“இஸ்ரேலின் முற்றுகையைத் தகர்த்து காசாவுக்குச் சென்ற ஒரே அரபுத் தலைவர்”

கத்தாரின் ‘தந்தை அமீர்’ ஷேக் ஹமத் பின் கலீபா அல் தானி ஞாயிற்றுக்கிழமையன்று காலமானதைத் தொடர்ந்து, பாலஸ்தீன மக்களுடன் அவர் கொண்டிருந்த ஒற்றுமையும் ஆதரவும் அவரது தலைமையின் மிக முக்கியமான மரபுகளில் ஒன்றாக நினைவு கூரப்படுகிறது.

அவர் ஒரு பிராந்தியத் தலைவராக மட்டுமல்லாமல், பாலஸ்தீன மக்களின் உறுதியான கூட்டாளியாகவும், காசா முனையின் மீதான கடுமையான முற்றுகையை நேரில் சென்று தகர்த்த ஒரே அரபுத் தலைவராகவும் நினைவு கூரப்படுகிறார்.

கடந்த 2006 பாலஸ்தீனத் தேர்தலைத் தொடர்ந்து, இஸ்ரேல் காசா மீது கடுமையான சர்வதேச முற்றுகையை விதித்து ஆறு ஆண்டுகள் கடந்திருந்த நிலையில், 2012 அக்டோபரில் ஷேக் ஹமத் காசா முனைக்கு வரலாற்றுச் சிறப்புமிக்க விஜயம் ஒன்றை மேற்கொண்டார்.

தனது மனைவி ஷேக்கா மோசா பின்ட் நாசர் மற்றும் உயர்மட்டக் குழுவினருடன் சென்ற அமீர், மேற்கத்திய சக்திகளாலும் பிராந்திய நாடுகளாலும் காசா மீது விதிக்கப்பட்டிருந்த அரசியல் தனிமைப்படுத்தலைத் தகர்த்தெறிந்தார். இதனால் அவருக்கு அங்கு மாபெரும் உத்தியோகபூர்வ மற்றும் மக்கள் வரவேற்பு அளிக்கப்பட்டது.

ஹமாஸின் புலம்பெயர்ந்தோர் அலுவலகத்தின் தலைவர் காலித் மெஷால் அல் ஜசீராவிடம் பேசுகையில், தந்தை அமீரின் இந்த மறைவுக்காக “ஜெருசலேம், காசா மற்றும் பாலஸ்தீனம் ஆகிய அனைத்தும் கண்ணீர் சிந்துகின்றன” என்று தெரிவித்தார்.

“காசாவிற்கு விஜயம் செய்த முதல் அரபு மற்றும் இஸ்லாமியத் தலைவர் அவர்தான். மிகவும் இருண்ட சூழ்நிலையிலும் காசாவின் பக்கபலமாக நின்று, முற்றுகை தகர்க்கப்படுவதை அதிகாரப்பூர்வமாக அறிவிப்பது போல அவரது வருகை அமைந்தது. அவர் புத்திசாலி, தைரியமானவர் மற்றும் கொள்கைவாதி” என்று மெஷால் மேலும் கூறினார்.

மூத்த ஊடகவியலாளரும், அரபு விவகாரங்கள் குறித்த விமர்சகருமான அகமது அல்-ஷேக் கூறுகையில், தந்தை அமீருக்கு பாலஸ்தீனத்தின் மீது “ஒரு தனித்துவமான அன்பு” இருந்தது என்றார்.

“அரபு உலகில் ஹமத் பின் கலீஃபாவைத் தவிர வேறு எந்தத் தலைவராவது காசாவிற்குச் சென்றுள்ளார்களா? காசாவைச் சுற்றியுள்ள அனைவரும் அதைப் புறக்கணிப்பதை அவர் கண்டதால்தான் அவர் அங்கு சென்றார்.”

