நாட்டில் பயணக்கட்டுப்பாடு அமுலில் உள்ள நிலையில், கொழும்பிலிருந்து மிகவும் சூட்சுமமான முறையில் கம்பளைக்கு ஹெரோயின் கடந்திய நபரொருவர் கம்பளை பொலிஸாரால் நேற்று மதியம் கைது செய்யப்பட்டுள்ளார்.

கைதானவரிடமிருந்து 3 கிராம் 500 மில்லிகிராம் ஹேரோயின் மீட்கப்பட்டுள்ளதுடன், கடத்தலுக்கு பயன்படுத்தப்பட்ட ஆட்டோவும் கைப்பற்றப்பட்டுள்ளது.

கம்பளை, கங்கவட்ட பகுதியில் வசிக்கும் 41 வயதுடைய நபரொருவரே இவ்வாறு கைது செய்யப்பட்டுள்ளார்.

கொழும்பிலிருந்து எவ்வாறு ஹெரோயின் கடத்தப்பட்டுள்ளது, எவ்வளவு காலம் விற்பனை செய்ப்பட்டுவந்துள்ளது, இதன் பின்னணியில் செயற்படுபவர்கள் யார் என்பன உள்ளிட்ட விடயங்களைக் கண்டறிவதற்காக கம்பளை பொலிஸார் விசேட விசாரணைகளை ஆரம்பித்துள்ளனர்.

கம்பளை நிருபர் – லாவண்யா

ஐக்கிய தேசியக்கட்சியின் நாடாளுமன்ற உறுப்பினராக ரணில் விக்கிரமசிங்கவை பெயரிடுமாறுகோரும் ஆவணத்தை தேர்தல் ஆணைக்குழுவிடம், ஐ.தே.கவின் பொதுச்செயலாளர் பாலித ரங்கே பண்டார இன்று கையளித்தார்.

அதன்பின்னர் இது தொடர்பான அறிவித்தல் அடங்கிய அரசிதழை தேர்தல் ஆணைக்குழு வெளியிடும்.

எதிர்வரும் 22 அல்லது 23 ஆம் திகதி நாடாளுமன்ற உறுப்பினராக ரணில் விக்கிரமசிங்க சத்தியப்பிரமாணம் செய்யவுள்ளார் என்பது குறிப்பிடத்தக்கது.

நுவரெலியா மாவட்டத்தில் மேலும் 162 பேருக்கு கொரோனா வைரஸ் தொற்று நேற்று உறுதிப்படுத்தப்பட்டுள்ளது.

சுகாதார வைத்திய அதிகாரிகள் பிரவுகளும், வைரஸ் தொற்று உறுதிப்படுத்தப்பட்ட தொற்றாளர்களின் எண்ணிக்கையும் வருமாறு,

பொவந்தலாவ – 04

ஹங்குராந்கெத்த – 03

ஹட்டன் – 05

கந்தபளை – 21

கொத்மலை – 04

லிந்துலை -03

மஸ்கெலியா – 53

மத்துரட்ட – 07

நோட்டன் பிரிட்ஜ் – 03

நுவரெலியா – 14

பூண்டுலோயா – 05

பட்டிபொல – 06

ராகலை – 28

தலவாக்கலை – 02

உடபுஸல்லாவை – 05

உலகின் 9 நாடுகள் அணு ஆயுதங்களை வைத்துள்ளன. அவை அமெரிக்கா, ரஷியா, இங்கிலாந்து, பிரான்ஸ், சீனா, இந்தியா, பாகிஸ்தான், இஸ்ரேல் மற்றும் வட கொரியா ஆகும்.

