” மலையகத்திற்கு விஜயம் செய்திருந்த ஜனாதிபதி கோட்டாபய ராஜபக்சவிடம் நான் முன்வைத்த கோரிக்கைக்கு அமைய கண்டி மாவட்டத்திலுள்ள மாகாவலி மற்றும் எல்.ஆர்.சிக்கு கீழுள்ள இடங்களுக்கான காணி உறுதி பத்திரத்தை துரித கதியில் வழங்குவதற்கான நடவடிக்கைகளை முன்னெடுக்குமாறு குறிப்பிட்ட தரப்பினருக்கு ஜனாதிபதி ஆலோசனை வழங்கியுள்ளார் என்று கண்டி மாவட்ட வேட்பாளர் பாரத் அருள்சாமி தெரிவித்தார்.

இது தொடர்பில் பாரத் மேலும் கூறியதாவது,

பாராளுமன்றத் தேர்தலில் அரசாங்கத்தின் சார்பில் போட்டியிட்ட வேட்பாளர்களின் வெற்றியை உறுதிப்படுத்தும் நோக்கில் ஜனாதிபதி கோட்டாபய ராஜபக்ச நாடு பூராகவும் விஜயம் மேற்கொண்டார். அதன்படி, மலையகத்திற்கு விஜயம் செய்த ஜனாதிபதியிடம் மலையக மக்களின் பிரச்சினைகள் குறித்த அறிக்கையொன்றை கடந்த 11 ஆம் திகதி கலஹாவில் வைத்து கையளித்திருந்தேன்.

அந்த அறிக்கையில் மலையக மக்களுக்கு வழங்கப்பட்டுள்ள காணிகளுக்கான உறுதிப்பத்திரம் வழங்கப்படாதிருப்பது குறித்த குறிப்பிட்டிருந்ததுடன், அவர்களுக்கான காணி உறுதிப்பத்திரத்தை விரைவாக பெற்றுக் கொடுப்பதற்கான நடவடிக்கையை முன்னெடுக்குமாறும் ஜனாதிபதியிடம் கோரிக்கைவிடுத்திருந்தேன்.

அதன்படி, என்னுடைய கோரிக்கையை ஏற்றுக் கொண்ட ஜனாதிபதி கோட்டாபய ராஜபக்ஷ அவர்கள் மாகாவலி மற்றும் எல்.ஆர்.சி இடங்களுக்கான காணி உறுதி பத்திரத்தை துரித கதியில் வழங்குவதற்கான நடவடிக்கைகளை முன்னெடுக்குமாறு குறிப்பிட்ட தரப்பினருக்கு ஆலோசனை வழங்கியுள்ளார்.

அதற்கமைய கண்டி பிரதேசத்தில் அம்பகோட்ட, அளுத்வத்த, திகன, கலஹா, தெல்தோட்டை, புசல்லாவ, ரங்கலை, பன்வில, பல்லேகெல உள்ளிட்ட கண்டியில் ஏனைய மலையக பிரதேசங்களிலுள்ள காணிகளுக்கான உறுதிப்பத்திரம் துரித கதியில் வழங்குவதற்கான நடவடிக்கைகள் முன்னெடுக்கப்படவுள்ளது.
கடந்த நல்லாட்சி அரசாங்கத்தில் போலியான உறுதி பத்திரம் வழங்கி மக்கள் ஏமாற்றப்பட்டனர்.

இந்த நிலையில் நான் பாராளுமன்ற உறுப்பினராக தெரிவு செய்யப்பட்டதன் பின்னர் அரசாங்கத்தினால் அங்கீகரிக்கப்பட்ட உறுதி பத்திரம் வழங்கப்படும். குறிப்பாக, நான் மனித வள அபிவிருத்தி நிலையத்தின் தலைவராக இருந்த போது அமரர் ஆறுமுகன் தொண்டமானின் பணிப்புரைக்கு அமைய எல்.ஆர்.சியுடன் இணைந்து காணி உறுதி பத்திரங்களை வழங்கினோம். அதேபோன்று, ஜனாதிபதியின் ஆலோசனையுடன் கண்டி பிரதேசங்களுக்கு துரித கதியில் காணி உறுதிபத்திரம் வழங்கப்படும்.” – என்றார்.

க.கிசாந்தன்

கொரோனா வைரஸ் தொற்றுக்கு இலக்கான நிலையில் சிகிச்சைப்பெற்றுவருபவர்களில் மேலும் 48 பேர் இன்று குணமடைந்து வீடு திரும்பினர்.

இதன்படி இலங்கையில் கொரோனாவின் பிடிக்குள் இருந்து மீண்டவர்களின் எண்ணிக்கை 2,439 ஆக அதிகரித்துள்ளது.

365 பேருக்கு தொடர்ந்தும் சிகிச்சையளிக்கப்பட்டுவருகின்றது. கொரோனாவால் 11 பேர் உயிரிழந்துள்ளனர்.

இலங்கையில் கொரோனா தொற்றியவர்களின் எண்ணிக்கை 2 ஆயிரத்து 815 ஆக இருக்கின்றது.