அந்த வரலாற்றுச் சிறப்புமிக்க விஜயத்தின் போது, காசாவின் மறுசீரமைப்புக்காக கத்தார் வழங்கும் நிதியுதவியை 254 மில்லியன் டாலரிலிருந்து 400 மில்லியன் டாலராக ஷேக் ஹமத் உயர்த்தினார். இது ஆயிரக்கணக்கான பாலஸ்தீன மக்களுக்குப் பயனளிக்கும் வீட்டு வசதி, உட்கட்டமைப்பு மற்றும் சுகாதாரத் திட்டங்களுக்கு வலுவான அடித்தளமிட்டது.

மனிதநேயப் பணிகளுக்காகத் தமக்கும் தங்களது மனைவிக்கும் கௌரவ டாக்டர் பட்டம் வழங்கிய காசாவின் இஸ்லாமியப் பல்கலைக்கழகத்தில் உரையாற்றிய அவர், பாலஸ்தீன மக்களின் உறுதியைப் பாராட்டிய அதேவேளை, சர்வதேச சமூகத்தின் இரட்டை நிலைப் போக்கையும் கடுமையாக விமர்சித்தார்.

பாலஸ்தீன விடுதலைக்கான அர்ப்பணிப்பு

பாலஸ்தீனத்திற்கான அவரது அர்ப்பணிப்பு காசா முற்றுகைக்கு முன்பிருந்தே தொடங்கியது. 1999 ஆம் ஆண்டில், 1967 க்குப் பிறகு பாலஸ்தீனப் பகுதிகளுக்கு விஜயம் செய்த முதல் வளைகுடாத் தலைவர் என்ற பெருமையை ஷேக் ஹமத் பெற்றார். அப்போது நிலவிய கடுமையான அரசியல் முட்டுக்கட்டைக்கு மத்தியில் அவர் மறைந்த பாலஸ்தீன அதிபர் யாசிர் அராஃபத்தைச் சந்தித்துப் பேசினார்.

அல்-ஷேக்கின் கூற்றுப்படி, பாலஸ்தீனப் போராட்டத்தை அமீர் மிகவும் தனிப்பட்ட உணர்வுடன் பார்த்தார். முன்னாள் இஸ்ரேலியப் பிரதமர் ஏரியல் ஷரோன், ரமல்லாவில் உள்ள அராஃபத்தின் தலைமையகத்தை முற்றுகையிட்டபோது அமீர் மிகுந்த வேதனையடைந்தார். ஷரோன் பாலஸ்தீனத் தலைமையகத்தைத் தாக்கியது கத்தார் மீது தாக்குதல் நடத்தியது போல தனக்கு உணர்த்தியதாக அவர் தனது உதவியாளர்களிடம் கூறியிருந்தார்.

1967 ஆக்கிரமிப்பிற்கு முன்பு ஜெருசலேமிற்குச் செல்ல முடியாமல் போனது அவருக்கு ஒரு தீராத குறையாக இருந்தது. இதன் காரணமாகவே, அந்தப் புனித நகரத்தின் வரலாறு மற்றும் அடையாளத்தை ஆவணப்படுத்தும் வகையில் மூன்று மணி நேர விரிவான ஆவணப்படம் ஒன்றை அவர் உருவாக்கச் செய்தார்.

சர்வதேசத் தலையீடுகளை மட்டுமே நம்பியிருக்காமல், பாலஸ்தீன மக்களின் சொந்த முயற்சியே அவர்களின் விடுதலை இயக்கத்தின் முதன்மை ஈட்டியாக இருக்க வேண்டும் என்று அவர் நம்பினார். “நீங்கள் தான் முதன்மைப் படியை எடுத்து வைக்க வேண்டும், அந்தச் செயல்பாடு இல்லாமல் விடுதலை சாத்தியமில்லை” என்று அமீர் ஒருமுறை அல்-ஷேக்கிடம் குறிப்பிட்டிருந்தார்.

