் முயற்சிக்கலாம். விழிப்பாக இருங்கள். மக்களின் பலம் காங்கிரஸ்தான். என்னதான் நடந்தாலும் தொண்டமான் இருக்கிறார் என்ற நம்பிக்கை அன்று எமது மக்கள் மத்தியில் இருந்தது. இன்று தலைவர் இல்லை. ஆனாலும் எமது பலத்தை இழந்துவிடக்கூடாது. காங்கிரஸ் வேட்பாளர்களுக்கு வாக்களித்து, வெற்றியின் பங்காளிகளாகி மாற்றத்தை நோக்கி பயணிக்க ஓரணியில் திரள்வோம்.” – என்றார்.

க.கிசாந்தன்

கொரோனா வைரஸ் தொற்றுக்கு இலக்கான நிலையில் சிகிச்சைப்பெற்றுவருபவர்களில் மேலும் 75 பேர் இன்று குணமடைந்து வீடு திரும்பினர்.

இதன்படி இலங்கையில் கொரோனாவின் பிடிக்குள் இருந்து மீண்டவர்களின் எண்ணிக்கை 2,514 ஆக அதிகரித்துள்ளது.

291 பேருக்கு தொடர்ந்தும் சிகிச்சையளிக்கப்பட்டுவருகின்றது. கொரோனாவால் 11 பேர் உயிரிழந்துள்ளனர்.

இலங்கையில் கொரோனா தொற்றியவர்களின் எண்ணிக்கை 2 ஆயிரத்து 816 ஆக இருக்கின்றது.

” எனது தந்தை 1989 இல் நங்கூர சின்னத்தில் போட்டியிட்ட போதும் 199இல் சுயேட்சையாக மண்வெட்டி சின்னத்தில் போட்டியிட்ட போதும் மலையக அரசியலில் ஒரு பிரளயத்தையே ஏற்படுத்தினார் அவரது துணிவான கொள்கைகளும் மக்களின் தெளிவான ஆதரவுமே அதற்கு காரணம் என்று மலையக மக்கள் முன்னணியின் பிரதிசெயலாளர் நாயகமும் சட்டத்தரணியும் கோடரி சின்ன சுயேட்சை வேட்பாளருமான அனுஷா சந்திரசேகரன் தெரிவித்தார்.

இது தொடர்பில் அவர் மேலும் கூறியதாவது.

” தனது ஒரு வாக்கினால் இலங்கை அரசியலையே தீர்மானித்த என் தந்தையின் வழியிலும் அதே உணர்வோடு மாற்றத்தை நோக்கி பயணிக்க காத்திருக்கும் என் சகோதர சகோதரிகள் நண்பர்கள் தந்தையின் விசுவாசிகளின் ஆதரவோடும் இம்முறை நான் நுவரெலியா மாவட்டத்தில் மட்டுமல்ல மலையக அரசியலிலும் நிச்சயமாக ஒரு மாற்றத்தினை பேரிடியாக ஏற்படுத்துவேன்.

இனவாதிகளின் நெருக்கடி பாதுகாப்பு துறையினரின் கெடுபிடி மலையக தொழிற்சங்கங்களின் எதிர்ப்பு தோட்ட நிர்வாகத்தின் பழி வாங்கல் அனைத்துக்கும் எதிராக தனிநபராக போராடி எம் மண்ணின் பெருமையையும் எம் மக்களின் அடையாளத்தையும் சர்வதேசத்துக்கு அடையாளம் காட்டினார்.
அவரது கொள்கையின் வாரிசாக இன்று ஒரு பெண்ணாக தனிநபராக எம்மக்களுக்காக நானும் களமிறங்கியுள்ளேன்.

எத்தனை முனைகளிலிருந்தும் எப்படியான எதிர்ப்புகள் வந்தாலும் மக்கள் சக்தியாலும் என் தந்தை போதித்த மன வலிமையாலும் அதனை உடைத்தெறிவேன் என் வெற்றியின் மூலம் மலையகம் மீண்டும் சுவாசக் காற்றை சுவாசிக்கும் நம்பிக்கையை இளைய தலைமுறைக்கு ஏற்படுத்துவேன். மலையகத்திலிருந்து நாம் மேற்கொள்ளும் நமது அரசியல் அபிவிருத்தியினுடாக எம்மவரை சர்வதேசம் திரும்பிப் பார்க்கச் செய்வேன்.” – என்றார்.

மஸ்கெலியா பிரவுன் தோட்டத்தை சேர்ந்த இளைஞரொருவர் மஸ்கெலியா பொலிஸாரால் இன்று (02) காலை கஞ்சாவுடன் கைது செய்யப்பட்டுள்ளார். அவரிடமிருந்து 2 கிரேம் கஞ்சாவும் மீட்கப்பட்டுள்ளது.

மஸ்கெலியா பொலிஸ் நிலைய பொறுப்பதிகாரி எச். பண்டாரவுக்கு கிடைக்கப்பெற்ற இரகசிய தகவலொன்றையடுத்து மேற்கொள்ளப்பட்ட சுற்றிவளைப்பின்போதே குறித்த இளைஞன் கைதுசெய்யப்பட்டுள்ளார்.

கைதானவரை நீதிமன்றத்தில் முன்னிலைப்படுத்துவதற்கு நடவடிக்கை எடுக்கப்பட்டுள்ளது.

எம். செல்வராஜா, பதுளை

கொரோனா தடுப்பூசிக்கான சோதனைகள் முடிந்து விட்டதாக முதல் நாடாக ரஷியா அறிவித்து இருப்பது உலக அரங்கை அதிர வைத்துள்ளது.

