இலங்கிலாந்து மன்னர் மூன்றாம் சார்லஸுக்கு புற்றுநோய் பாதிப்பு கண்டறியப்பட்டுள்ளதாக தெரிவிக்கப்பட்டுள்ளது. இதனை அறிக்கை மூலம் பக்கிங்ஹாம் அரண்மனை தெரிவித்துள்ளது.

75 வயதான மன்னர் சார்லஸ் கடந்த 2023 ஆம் ஆண்டு மன்னராக முடிசூடிக் கொண்டார்.

அவரது தாயார் இரண்டாம் எலிசபெத் ராணி, 2022-ல் உயிரிழந்ததை அடுத்து மன்னராக பொறுப்பேற்றுக் கொண்டார் என்பது குறிப்பிடத்தக்கது. இளவரசர்கள் வில்லியம் மற்றும் ஹாரியின் தந்தை. அண்மையில் மருத்துவமனையில் சிகிச்சை பெற்றிருந்தார். இந்த சூழலில் அவருக்கு புற்றுநோய் பாதிப்பு கண்டறியப்பட்டுள்ளது.

“நோய் கண்டறிதல் சோதனையின் மூலம் மன்னர் மூன்றாம் சார்லஸ{க்கு புற்றுநோய் பாதிப்பு கண்டறியப்பட்டுள்ளது. இதையடுத்து அவருக்கு அதற்கான மருத்துவ சிகிச்சை தொடங்கப்பட்டுள்ளது. பொதுவெளியில் நடைபெறும் நிகழ்வுகளில் அவர் பங்கேற்க வேண்டாம் என மருத்துவர்கள் பரிந்துரைத்துள்ளனர்.

அதே நேரத்தில் தனது வழக்கமான மற்ற பணிகளை மன்னர் மேற்கொள்வார். சிகிச்சை முறையில் பாசிட்டிவ் மனநிலையில் உள்ள மன்னர், விரைந்து பொது வாழ்வுக்கு திரும்புவார்.

ஊகங்களைத் தடுக்கவும், தான் புற்றுநோயால் பாதிக்கப்பட்டுள்ளதை உலகெங்கிலும் உள்ள அனைவருக்கும் விழிப்புணர்வு ஏற்படுத்தும் என்ற நம்பிக்கையில் அறிவித்துள்ளார்” என பக்கிங்ஹாம் அரண்மனை தெரிவித்துள்ளது.

கம்பளை பகுதியிலுள்ள சர்வதேச பாடசாலை ஒன்றின் வளாகத்தில் மரமொன்று மாணவர்கள்மீது முறிந்து விழுந்துள்ள சம்பவம் தொடர்பில் கல்வி அமைச்சு விசாரணைகளை ஆரம்பித்துள்ளது என்று அவ்வமைப்பின் செயலாளர் வசந்த பெரேரா தெரிவித்துள்ளார்.

இது தொடர்பான எதிர்கால நடவடிக்கைகள் தொடர்பில், அதிகாரிகளுக்கு அறிவுறுத்தப்பட்டுள்ளது எனவும் அவர் கூறினார்.

கம்பளை பகுதியிலுள்ள சர்வதேச பாடசாலை ஒன்றின் வளாகத்தில் மரமொன்று முறிந்து வீழ்ந்ததில், கம்பளை இல்லவத்துர பகுதியைச் சேர்ந்த ஐந்து வயது மாணவர் ஒருவர் பலியானார். மேலும் இரு மாணவர்கள் காயம் அடைந்தனர்.

அவர்களில் ஒருவர் மேலதிக சிகிச்சைகளுக்காக, கண்டி தேசிய வைத்தியசாலைக்கு மாற்றப்பட்ட நிலையில், அவர் தொடர்ந்தும் தீவிர சிகிச்சை பிரிவில் சிகிச்சை பெற்றுவருகின்றார்.

மத்திய மாகாணத்தில் இன்னும் ஆசிரியர் நியமனம் வழங்கப்படாமல் உள்ள சுமார் 125 உதவி ஆசிரியர்களுக்கு இம்மாத இறுதிக்குள் நியமனம் வழங்கப்படும் என்று கல்வி இராஜாங்க அமைச்சர் அ.அரவிந்தகுமார் தெரிவித்தார்.

இது தொடர்பில் அவர் மேலும் கூறியவை வருமாறு,

“ மத்திய மாகாணத்தில் உள்ள சுமார் 125 உதவி ஆசிரியர்களுக்கு ஆசிரியர் நியமனம் வழங்கப்படுவது இழுபறியில் இருந்தது. அரச நிர்வாக சேவை திணைக்களத்திலேயே இதற்கான தடங்கல் ஏற்பட்டிருந்தது.