பிராந்தியக் கருத்துக்களுக்கு முரணான நிலைப்பாடு

இவரது இந்தத் துணிச்சலான நிலைப்பாடு, வளைகுடா பிராந்தியத்தின் பிற நாடுகளின் பொதுவான முடிவுகளுக்குப் பலமுறை முரணாக அமைந்தது. 2008-2009 இல் இஸ்ரேல் காசா மீது நடத்திய கொடூரமான போரின் போது, இந்த நெருக்கடியை எவ்வாறு கையாள்வது என்பதில் வளைகுடா ஒத்துழைப்பு கவுன்சில் (GCC) உறுப்பினர்களிடையே கடுமையான கருத்து வேறுபாடுகள் ஏற்பட்டன.

அப்போது தோஹாவில் அவசர அரபு உச்சிமாநாட்டிற்கு அழைப்பு விடுத்த ஷேக் ஹமத், 250 மில்லியன் டாலர் மறுசீரமைப்பு நிதி மற்றும் முற்றுகையைத் தவிர்க்கும் வகையிலான கடல்வழிப் போக்குவரத்துப் பாதைக்கான திட்டத்தை முன்மொழிந்தார். இந்த அவசரக் கூட்டத்திற்குப் போதிய அரபுத் தலைவர்கள் வராதது குறித்து நேரடித் தொலைக்காட்சியில் அவர் தனது ஏமாற்றத்தைப் பகிரங்கமாக வெளிப்படுத்தியிருந்தார்.

2023 அக்டோபரில் இஸ்ரேலின் கொடூரமான போர் தொடங்குவதற்கு முன்பு, காசாவின் மிக முக்கியமான உத்தியோகபூர்வ உட்கட்டமைப்புகள் அனைத்தும் ஷேக் ஹமத் வழங்கிய நிதியுதவியின் மூலமே உருவாக்கப்பட்டவை ஆகும்.

முக்கிய நெடுஞ்சாலைகளின் மறுசீரமைப்பு மற்றும் கான் யூனிஸில் உள்ள ‘ஷேக் ஹமத் சிட்டி’ எனப்படும் நவீன அடுக்குமாடி குடியிருப்புகள் கொண்ட $58 மில்லியன் மதிப்புள்ள பொது வீட்டுவசதித் திட்டம் ஆகியவற்றிற்கு கத்தார் நிதியளித்தது. மேலும், 2019 ஏப்ரலில் திறக்கப்பட்ட ‘ஷேக் ஹமத் மறுவாழ்வு மற்றும் செயற்கை உறுப்பு மருத்துவமனை’, காசாவில் உள்ள மாற்றுத்திறனாளிகள் மற்றும் கேட்கும் திறன் குறைபாடுள்ள குழந்தைகளுக்கான முதன்மை மருத்துவ மையமாக விளங்கியது.

இருப்பினும், இஸ்ரேல் காசா மீது நடத்தி வரும் கொடூரமான போர், ஷேக் ஹமத்தின் தலைமையின் கீழ் கத்தார் நிதியுதவியுடன் கட்டப்பட்ட பெரும்பாலான உட்கட்டமைப்புகளைத் திட்டமிட்டு அழித்துள்ளது. இந்த ஆண்டு மே மாத செயற்கைக்கோள் படங்கள், தெற்கு காசாவில் உள்ள ‘ஹமத் சிட்டி’ மற்றும் பிற பகுதிகள் வரைபடத்திலிருந்து முற்றிலுமாக அழிக்கப்பட்டுள்ளதை உறுதிப்படுத்துகின்றன.

நேரடித் தாக்குதல்கள், கடுமையான பற்றாக்குறைகள் மற்றும் காசாவின் சுகாதாரக் கட்டமைப்பு முற்றாக வீழ்ச்சியடைந்த போதிலும், ஷேக் ஹமத் மருத்துவமனை கடந்த டிசம்பர் மாதம் தனது அத்தியாவசிய சேவைகளை மீண்டும் தொடங்கி தற்போதும் இயங்கி வருகின்றமை குறிப்பிடத்தக்கது.