சுவீடன் நாட்டில் உள்ள ஸ்டாக்ஹோம் அமைதி ஆராய்ச்சி நிறுவனம் (எஸ்.ஐ.பி.ஆர்.ஐ.) பல்வேறு நாடுகளின் அணு ஆயுத குவிப்பு பற்றி விரிவாக ஆராய்ந்து அறிக்கை ஒன்றை தயாரித்து, அதை ‘எஸ்.ஐ.பி.ஆர்.ஐ. ஆண்டு புத்தகம் 2021’ என்ற தலைப்பில் வெளியிட்டு, உலக அரங்கை அலற வைத்திருக்கிறது. அந்த புத்தகத்தில் இடம்பெற்றுள்ள முக்கிய அம்சங்கள் வருமாறு:-

* உலகின் 9 நாடுகள் அணு ஆயுதங்களை வைத்துள்ளன. அவை அமெரிக்கா, ரஷியா, இங்கிலாந்து, பிரான்ஸ், சீனா, இந்தியா, பாகிஸ்தான், இஸ்ரேல் மற்றும் வட கொரியா ஆகும்.

* உலகளவில் குவிக்கப்பட்டுள்ள அணு ஆயுதங்களின் எண்ணிக்கை 13 ஆயிரத்து 80 ஆகும். இவற்றில் 90 சதவீதத்துக்கும் மேற்பட்ட ஆயுதங்கள் இரு வல்லரசு நாடுகளான அமெரிக்கா, ரஷியா வசமே உள்ளன.

* கடந்த ஆண்டு ஜனவரி நிலவரப்படி சீனாவிடம் 320, பாகிஸ்தானிடம் 160, இந்தியாவிடம் 150 அணு ஆயுதங்கள் இருந்தன.

* சீனாவைப் பொறுத்தமட்டில் அது அணு ஆயுதங்களின் குறிப்பிடத்தக்க நவீனமயமாக்கல் மற்றும் ஆயுதங்கள குவிப்பின் நடுவில் உள்ளது.

* இந்தியாவும், பாகிஸ்தானும் அணு ஆயுத இருப்பை விஸ்தரித்து வருவதாக தெரிகிறது.

* ரஷியாவிடம்தான் உலகிலேயே அதிக எண்ணிக்கையில் 6,375 அணு ஆயுதங்கள் உள்ளன. அதற்கு அடுத்த நிலையில் அமெரிக்கா (5,800) உள்ளது. இங்கிலாந்திடம் 225, பிரான்சிடம் 290, இஸ்ரேலிடம் 90, வடகொரியாவிடம் 40-50 அணு ஆயுதங்கள் இருக்கின்றன.

* சீனா, பிரான்ஸ், ரஷியா, இங்கிலாந்து, அமெரிக்கா ஆகிய வல்லரசு நாடுகள் அதிக செறிவூட்டப்பட்ட யுரேனியம் அல்லது பிரிக்கப்பட்ட புளூட்டோனியம் ஆகியவற்றையே தங்கள் அணு ஆயுத உற்பத்திக்கு பயன்படுத்துகின்றன.

* இந்தியாவும், பாகிஸ்தானும் தங்கள் ஏவுகணை சோதனைகள் பற்றி அறிக்கைகளை வெளியிடுகின்றன. ஆனால் அவற்றில் நிலை அல்லது அணு ஆயுதங்களின் அளவு பற்றி எந்த தகவலையும் அளிப்பதில்லை.

* உலகமெங்கும் உள்ள 13 ஆயிரத்து 80 அணு ஆயுதங்களில் 2,000 அணுகுண்டுகள், அதிக செயல்பாட்டு எச்சரிக்கையுடன் இருக்கின்றன.

* சவூதி அரேபியா, இந்தியா, எகிப்து, ஆஸ்திரேலியா மற்றும் சீனா ஆகிய 5 நாடுகள் 2016-20 ஆண்டுகள் இடையே அதிகளவிலான ஆயுதங்களை இறக்குமதி செய்துள்ளன.

* சவூதி அரேபியா உலகளவிலான ஆயுத இறக்குமதியில் 11 சதவீதத்தையும், இந்தியா 9.5 சதவீதத்தையும் இந்த கால கட்டத்தில் செய்துள்ளன.

இவ்வாறு அந்த புத்தகத்தில் கூறப்பட்டுள்ளன.