இந்நிலையில் குறித்த திணைக்களத்துக்கு நான் நேரில் சென்றேன். பணிப்பாளரை சந்தித்து கடும் விசனத்தை வெளியிட்டேன்.
இதனையடுத்து கல்வி அமைச்சிடம் இருந்து இறுதி விளக்க கடிதம் கோரப்பட்டது. அந்த கடிதத்தை வழங்குவதற்கு உடன் நடவடிக்கை எடுத்தேன். தற்போது தடைகள் எல்லாம் நீங்கியுள்ளன. இம்மாத இறுதிக்குள் 125 பேருக்கான நியமனங்கள் வழங்கப்படும்.” – என்றார் கல்வி இராஜாங்க அமைச்சர் அ.அரவிந்தகுமார்.

ராமு தனராஜ்

” மலையக பெருந்தோட்ட பாடசாலைகளுக்காக ஆசிரியர் உதவியாளர்களாக 2 ஆயிரத்து 535 பேர் இணைத்துக்கொள்ளப்படவுள்ளனர்.” – என்று கல்வி இராஜாங்க அமைச்சர் அ.அரவிந்தகுமார் தெரிவித்தார்.

“ 863 பெருந்தோட்ட பாடசாலைகளுக்கான ஆசிரியர் உதவியாளர்கள் நியமனங்களை வழங்குவதற்கு அமைச்சரவை அங்கீகாரம் கிடைத்துள்ளது. இதன்படி 2,535 பேர் நியமிக்கப்படவுள்ளனர். மாதம் 20 ஆயிரம் ரூபா சம்பளம் வழங்கப்படும்.

குறிப்பிட்ட காலப்பகுதிக்குள் இவர்கள் தம்மை பட்டதாரியாக தரமுயர்த்திக்கொள்ள வேண்டும், அவ்வாறு இல்லாவிட்டால் ஆசிரியர் பயிற்சி கல்லூரியில் பயிற்சியை நிறைவுசெய்திருக்க வேண்டும். அதன்பின்னர் நியமனம் வழங்கப்படும்.

இதன்மூலம் பெருந்தோட்ட பகுதிகளில் உள்ள பாடசாலைகளில் நிலவும் ஆசிரியர் பற்றாக்குறைக்கு தீர்வு கிடைக்கும் என்ற நம்பிக்கை உள்ளது.” – எனவும் கல்வி இராஜாங்க அமைச்சர் தெரிவித்தார்.

ராமு தனராஜ்

சிறந்த அல்பத்துக்கான கிராமி விருதை இந்தியாவின் சக்தி இசைக்குழு வென்று சாதனை படைத்துள்ளது. இசைத்துறையின் உயரிய விருதாகக் கருதப்படும் கிராமி விருது விழாவானது அமெரிக்காவில் நடைபெற்றது.

இந்நித லையில் சங்கர் மகாதேவன், செல்வகணேஷ் விநாயக்ராம், கணேஷ் ராஜகோபாலன், ஜாகீர் உசேன் ஆகி யோர் அடங்கிய இசைக்குழு இணைந்து உருவாக்கிய சக்தி அல்பத்துக்கு சிறந்த அல்பம் பிரிவில் கிராமி விருது கிடைத்துள்ளது.

இந்த அல்பத்தில் மொத்தமாக 8 பாடல்கள் உள்ளன. இந்த நிலையில், விருதுபெற்ற சக்தி இசைக்குழுவுக்கு பல்வேறு தரப்பினரும் தமது வாழ்த்துக்களைத் தெரிவித்து வருகின்றனர்.

காணி உரிமை கோரி உலகில் பல புரட்சிகள் இடம்பெற்ற போதிலும், புரட்சியின்றி இந்நாட்டு மக்களுக்கு நிரந்த காணி உரிமையை வழங்க முடிந்தமை தற்போதைய அரசாங்கத்திற்குக் கிடைத்த தனித்துவமான வெற்றியாகும் என ஜனாதிபதி ரணில் விக்ரமசிங்க வலியுறுத்தினார்.