உயிர்க்கொல்லியான கொரோனா வைரசுக்கு தடுப்பூசி எப்போது வரும் என்பது உலகத்தின் எதிர்பார்ப்பாக அமைந்துள்ளது. இந்தியா உள்ளிட்ட பல நாடுகளில் தடுப்பூசிகள் உருவாக்கப்பட்டு பல்வேறு கட்ட பரிசோதனைகளில் உள்ளன.

இந்த நிலையில், ரஷியாவில் கமலேயா நிறுவனம் உருவாக்கிய தடுப்பூசியின் சோதனைகள் நிறைவு அடைந்துள்ளன. இதை அந்த நாட்டின் சுகாதார மந்திரி மிக்கேல் முராஷ்கோ அறிவித்தார்.

இதையொட்டி அவர் கூறுகையில், “கமலேயா நிறுவனம் உருவாக்கியுள்ள தடுப்பூசியை மனிதர்களுக்கு செலுத்தி பார்க்கும் பரிசோதனைகள் நிறைவு அடைந்து விட்டன. அடுத்து பதிவு செய்வதற்கான ஆவண வேலைகள் நடந்து வருகின்றன” என்று தெரிவித்தார்.

மேலும் அவர் கூறும்போது, “அக்டோபர் மாதம் தடுப்பூசிகளை பொதுமக்களுக்கு போட திட்டமிட்டிருக்கிறோம். கொரோனாவுக்கு புதிய சிகிச்சை முறையை படிப்படியாக தொடங்க வேண்டும் என்பதால் தடுப்பூசியை அக்டோபரில் போட திட்டமிடுகிறோம்” என குறிப்பிட்டார்.

தடுப்பூசிக்கான சோதனைகள் முடிந்து விட்டதாக முதல் நாடாக ரஷியா அறிவித்து இருப்பது உலக அரங்கை அதிர வைத்துள்ளது.

இதற்கிடையே ரஷியாவில் நேற்று முன்தினம் காலை நிலவரப்படி புதிதாக 5,482 பேருக்கு தொற்று பாதிப்பு ஏற்பட்டுள்ளது. அங்கு தொற்று பாதிப்புக்குள்ளானோர் எண்ணிக்கை 8 லட்சத்து 45 ஆயிரத்தை தாண்டி உள்ளது. பலியானோர் எண்ணிக்கை 14 ஆயிரத்தை கடந்திருக்கிறது.

அயர்லாந்துக்கு எதிரான 2ஆவது ஒருநாள் கிரிக்கெட் போட்டியிலும் வெற்றி பெற்ற இங்கிலாந்து அணி தொடரை கைப்பற்றியது

அயர்லாந்து கிரிக்கெட் அணி 3 ஒருநாள் போட்டிகளில் விளையாடுவதற்காக இங்கிலாந்துக்கு சென்றுள்ளது.

கடந்த 30ஆம் திகதி இடம்பெற்ற முதல் ஒருநாள் போட்டியில் இங்கிலாந்து அணி 6 விக்கெட் வித்தியாசத்தில் வெற்றி பெற்றது.

இந்த நிலையில், இரு அணிகள் மோதிய 2ஆவது ஒருநாள் போட்டி நேற்று பகல்-இரவு ஆட்டமாக சவுத்தாம்ப்டனில் நடைபெற்றது.

இதில் முதலில் துடுப்பெடுத்தாடிய அயர்லாந்து அணி நிர்ணயிக்கப்பட்ட 50 ஓவர்களில் 9 விக்கெட் இழப்புக்கு 212 ஓட்டங்களைப் பெற்றுக்கொண்டது.

இதனையடுத்து 213 என்ற வெற்றி இலக்கை நோக்கி பதிலுக்கு துடுப்பெடுத்தாடிய இங்கிலாந்து அணி 32.3 ஓவர்களில் 6 விக்கெட் இழப்புக்கு 216 ஓட்டங்களை எடுத்து 4 விக்கெட் வித்தியாசத்தில் வெற்றி பெற்றது. இந்த வெற்றியின் மூலம் இங்கிலாந்து அணி தொடரை கைப்பற்றியுள்ளது.

இதேநேரம் இரு அணிகளுக்கும் இடையிலான 3ஆவது மற்றும் இறுதி போட்டி எதிர்வரும் 4ஆம் திகதி இடம்பெறவுள்ளமை குறிப்பிடத்தக்கது.

9 ஆவது பாராளுமன்றத்தின் முதலாவது அனுதாப பிரேரணை இலங்கைத் தொழிலாளர் காங்கிரஸின் மறைந்த தலைவர் அமரர் ஆறுமுகன் தொண்டமான் தொடர்பிலேயே முன்வைக்கப்படவுள்ளது.

9 ஆவது பாராளுமன்றத்தின் முதலாவது கூட்டத்தொடர் நடைபெற்று சபாநாயகர், பிரதி சபாநாயகர், குழுக்களின் பிரதிதவிசாளர் ஆகிய பதவிகளுக்கு உறுப்பினர்கள் தெரிவுசெய்யப்பட்ட பின்னர், சபாநாயகரின் உரையுடன் சபை ஒத்திவைக்கப்படும்.

அதன்பின்னர் பிரிதொரு நாளில் சபை அமர்வு ஆரம்பமாகும். அவ்வாறு ஆரம்பமாகி அனுதாப பிரேரணைமீது விவாதம் நடைபெறுவதற்கு நாள் ஒதுக்கும்போது, முதலாவதாக அமரர் ஆறுமுகன் தொண்டமானுக்கு அனுதாபம் தெரிவிக்கும் பிரேரணையே விவாதத்துக்கு எடுத்துக்கொள்ளப்படவுள்ளது.