இலங்கைத் தொழிலாளர் காங்கிரஸின் முன்னாள் பொதுச்செயலாளரும் அமைச்சருமான எஸ். செல்லச்சாமி தனது 95 ஆவது வயதில் இன்று (01) காலமானார்.

சுகவீனமடைந்த நிலையில் கடந்த மூன்று மாதங்களுக்கு மேலாக கொழும்பிலுள்ள வீட்டிலேயே சிகிச்சைபெற்றுவந்த அவர் இன்று நண்பகல் காலமானார் என உறவினர்கள் தெரிவித்துள்ளார்.

இலங்கைத் தொழிலாளர் காங்கிரஸின் தலைவர் அமரர் சௌமியமூர்த்தி தொண்டமானின் நம்பிக்கைக்குரிய பாத்திரமாக விளங்கிய செல்லசாமி, இ.தொ.காவின் நீண்டகாலம் பொதுச்செயலாளர் பதவியை வகித்தவர் என்பது குறிப்பிடத்தக்கது.

1965 ஆம் ஆண்டிலேயே எஸ். செல்லச்சாமி பொதுச்செயலாளராக நியமிக்கப்பட்டார். 1992 வரை அவர் அப்பதவியில் நீடித்தார். 27 ஆண்டுகளாக அப்பதவியில் நீடித்தவர் என்ற பெருமையும் சாரும்.

இ.தொ.காவின் அரசியல் செயற்பாட்டை தலைநகரிலும் கோலோச்சவைத்தனர்.

40 வருடங்கள் அமைச்சரவையில் பலமிக்க அமைச்சு பதவிகளை வகித்த மலையக அரசியல்வாதிகள் செய்யாத பல சேவைகளை தமிழ் முற்போக்கு கூட்டணி நான்கரை ஆண்டு காலப்பகுதிக்குள் செய்துள்ளது எனவும் அலரி மாளிகையை பிடிப்பதே தமது கட்சியின் இலக்கு எனவும் தமிழ் முற்போக்கு கூட்டணியின் தலைவர் மனோ கணேசன் தெரிவித்தார்.

கொழும்பில் பணிபுரியும் மலையக இளைஞர்களுடனான சந்திப்பு கொழும்பில் இடம்பெற்றது .

இந்நிகழ்வில் கலந்துகொண்டு உரையாற்றும்போதே அவர் மேற்கண்டவாறு தெரிவித்தார்.

இது தொடர்பில் அவர் மேலும் கூறியவை வருமாறு,

” மலையகம் தொடர்பில் புதியக் கனவுகளை நாம் காணவில்லை. நாம் கண்ட கனவுகள் கணிசமானவையை நிறைவேற்றி இருக்கிறோம். இலங்கைத் தொழிலாளர் காங்கிரஸின் ஸ்தாபகர் சௌமியமூர்த்தி தொண்டமான் முதல், அமரர் ஆறுமுகன் தொண்டமான் வரையில் 40 வருடங்களாக அமைச்சரவை அந்தஸ்துள்ள அமைச்சராக இருந்திருக்கிறார்கள். அவர்கள் தூங்கிக்கொண்டே இருந்திருக்கிறார்கள். அதனாலேயே அவர்கள் வெறும் கனவுகளை மாத்திரம் கண்டார்கள்.

நல்லாட்சி அரசாங்கத்தில் நாங்கள் வெறும் நான்கரை வருடங்களே அமைச்சரவையில் அமைச்சராக இருந்தோம். இந்த நான்கு வருடங்களில் 40 வருடங்களுக்கு ஈடு செய்யும் விதத்தில் மலையகத்தில் அபிவிருத்தியும்.எமது மக்களுக்கு சேவையும் முன்னெடுக்கப்பட்டது.

மலையகத்தில் தமிழ் கிராமங்களை அமைத்தல், பிரதேசசபைகள் அதிகரிப்பு உள்ளிட்டப் பல அபிவிருத்திகளை தமிழ் முற்போக்குக் கூட்டணி முன்னெடுத்துள்ளது.

சிறிகொத்தவை பிடிப்பதே எமது இலக்கு என ஐக்கிய தேசிய கட்சியினர் கூறுகிறார்கள். ஆனால் எங்களது இலக்கு அலரி மாளிகையை பிடிப்பதே. ” – என்றார்.

ஆட்சிமாற்றத்தின் ஊடாகவே  மலையகத்தில் சுபீட்சம் ஏற்படும். எனவே, ஐக்கிய மக்கள் சக்திக்கு பேராதரவை வழங்கி அந்த மாற்றத்தை ஏற்படுத்துமாறு  மலையக மக்கள் முன்னணியின் அரசியல் பிரிவு தலைவரும், பதுளை மாவட்ட வேட்பாளருமான அ.அரவிந்தகுமார் அறைகூவல் விடுத்துள்ளார்.

பதுளை, லுணுகலை ஹொப்டன் பகுதியில் 01.08.2020 அன்று நடைபெற்ற தேர்தல் பிரச்சாரக்கூட்டத்தில் கலந்துகொண்டு உரையாற்றுகையிலேயே அவர் இவ்வாறு அறைகூவல் விடுத்தார்.