நாட்டை வங்குரோத்து நிலையில் இருந்து மீட்பதே தற்போதைய அரசாங்கம் பெற்ற முதல் வெற்றி என சுட்டிக்காட்டிய ஜனாதிபதி, 20 இலட்சம் பேர் பயன்பெறும் “அஸ்வெசும” திட்டத்தை அமுல்படுத்தியமையும் 15 இலட்சம் அரச ஊழியர்களின் சம்பளத்தை அதிகரித்ததும் ஏனைய சாதனைகளாகும் எனவும் சுட்டிக்காட்டினார்.

பாராளுமன்றத்தின் ஒரு பகுதியினரின் ஆதரவுடன் இரண்டு வருடங்கள் என்ற குறுகிய காலப்பகுதியில் நாட்டு மக்களின் முன்னேற்றத்திற்காக இவ்வாறான பரந்த பணியை அரசாங்கம் நிறைவேற்ற முடியுமாக இருந்தால் பாராளுமன்றத்தில் உள்ள அனைவரின் ஒத்துழைப்பும் கிடைத்தால் நாட்டை எந்த இடத்தில் வைக்க முடியும் என்பதை அனைவரும் சிந்திக்க வேண்டும் எனவும் ஜனாதிபதி தெரிவித்தார்.

உரித்து (உருமய) திட்டத்தின் முதற்கட்டமாக 10,000 விவசாயிகளுக்கு காணி உறுதிப் பத்திரங்கள் வழங்கும் நிகழ்வு இன்று (05) பிற்பகல் ரங்கிரி தம்புலு விளையாட்டரங்கில் இடம்பெற்றது. இந்த நிகழ்வில் கலந்து கொண்டு உரையாற்றும் போதே ஜனாதிபதி ரணில் விக்ரமசிங்க இதனைக் குறிப்பிட்டார்.

அரசாங்க காணிக் கட்டளைச் சட்டத்தின் கீழ் வெளிநாட்டவர்களுக்கு காணி வழங்க முடியுமாக இருந்தால் அந்த உரிமையை மக்களுக்கு வழங்குவதற்கு எந்த தடையும் இருக்க முடியாது எனவும் ஜனாதிபதி சுட்டிக்காட்டினார்.

ஜனாதிபதி ரணில் விக்ரமசிங்கவினால் முன்வைக்கப்பட்ட 2024ஆம் ஆண்டுக்கான வரவு செலவுத் திட்ட முன்மொழிவுகளில், 08ஆவது பரிந்துரையில், “உரித்து திட்டத்தின் கீழ் 1935ஆம் ஆண்டு காணி அபிவிருத்தி கட்டளைச் சட்டத்தின் கீழ் விவசாயிகளுக்கு அனுமதிப்பத்திரம் மற்றும் நிபந்தனையுடன் வழங்கப்பட்ட அரச காணிகளின் முழு உரிமையையும் விவசாயிகளுக்கு வழங்க எதிர்பார்க்கப்படுகிறது” என குறிப்பிடப்பட்டுள்ளது.

இதன்படி, இந்நாட்டு மக்களின் நீண்ட கால எதிர்பார்ப்பை நிறைவேற்றும் வகையில், அவர்கள் அனுபவிக்கும் காணிகளுக்கு முழு உரிமை வழங்கும் உரித்து நிகழ்ச்சித்திட்டம் ஜனாதிபதியின் வழிகாட்டலில் நாடளாவிய ரீதியில் அமுல்படுத்தப்படுகிறது. 20 இலட்சம் விவசாயக் குடும்பங்கள் பயனாளிகளாக இனங்காணப்பட்டுள்ளன. உரித்து வேலைத்திட்டத்தை நடைமுறைப்படுத்துவதற்காக 2024 ஆம் ஆண்டுக்கான வரவு செலவு திட்ட முன்மொழிவுகளின் கீழ் 02 பில்லியன் ரூபா ஒதுக்கீடு செய்யப்பட்டுள்ளது.

உரித்து திட்டத்தின் கீழ் காணியின் முழு உரிமைக்காக விண்ணப்பிக்கும் விண்ணப்பதாரர்களுக்கு காணி உறுதி வழங்குவதற்கு உரிய நிறுவனங்களை ஒருங்கிணைக்கும் வகையில் ஜனாதிபதி செயலகத்தின் கீழ் உரித்து செயற்பாட்டு செயலகமொன்றும் ஸ்தாபிக்கப்பட்டுள்ளது.

அடையாள ரீதியல் ஜனாதிபதி ரணில் விக்ரமசிங்கவினால் விவசாயிகளுக்கு காணி உறுதிகள் வழங்கி வைக்கப்பட்டன.