இந்த புத்தகத்தில் வெளியாகி உள்ள அணு ஆயுதங்கள் இருப்பு, ஆயுத இறக்குமதி, அணு ஆயுதங்களுக்கு கச்சாப்பொருளாக பயன்படுத்தப்படக்கூடிய பொருட்கள் பற்றிய தகவல்கள் உலக அரங்கை அதிர வைத்துள்ளன.

இலங்கையின் இறையாண்மையை சவாலுக்குட்படுத்தி அரசமைப்பில் மாற்றம் செய்யுமாறு கோரிக்கை விடுப்பதற்கான அதிகாரம் ஐரோப்பிய ஒன்றியத்துக்கு கிடையாது. இவ்விவகாரம் தொடர்பில் வெளிவிவகார அமைச்சு உரிய வகையில் தலையிடும் – என்று அரசு அறிவித்துள்ளது.

இலங்கைக்கு வழங்கப்பட்டுள்ள GSP+ வரிச் சலுகை மற்றும் அதனால் கிடைக்கும் பிரதிபலன்களை மீள் பரிசீலனைக்கு உட்படுத்துமாறு கோரும் தீர்மானமொன்றை ஐரோப்பிய ஒன்றியத்தின் பாராளுமன்றம் கடந்த 10 ஆம் திகதி தீர்மானம் நிறைவேற்றப்பட்டிருந்தது.

இலங்கை அரசுக்கு பலவந்தப்படுத்தல் மற்றும் பயங்கரவாத தடைச் சட்டத்தை இரத்துச்செய்ய இயலாது போயுள்ளமை உள்ளிட்ட விடயங்களை அடிப்படையாக கொண்டு இந்த தீர்மானம் நிறைவேற்றப்பட்டிருந்தது.

இந்நிலையில் இவ்விவகாரம் தொடர்பில் நேற்று நடைபெற்ற அமைச்சரவை முடிவுகளை அறிவிக்கும் ஊடகவியலாளர் சந்திப்பில் கேள்வி எழுப்பட்டது. இதற்கு பதிலளித்த அமைச்சரவைப் பேச்சாளரும், அமைச்சருமான கெஹலிய ரம்புக்வெல்ல கூறியவை வருமாறு,

” ஆடைக் கைத்தொழில் மற்றும் ஐரோப்பிய நாடுகளுக்கு ஏற்றுமதி செய்யப்படும் பொருட்கள்மீதே ஜி.எல்.பி. பிளஸ் வரிச்சலுகை தாக்கம் செலுத்துகின்றது.எனவே, துறைசார் விடயங்கள் தொடர்பில் கோரிக்கை முன்வைப்பதற்கான உரிமை சம்பந்தப்பட்ட ஒன்றியத்துக்கு இருக்கின்றது. குறிப்பாக சிறுவர் ஊழியர்கள் மற்றும் ஆடைத்தொழிற்துறையில் ஈடுபட்டுள்ள ஊழியர்களுக்கான அடிப்படை வசதிகள் மறுக்கப்படுமானால் அவை தொடர்பில் கேள்வி எழுப்பலாம்.

இலங்கை என்பது சுயாதீன நாடாகும். அரசமைப்பின் பிரகாரமே ஆட்சி முன்னெடுக்கப்படுகின்றது. அந்த அரசமைப்பானது மக்கள் இறைமைக்கு உட்படுத்தப்பட்டது. நிறைவேற்று, சட்டவாக்கம் மற்றும் நீதித்துறை ஊடாக மக்களின் இறைமை பாதுகாக்கப்படுகின்றது.

எமது நாட்டுக்கு உதவி வழங்கும் ஏதேனுமொரு நிறுவனம் அல்லது ஒன்றியத்துக்கு இறைமையை சவாலுக்குட்படுத்தி, அரசமைப்பை திருத்துமாறு கோருவதற்கான உரிமை எவ்வாறு கிடைக்கின்றது? அவ்வாறு செய்யாவிட்டால் ‘கழுத்தில் துப்பாக்கி வைப்போம்’ என்ற தொனியில் மிரட்டுவது சாதாரண விடயமா? இது எனது கருத்து. வெளிவிவகார அமைச்சு இது விடயத்தில் தலையிட்டு செயற்படும்.” – என்றார்.