இது தொடர்பில் அவர் மேலும் கூறியவை வருமாறு,

” கடும் குளிர், மழை என்பவற்றைக்கூட பொருட்படுத்தாமல் எமக்காக மக்கள் அணிதிரள்கின்றனர். கூட்டம் நடைபெறும் இடங்களிளெல்லாம் இதனைக்காணக்கூடியதாக இருக்கின்றது. இது அன்பால் சேர்ந்த கூட்டம், ஆதரவாளர்களின் ஒருமித்தக் குரலோடு சங்கமித்த கூட்டம். இவ்வாறான ஆதரவும், ஒற்றுமையுமே மலையகத்துக்கு தேவைப்படுகின்றது.

நாம் வெவ்வேறான தொழிற்சங்கங்களில் அங்கம் வகித்தாலும் சமூகம் என வரும்போது இணைந்து பயணித்தால்தான் இலக்கை நோக்கி பயணிக்ககூடியதாக இருக்கும்.

பிரச்சாரங்களுக்காக தோட்டங்களுக்கு செல்லும்போது ஆயிரம் ரூபா தொடர்பில் மக்கள் கேள்வி எழுப்புகின்றனர். இந்த ஆட்சி நீடிக்கும்வரை ஆயிரம் ரூபா கிடைக்கப்போவதில்லை என்பதுதான் எனது பதிலாக இருக்கின்றது. எனவே, கிடைக்காத ஒன்றை கிடைக்கும் என கூறி மக்கள் மத்தியில் ஏமாற்றுகாரனாக வலம்வருவதற்கு நான் தயாரில்லலை.

உண்மையை பேசினால் சிலர் அபசகுணம் என விமர்சிக்கின்றனர், ஆயிரம் ரூபா கிடைக்கவேண்டும் என்றால், மலையகத்தில் மாற்றம் ஏற்படவேண்டும் என்றால் இந்த ஆட்சிமாறவேண்டும். அதன் ஊடாகவே மலையகத்தில் சுபீட்சம் ஏற்படும்.

சஜித் பிரேமதாச என்பவர் ஏழைகளின் தோழன், அனைத்து இன மக்களையும் அரவணைத்துக்கொண்டு பயணிக்ககூடியவர், அவர் பிரதமரானால் மாத்திரமே சிறுபான்மையின மக்களின் அரசியல் இருப்பும் பாதுகாக்கப்படும். ஏனெனில் இன்று இனவாதிகள் பலகோணங்களில் கொக்கரிக்க தொடங்கியுள்ளனர்.

அதேவேளை, இன்று அத்தியாவசிய பொருட்களின் விலைகளும் உச்சம் தொட்டுள்ளன. சாதாரண மனிதம் குறித்து சிந்திக்காத கொடூங்கோல் அரசாங்கத்தை வீட்டுக்கு விரட்டவேண்டும். ” – என்றார்.

க.கிசாந்தன்

சீன தயாரிப்பான டிக் டாக் ஆப் அடுத்த 24 மணி நேரத்திற்குள் தடை செய்ய உத்தரவிட அமெரிக்க ஜனாதிபதி டொனால்டு ட்ரம்ப் தயாராகி வருகிறார்.

வொஷிங்டனில் நேற்று செய்தியாளர்களைச் சந்தித்த அமெரிக்க ஜனாதிபதி டொனால்டு ட்ரம்ப், டிக் டாக் ஆப்பை கவனித்து வருவதாகவும், அதற்கு தடை விதிக்கலாம் அல்லது வேறு சில நடவடிக்கைகளை மேற்கொள்வதற்கான திட்டங்களும் உள்ளன” என்று தெரிவித்துள்ளார்.

சீனாவின் பைட் டான்ஸுக்கு உத்தரவிட திட்டமிட்டுள்ளதாக தகவல்கள் வெளியாகின. அதன் பின்னர் டிரம்ப் இது குறித்துப் பேசியுள்ளார்

மைக்ரோசாப்ட் மென்பொருள் நிறுவனம் இந்த ஆப்பை வாங்க பேச்சுவார்த்தை நடத்தி வருவதாகவும் நேற்று தகவல்கள் வெளியாகின.

இந்நிலையில் இந்தியாவைப் போல அமெரிக்காவிலும் டிக் டாக் ஆப் விரைவில் தடை செய்யப்படலாம் எனக் கூறப்படுகிறது.

சீனாவைச் சேர்ந்த டிக் டாக், ஹலோ, யூசி பிரவுசர் உள்ளிட்ட 59 செயலிகளுக்கு இந்தியாவில் தடை விதிக்கப்பட்டது. அதைத் தொடர்ந்து சமீபத்தில் 47 சீன ஆப்களுக்கு இந்திய அரசு தடை விதித்தது. இந்த ஆப்கள் ஏற்கெனவே இந்தியாவில் தடை செய்யப்பட்ட 59 ஆப்களின் குளோன்களாக செயல்பட்டவை என்பது குறிப்பிடத்தக்கது.