“தேசிய கிரிக்கெட் அபிவிருத்திப் பாதை” தேசிய திட்டத்துடன் இணைந்ததாக தம்புள்ள மைதானத்தில் நிறுவப்பட்ட ‘விசேட நிலையத்தை’யும் ஜனாதிபதி திறந்து வைத்தார்.

அத்துடன், தம்புள்ள விளையாட்டரங்க வளாகத்தில் நிர்மாணிக்கப்பட்ட புதிய நீச்சல் தடாகத்தை திறந்து வைத்த ஜனாதிபதி, நீச்சல் தடாகத்தின் நடைமுறை செயற்பாடுகளை அவதானிப்பதற்காகவும் இணைந்துகொண்டார்.

நவீனமயப்படுத்தப்பட்ட விளையாட்டு அரங்கு விளக்கு கட்டமைப்பும் ஜனாதிபதி ரணில் விக்ரமசிங்கவினால் திறந்து வைக்கப்பட்டது.

இதேவேளை, ரங்கிரி தம்புள்ள சர்வதேச கிரிக்கெட் மைதானம் மற்றும் ‘ஊடக மையம், புதிய கேட்போர் கூடம் மற்றும் உள்ளக விளையாட்டரங்கம் என்பன நிர்மாணிப்பதற்கான அடிக்கல்லையும் ஜனாதிபதி நாட்டினார்.

“ அலரிமாளிகை, ஜனாதிபதி மாளிகை என்பன ஐக்கிய மக்கள் சக்தி ஆட்சியில் பல்கலைக்கழகங்களாக மாற்றப்படும்.” – என்று எதிர்க்கட்சி தலைவர் சஜித் பிரேமதாச இன்று அறிவித்தார்.

இது தொடர்பில் அவர் மேலும் கூறியவை வருமாறு,

“ ஏனைய கட்சித் தலைவர்கள் 2024 இல் கூட மக்களை ஏமாற்றி, மாளிகை அரசியலில் ஈடுபட்டு – அரச மாளிகைகளில் சொகுசுகளை அனுபவிக்க வேண்டும் என்றே விரும்புகின்றனர். ஐக்கிய மக்கள் சக்தி ஆட்சியில்,நாட்டின் மாளிகைகள் நவீன தொழில்நுட்பம், ஆங்கிலம் என்பன கற்பிக்கும் பெரிய பல்கலைக்கழகங்களாக மாற்றப்படும். எனவே,மாளிகைகள் பற்றிய கனவுகளை வைத்துக் கொள்ளாதீர்கள்.

மொழியை மையமாக வைத்து அரசியல் நடத்தும் காலத்தை நிறுத்த வேண்டும். நாட்டிலுள்ள 41 இலட்சம் பாடசாலை மாணவர்களுக்கு உயர் ஆங்கில மொழிக் கல்வியை வழங்க முயற்சிகள் மேற்கொள்ளப்பட வேண்டும்.இனம்,மதம், சாதி,குல பேதங்கள் ஆகியவற்றை மையப்படுத்தி அரசியல் கோஷங்களுக்கு பணயக்கைதிகளாக இருக்க வேண்டாம்.” – என்றார்.

கொழும்பு – கட்டுநாயக்க அதிவேக வீதியில் இடம்பெற்ற விபத்தில் பலியான முன்னாள் இராஜாங்க அமைச்சர் சனத் நிஷாந்தவின் சாரதி, பிணையில் விடுவிக்கப்பட்டுள்ளார்.

சந்தேக நபரான சாரதி வெலிசர நீதவான் நீதிமன்றில் இன்று ஆஜர்படுத்தப்பட்டதன் பின்னர் 5 இலட்சம் ரூபா சரீரப் பிணையில் விடுவிக்கப்பட்டுள்ளார்.

இவ்விபத்தில் சனத் நிஷாந்தவும் அவரது பாதுகாப்பு உத்தியோகத்தரும் பலியாகினர்.
இவ்விபத்தையடுத்து சாரதி கைது செய்யப்பட்டார். பொலிஸ் காவலின்கீழ் சிகிச்சை பெற்றுவந்தார். அதன்பின்னர் விளக்கமறியலில் வைக்கப்பட்டார்.

விபத்து இடம்பெறுவதற்கு முதல் நாள், குறித்த சாரதி பதிவிட்டிருந்த ஒரு சமூகவலைத்தள பதிவு ,விபத்தின் பின்னர் சர்ச்சையை ஏற்படுத்தியிருந்தமையும் குறிப்பிடத்தக்கது. மரணம் தொடர்பிலேயே அந்த பதிவு அமைந்திருந்தது.